49. Andire Yeerichi Wogo

Ikke maraakoo Mariyami getteeti gidiireech Yeerichi bushoon shiyemmi bi tunoon gettiye. Ebich aree batt gidiiree beechaa anaami bushoon shiyaa'a bi shigoon Yesuusi iya shigiihan. Ebich Yesuusi ashoonoo Nuggushoono tunehe.

Yesuusi aroo Nuggushoo bi tunoon xiishiimmi meeti woriganikkiti mooyina'on tuniitone. Aachi toommona hammite, aachi aayon cikkayite, meeti biiyechina'on iiwiite, yinneena'on ashi toommoochee yokkite, qititina'on tiijjite, wotta uuche koshonaa gutte haashoonon 5000'ye beshe asheena'oyich maanjjite.

Wotta Yesuusi oogeti dojjechone, Yeeri bushoo bi tunetochoo hakkoona yibbaatetone.

Aroo, ittoshi gijjoonaa bare mooyo bullinon ittoshi shunnii beetommon Yeerin shuno ittoshich qaawiihe i'i dojjiye.

Yesuusi Yeeri taatittine showee tookk beeti mooyo bulliye oogeene iye. Konichona bulliye beshoo qaawiibeeti mooyo Yeerichi taatittinee gogecho tunoone. Yeeri taatittinooch gimoch ittoshi axaaxoochee wodoo ittoshich qaawiihe.

Yesuusi ikkiikke asheena'o bi waan woteree boonoshi wodemmonaa bareena'o wotta wotteyaacheemina'o boonoshi tunoon dojjiyee. Ikkiikke asheena'o qeemi showoommina'one iye. Yesuusichi mishiraachoon deqqii'i wodiyeete. Bare asheena'o Yeeri qaaro gimo hakkaani, gommi gasheexi xaqqe showoommina'one. Eboshi Yesuusichon getteebeeti mishiraachee wochoon de'aanena'onaa Yeerichi taatittinooch giyaanena'one.

Yesuusi Yeeri axaaxechina'on oogichi bi shunon dojjiye. Eboshin maaroonaa bi bushiisheena'o tuniyoonoch qaawiye.

Wotta Yesuusi Yeeri axaaxoon bi shixon nooch gettite. Addaaminaa Hewaanina axaaxoo boonoshi shuunehoba, ebi axaaxoo boonoshi yaroo bullin qaaqqitone. Ebich showee tookk beeti ashoo bulli axaaxoon shuunehe, Yeeri waaneeno wokkiye. Ebich bulli asho Yeerina shixecho tunetone.

Tunebaani Yeeri showee toommooch beeti asheena'on oogichii bi shunnitoyich ikke bi Bushoon immiye; hini ikke bi Bushoon bi immito, mulloon bi toommooch too'ii beeto bulli, bulli yemeenee kashoon bi danemmonaa shiweree qaaqqooch bi giyaachemmonoyichiye.

Ittoshi axaaxee naboona xuqqito ittoshi tunetoyich ittoshi qitoo tatoone. Yeeri ittoshin kaari beddiye, tunebaani bi kaaroon ittoshi toommooch woniyo qajjiichi Yesuusi toommooch woniihe. Yesuusi masqale toommooch bi qitihoba ittoshi naxoon deqqiye.

Yesuusi cir axaaxoon shuune ariyaanoone, tunebaani ittoshi axaaxoonaa showee tookk beeti asho bi ikkiikkoochi axaaxoonon echiyooyich naxoon mi'onaa ciroona deejjo tunoonoyich shunni'i daagiye. Yesuusi bi qelloon bi deejjitoyich, Yeeri axaaxoo taane ito bullin, gonde axaaxoona tune gaata maaroo hakkiye.

De'e shuuneena'o ittoshin wodiyoo hakkaacheete. Yeerina ittoshi mashaameemmon tuniyo ittoshi hakkemmi mooyo amoona aalloone. Ittoshi axaaxoon mayo hakkemmo Yesuusi baachiye. Yesuusi Yeeri bushoo bi tunoon, ittoshi keroon masqale toommooch bi qitoon, Yeeriyoo biin qitoochee tiijjoon mulloona too'iyoo baach ittoshin qaawiihe.

Yeeri bi mulloon Yesuusi toommooch too'ii beetonaa Yesuusin bi doono tuniibeeti asho koninona wodiihe. Gaannecho tunebot oohe girecho tunebot, anaamo tunebot oohe maache tunebot, geeno tunebot oohe gurimaashoo tunebot, oohe aabiichona beebot ebi iritaanoone. Yeeri biina manjje mashaamoo ittoshich bi tunemmoyich Yesuusi toommooch mulloon ittoshi too'iyemmon qaawiye.

Yesuusi Ittoshi mulloon ittoshi too'iyemmonaa afaalleyeemmonon ataallii beetone. Yesuusi Masiiho, Yeerich mixxe bi bushoo tunooon iberiihote? Axaaxecho ittoshi tunoonaa Yeeri ittoshin bi naxo tato tunoon iberiibeetote? Yesuusi ittoshi axaaxoon aalliyooyich masqale toommoochaa bi qitoon iberiibeetote?

Yesuusinaa aroo ittoshich bi shuuneti shuunoona toommooch mulloon ittoshi too'iito gaata kittinnoo ittoshine! Yeeri Sheexaanoonaa manderee bi taatittinoonoochee kichii'i Bi bekkee taatittinnooch ittoshin gedditone getone. Yeeri geenetoonaa axaaxechi ittoshi gommon aalliichii andirooonaa cadiqe gommon ittoshich immitone.

Ittoshi kittinno ittoshine, Yesuusi shuuneti shuunee naboona Yeeri ittoshi axaaxoon maaritone. And Yeeri ittoshin bi ciinnii beeto katini bi xiboo tunii'iinani shixecho tunii'ii toonone.

Yeerichi xiboonaa Doono Yesuusichi maddechina'ona ittoshi tune gaata, Yesuusi dojjiibeeton de'a gettii waayehote. Kittinnoo ittoshi tunetaanoona, andoo axaaxoon shuunoyich dakiyote. Tunebaani Yeeri gibeneeto bi tunetoyich ittoshi axaaxoon ittoshi aanni gaata maariye. Axaaxoon ittoshi wochemmi giidoon ittoshich immiye.

Yeeri ittoshi corootemmon, bi qaaroon ittoshi doyiyemmon, bare kittinneena'ona tookki Yeerich ittoshi goyinnemmon, ittoshich bi tuniitonoo bareena'oyich ittoshi gettemmon qaawiye. Ebosh mooyina'o bulli biinnaa ittoshina daggooch kupphe yeshoon halliyeete.