50. Yesuusi Wottemmone

2000 natooch beddaaha showee tookk beeti asheena'o bulli Masiihi Yesuusichon gettiibeeti mishiraachoon waayeebee beetina'one. Baareekexiyoo diccaabee and beddetine. Yesuusi yemeene ciirooch wottemmo bi tuneechon gibenikko immitone. Batt wotteyaano bi tunetaanoona bi gibenikkoon quyehe.

Yesuusi wottoon quyaa no bee goor, Yeeri yaafeetonaa biin oogiibeeti bemona no beeyemmon qaawiye. Wotta bi taatittinneechon bareena'oyich no gettemmon qaawiye. Yesuusi showee tookk bi bee goor, “Bi dabbeena'o Yeerichi taatittinee mishiraachee qaaron showee toommo bulliich gettemmina'one; arooba yemeenee ciiro woyemmone” itone.

Meeti ashi yareena'o andoo Yesuusichon waayeyaanena'one. Yesuusi shimaayooch bi wottoye shiichii'i, kittinneena'o mishiraachee qaaron ciroona waayeyaanena'oyich boonoshi bechemmon gettitone. Yesuusi, “Illa tiyiree hambote! Aagateena'o bulliich beetina'on ta dabbeena'on tuniibote!” “qeco woddoone!” itone.

Wotta Yesuusi ishichiye, “Guuno bi doonoyee beshaanoone. Hini showee ukkureena'o taan boonoshi shixxitoommon, ta naboona ittoshin du'ii wuxiyemmiina'one. Hini showee toommeexi asheena'o ittoshin du'iiyemmina'one; tunebani kupphabote! Ta hini shoween hajjiibeeti sheexaanoon kochaa wochito taane. Tunetaa mulloon ta toommooch too'iyaa'a ciirooch beddaahaa manjjaa ittoshi kupphe gaata ittoshin Yeeri wodiyemmone!”

Yesuusi yemeene ciiro bi tunehoba, ashi toommooch shaggemmi moyoon gallii bekiyoyich bi dabbeena'oyich ikke kiinoon gettiye. Ikke gochecho bi goyooch gaawe yaroon shookkiye. Tokketee'i bi beetaa bi kaaracho waa'i tepphee daggooch dadaddoon shookkichii hammiye.

“Teepphoo collee bi dicihoba goyee doonjjoyichi shuunechina'o waa'i, ‘Doonocho! De'e yaroon shoohaano neene? Dadaddochi amoochee waahe?’i'i echeheete. Biyoo, ‘Ta kaarachone shookkito’” iye.

“Bi shuunechina'o ‘And hamiree waaxi no bayon qaawaabeetine?’ iyeete. Tunetaa teepphee Doono wochi'i, ‘Dadaddoon waaxii ittoshi beetaa teepphoo tookki waaxemmone; qayote! qecci goorooba qeccechina'on dadaddoon shiichiree macibote! Qiriree qaaqqoona michibote! Teepphoon wotta ta gotooch gedote gettemmo taane’ i'i gettiye” iye.

Bi dabbeena'o ebi shaahiyoo boonoshich gimo qajjiye, ebich galli bi arichiyeemmon Yesuusin echeheete. Yesuusiyoo ishichiye, “Gaawe yaroon shookkito Masiihine. Goyo wotta hini showeene. Gaawe yaroo Yeeri taatittinne asheena'one.”

“Dadaddoo gondoyichi naayina'o tuneti asheena'one. Dadaddoon shookkiti kaarechi Daabiloosine. Maaye qecoo ciire yemeenon bekkiihe, qeccechina'o wotta Yeerichi maraakeena'one.”

“Yemeene ciirooba, maraakeena'o daabiloosichi naayina'o tuneti asheena'o bullin ikke xaa'ooch kiciree bobibeeti qaaqqooch duppemmina'one, boonoshiyoo aroochaa cookkemmina'one, boonoshi gashoonoo qaacheemmina'one. Arooba cadiqeena'o boonoshi nihoochi taatittinnoochaa aaboyichoommon bekkemmina'one.”

Wotta yemeene ciiroye aaf Yesuusi showooch bi wottemmonoo gettiye. Bi hammiti yawoona wotte woyemmone, ebiyoo bekkeebeeti achoona shimaajji quboona wotte woyemmone. Yesuusi bi wottehoba qititi kittinnoo bulli tiyiree Yesuusina gumoochaa danemmone.

Arooba batt kashoona beeti kittinnena'o, shimaajji gumooch shotteere qitoochee tiiti bare kittineena'ona xa'eyeemmina'one. Aroochaa boonoshi bulli Yesuusina tookki tunemmina'one. Arooye gubb Yesuusi bi asheena'ona tookki hullimalli tato tuneti digoonaa ikkittinoona bulli yemeenooch beyeemmone.

Yesuusi mulloon bi toomooch too'iibeetina'o bullich gubbichoon immoyich gibeniko immitone. Boonoshiyoo bulli yemeenoyich hullimalli tato tuneti diggoona beeyemmina'one, taatesho gettemmina'one.

Tunebaani Yeeri mulloon Yesuusi toommooch too'iyaanena'o bulli toommooch nalliyemmone. Bulli yemeenoon boonoshi eeppemmonaa gashoon boonoshi qaachemmi shiwerooch boonoshin duppeemmone. Ciroona tahaani qaaqqoo boonoshin mechemmone, hipperoo ciroona kuxaanoon boonoshin maayemmone.

Yesuusi bi wottehoba Sheexaanoonaa bi taatittino bullin aalliyeemmone. Sheexaanoon, Yeerin qajjiichii biich de'a iyiti asheena'ona tookki bulli yemeenoyich shiwerooch duppemmone.

Addaaminaa Hewaanina Yeerich de'a geto boonoshi qayonaa axaaxoon showee tookk boonoshi deebonoyich, Yeeri shoween uppii'i aalliyoyichoo kuxiye. Tunebaani ikke aaboon Yeeri hullimalli tato tunemmi andire shimaayoonaa andire showoonon halliyemmone.

Yesuusinaa bi asheena'ona ebi andire showooch beeyemmina'one, beeto bulli toommoochoo bulli yemeenoon taatemmina'one. Aro acimo bullin hidiyemmone, ebiye bekk xuuxo, ayinoo, eefo, gondo, biiyo, oohe qito beetaachemmone. Yesuusi bi taatittinoon diggoonaa iberoona qeejjiyemmone, bulli yemeenoyichoo bi asheena'ona tookki tunemmone.