8. Yeeri Yoseefinaa bi kechi ashoonon woddihe

Boonoshi niho Yaagobi Yoseefin bare bi bushiisheena'o bulliyee beshii'i shunni bi beetoonaa Yoseefiyoo boonoshi tomooch ukuroo bi tuneechi gumon bi maacitoyich bi maneena'o shixxiyeete. Yoseefi bi maneena'o waan bi waahoba yechii'i guuchi giixechina'ochi kemmiyeete.

Meeti natoye gubb Yaaqobi bi geenehoba gijjoon quyeebeeti bi maneena'ochi diggittinoon bi beeggemmoyich bi shunniibeeti busho Yoseefin daachiihe.

Yoseefi maneena'o kexooch boonoshi wotooye shiichii'i, ikke emmishoon guuri'i Yoseef kittoon damooch hacciyeete. Aroochee damooch hacceeti bi kittoon daammii boonoshi nihoyich bekkiiheete. Biyoo Yoseefin gonde cooxo maatonei'i oogeton ayiniye.

Guuchi giixechina'o Yoseefin Gibits daamiyeete. Arooba Gibitsi Abbay aachi ga'ooch beeti oogetinaa giidechi aageteene. Guuchi giixechina'o gaanechi Gibitse ukkurooch Yoseefin guuno tunii'i kemmiyeete. Yoseefi biin hajjiti doonoyich gaawuchii'i maddehe. Yeeriyo Yoseefin diiriye.

Yoseefin hajjiti doonochi mechee Yoseefina qeyemmoyich qaawiyan. Tunebaani Yoseefi Yeeri aafooch axaaxoon shuneyaachei'i qajjiye. Ureyo bi ippeetoyich kootoona Yoseefin bi kassitoyich yechee'i cuyee kexooch giihe. Cuyee kexoochaanoo Yeerich gibeneeto bi tunetoyich Yeeri biin diiriye.

Yoseefi xalle asho bi tunetaanoona gutte nato beshetoyee gubb andoo cuyee kexooch beehe. Ikke xumoona Gibitsena'o ‘no taatoo’i'ibeeti Farooni oogeto biin keqqichiti gutte gumina'on beegiye. Bi mikkirechina'oochee koniyona ebi gummochi biishon imoo hakkaanena'one.

Yeeri Yoseefich gumon biichi hakkoon immitone; ebich Farooni Yoseefin cuyee kexooche bi waan deebiihee. Yoseefi gumon biichii'i ishichiye. “Yeeri oogeti miyo tunemmi shabaatte naton deejjiyemmone. Ebichi hilloochoo shabaatte nati shaacoon deejjiyemmone” iye.

Farooni Yoseefi mooyona oogeton worganehe, Gibitse showoo bullich bi hillooch guttinnee asho tunii'i ukuriihe.

Yoseefi shabaate gaawe maayi natooba wodde maayoon gotooch boonoshi kicemmon asheena'oyich gettiye. Shabaate shaacee nato waahoba Yoseefi gotooche maayoon kichii bi kemmitoyich bedditi manjjemmi maayoon daneheete.

Shaacoo Gibitse showooch baach tuneyaanoon, Yaaqobinaa bi kechi asheena'ona beeti Kanaane showoochoo kuppheto tunehe.

Yaaqobi bi bushiisheena'on maayoon bonooshi kemmemoyich Gibits daachiihe. Yoseefi maneena'o maayee kemoyich hammii'i Yoseefi aafooch boonoshi neexehoba Yoseefin ariyaanena'one. Tunebaani Yoseefi boonoshin ariitone.

Yoseefi bi maneena'on pphiree bi beegitoye gubb, boonoshi gaboon shadditina'o gaata ciinoyich ishichiye: "Shattaahote! Ta, ittoshi mano Yoseefi taane; ittoshi ta toommooch gondoon gabii'i guuchittinoyich taan kemmiyote; tunebaani Yeeri ebin de'e mooyooch shadditone. Andoo shattaahote! Waareesho Gibits showooch kotebote. Ittoshinaa ittoshi bushiisheena'onoyich qaawiibeeti mooyo bullin immemmo taane".

Yoseefi maneena'o boonoshi showooch wottee'i, Yoseefi Gibitsee showooch kashoona beemon boonoshi nihoo Yaaqobich boonoshi getihoba Yaaqobi emiriye.

Yaaqobi geene asho bi tunetaanona bi kechi ashoona tookki Gibitse showooch hammii arooch koteheete. Yaaqobi bi qitoyee shiichii'i bi bushiisheena'o bullin boonoshi ikkiikkoon diriye.

Yeeri Abrahamich bi giyiti wogee gibenikko Yisaaqi waan beshehe. Arooche Yaaqobi waan, bi hillooch aaraa gutte Yaaqobi bushiisheena'onaa boonoshi kechi asheena'ona waan beshehe. Aaraa gutte bushiisheena'ochi yareena'o aaraa gutte Isra'eele yoodena'o tuneheete.