34. Yesuusi Bare Shahiyeena'on Dojjiye

Yesuusi Yeeri taateechon bare meeti shaahiyeena'on dojjiye. Ishichiino iye, “Shimaajji taatittine ebiyoommine; asho bi goyooch shookkiti shanaafee aafoon shaahiyaane. Aree bare maayi yaroo bulliyee giishecheene.”

“tunebaani shanaafee mixi bi dicihoba shimaayoona yoobbiibeeti kafeena'o waa'i bi atooch kotoon boonoshi hakkimmi wottoon daaddeexi maayeena'o bulliye beshe tunehane”.

Yesuusi bare shaahiyoon ishichii gettiye:- “Shimaajji taatittine ikke ure bukoo tiyimmi wottoon daamma'a keejje qunnee buddinoona tookkaa xiriqqaa'a bi kotiiti bukee shittoon shaahiyaane”.

“Wotta shimaajji taatittine ikke uro goyee daggoochee bi daneti aacheeti aaxxe qiicoommine. Bare uro ebi qiicoon danee'i wochii aachiye. Emiroona qitiibee hammii biich beeto bullin kemmi'i are goyoon kemehe.

“Wotta shimaajji taatittine ikke giixecho kemeya qaawiti aaxxe gatiyechi macacikkiti inqoon shaahiyaane. Inqee giixecho bi danehoba hammii biich beeto bullin kemmi'i hini are inqoon kemehe.”

Arooye gubb Yesuusi boonoshi de'e shuunoona yebanee bareena'on hoxeebeeti asheena'ochi mooyon gettiye. “Gutte asheena'o corootiya Yaafee Kexooch hammiyeete. Boonoshiyoo ikkoo Farisoo, ikkoo gabiyee guudoone” iye.

“Farisoo Yaafee Kexooch neexeechii ishichi'i corootiye; ‘Yeero! Bare asho bullichoommon, boggecho, xumme moochechonaa shuni maayechona, oohee hini gabiyee guudoommonoo tuno ta qajjetoyich, neen galletehoye.”

“Shabaattee daggooch gutte wottoon coomaa beeto taane; ta danaa beeto bulliichee aashire kishoochee ikke kishoon neech kichaa beeto taane”i'i corootiye.

“Wotta hini are gabiyee guudo Yaafee Kexooch neexeebeetina'oyee wohooch neexehe. Bi aafoon kaama tiijji'i shimaajj ciinaanoone. Tunebaani bi getoon qicciibee, ‘Yeero! Axaaxechi taan maaribe!’ iibee Yeerin qollehe.”

Aroochee Yesuusi ishichiye, “Iberoon ittoshich gettooye, Yeeri ohe gabiyee guudochi corootoon waayee'i cadiqo neene iye. Faarisoochi Corootoon shunaanoone. Yeeri bi qelloon oogii beeto bullin giishiihe; bi qelloon giishii beeto bullin oogiihe”.