33. Gochechochi Kiino

Ikke areddon Yesuusi bahare gashooch neexee'i meeti asheena'on dojjii beehe. Bi dojjii bee gor dofee asheena'o bi waan kiceetaa xaa'o xebbetoyich, xaa'oo danoyichi'i aachi gashooch beeti marikabooch kechii koteechii dojjiye.

Yesuusi ebi shaahiyoon gettiye. “Yaree shookkecho shookka kechiye. Shookkii bi beetaa, ikkiikkoo gomi gashooch holliye. Ebinoo kafeena'o waa macii maaheete.

“Baroo maacaa xaqqechi showooch holliye, tunebaani cammon wokkii awuro mawiihe. Aabe kechaa'a michimmona shoollii shuuqqiye.

“Andoo baroo wotta angichi xuppo beetooch holliye. Aroochaa colloo yechiye, tunebaani are angichi xuppoo nocii kechi'i maahe. Ebich angichi daggooch colleto aafo amoonona immaano echehe.

“Baroo wotta qeemi showooch holliye. Ebi yaroo collee diccii kechi'inoo ikkoo 30 aafoon, ikkoo 60 aafoon, ikkoo 100 aafoon aafehe. Waayeebeeti waajjecho waayebe” iye.

Ebi shaahiyoo bi dabbeena'oyich giyemmon mawiyee. Ebich yesuusi ishichii'i birii arichiihe, “yaroo Yeerichi qaaroone. Gommi gashooch holliti yaroommo geto, Yeerichi qaaroon waayee beeti ashoone, tunebaani ebi qaaroon shalligaanoone, Daabiloosi waa'i bi mulloochee macii bi daammiti ashoone.

“Wotta maacaa xaqqechi showooch holliti yaroommo geto, Yeerichi qaaroon waaye'i bekkech emiroona deqqi beeti ashoone. Tunebaani, iritoo oohe xuuxo bi toommooch shagihoba, mullee bi too'iyoon qajjii beetone.

“Angichi xuppo beeti showooch holliti yaroommi asho geto, Yeerichi qaaroon waayee beetone. Tunebaani gubb, hini showee beemi gaboo, gaannoonaa mashaamiti beemona biich beeti shunoon kechii shuyochoommon maahe. Ebich bi waayeti qaaro aafoon aafeyaano getone.”

“Wotta qeemi showooch holliti yaroommo geto, ibere gaawe mulloona Yeerichi qaaroon waaye'i ceechii beetonaa aafoon aafeebeetona getone”.