9. Yeeri Muusin ceeggiye

Yoseefi qititoyee gubb bi xibeena'o bulli Gibits kotee echeheete. Boonoshinaa boonoshi yareena'ona meeti naton arooch beemon yechiyeete, meeti bushiishoonoo shiiheete, eboshiyo Isra'eeleena'o gettee ceekkeheete.

Meeti balle natoyee gubb Isra'eelna'ochi haddoo meetti, meetti waahe. Gibitseena'o Yoseefinaa boonoshi gaacheya bi tuniito bullinon batteheete. Isra'eeleena'o meettii, meettii boonoshi waatoyich Gibitseena'o boonoshin shattiyeete. Ebich arooba Gibitsin qeejjii beeti Farooni Isra'eeleena'on Gibitsena'oyich guuno tuniihe.

Gibitseena'o Isra'eeleena'on giidoona dilaalo boonoshi shuunemmonaa katamoo bullin boonoshi haggemmonon tuunii beeheete. Shuunoo magge boonoshi kashoon du'iihe. Tunebaani Yeeri boonoshin bi diiritoyich meeti bushiishoo shiiheete.

Farooni Isra'eeleena'o meeti duduqeena'o boonoshich beemon beeggiye. Ebich Isra'eeleena'o waane anaami bushiishoo shiijjemmona Abaay aacooch dufi boonoshi wuxemmon asheena'oyich gettiye.

Ikke Isra'eeleche anaami bushoon shiyahan. Biinaa bi kenoona boonoshi hakkiti wotton bushoon aachiyeete.

Bushoochi nihoonaa indeena bushoon aachoo hakkoo boonoshi mawiihoba bi qitaachemmoyich tegibeeti guubooch geddii'i Abay aachi gash beeti qiximmee daggooch kotiiheete. Bushoochi qaabbe maneyoo wokkaachaa bushoo toommooch tunemmon ciinnaa beehan.

Faroonichi bushee guuboon ciinna'a bi maac beeti mooyon beeggahan. Nalleffon bi ciinihoba bi hajjee bushoo tuniyoyich daammahan. Biyoo bushoon shiime dichiyemmi Isra'eeleecheech gijjoo qoccahan. Ebi ure bushoochi indee bi tunoon ariyaaneene. Bushoo dicii'i bi indee xanon bi kuxihoba ure bushoon Farooni busheech wochiyan. Bushoono Muusii'i shigiiheete.

Muusi bi diccitoye gubb ikke areddoon Gibisee asho Isra'eele ashoon xoobbii bi beetaa beeggii'i Isra'eele bi shiishoon degga qiiccehe.

Muusi koniyona ciinaano biich shaahitoyich Gibitse ashoon wuxii'i duukkiye. Tunebaani Muusi tuniiton ikke asho beeggitone.

Muusi tuniiton Farooni bi waayehoba wuxiya qaawiye. Tunebaani Muusi Farooni gine naayina'o kishooche bi kashoon bi wodiyemmi Gibitse barahooch maxxehe.

Muusi Gibitsee wohi barahoochaa bage qiddecho tunehe. Are showoocheeno mecheen shaaggii'i gutte anaami bushiishoon shiihe.

Ikke aaboon Muusi bagoon quyee bi beetaa qaaqqoo kuchoon yechii'i aaxxee bi beeta beeggiye. Tunebaani qaaqqoo kuchoon yechito bi tunetaanona micaanoone. Muusiyo gaawuchii ciinoch kuchoo waan giddehe. Micciibeeti kuchoo waan bi giddemmona Doono Yeeri biich “Muuso yaafeeti xaa'ooch ne neexetoyich, caammoon ne baatoochee kichibe!” iye.

Doono Yeeriyoo, “Gibits beeti ta asheena'ochi xuuxoon beeggeto taane; Ebich neen Farooni waan daachiyemmo taane; Isra'eeleena'onoo guuchitinooche kichemmo neene. Aroochee Abrahamichi, Yisaaqinaa Yaaqobinoch immoyich ta gibenikkiti showoo Kanaanin boonoshich immemmo taane” iye.

Muusiyoo asheena'o neen wocheto konine ii boonoshi taan eche gaata ama getteete ii Yeerin echehe. Doono Yeerio “Halla Taane getteebeeto ittoshi waan taan wochee deejjitone gete” iye.

Muusi bi shattitoyich Farooni waan hamon qaawaanoone. Ebiyo yibbaatee hakkoo taach aalloonei'i bi gabitoyichiye. Ebich Yeeri Muusi mano Aarooni biinna tookki hammiree Muusin bi gaachemmoyich daachiihe. Farooni Isra'eeleena'on kixoon mawiree gajjeyemmo bi tunetoyich, Yeeri Aarooninaa Muusinon meeqeqiye.