31. Yesuusi Baharee Aachi Toommona Sha'o

Arooche Yesuusi bi dabbeena'oyich ishichiye:- “Asheena'on ta deennemmi wottoon marikabooch giyiree baqach tayee shiichiree kimbote!”i'i gettiye. Yesuusi asheena'o bullin bi deennitoyee gubb, corootiya bi ikkeeto geppooch kechiye. Aroochaa xumi gutte qellimooch beddaaha corootiye.

Ebiyooba Yesuusi bi dabbeena'oo marikaboona hammii beeheete. Xumi guttee qellimooch boonoshi shaggito qach bede gommoch baachiye. Arooba giidechi yongo marikaboyee aafaa tiyitoch, marikaboon boonoshi gasheto kupphe iritoonane.

Are goor Yesuusi bi corootoon ciichii'i bi dabbeena'o waan hammiye. Baharee aachi toommona sha'eebee baharoon kuxii'i bi dabbeena'ochi marikabooch hammiye!

Dabbeena'o Yesuusin boonoshi ciinihoba oogeton shattiyeete, ebiyo yoogoon ciinnitina'o boonoshich bi shaahitochiye. Yesuusi boonoshi shaton arii'i boonoshi waan ceeggii'i “Kupphebote! Taane; shattaahote!” iye.

Arooba Pheexiroosi tiyi'i, “Ta Doonocho! Ne gaata, aachi toommona sha'aree ne waan ta woyemmoyich gete!” iye. Yesuusiyoo “Wobe!” iye.

Ebich Pheexiroosi marikaboochee kindi'i aachi toommona sha'eebee Yesuus waan hammiye. Tunebaani giishechoon bi hammitoye gubb bi aafoon Yesuusi waane wochii'i aachi aayon ciinni, giidechi yongoono waayehe.

Ebiyooba Pheexiroosi bi shattitoyich aaco biin qooxxon yechiye. “Ta Doonocho! Taan wodiibe!”i'i cookiye. Yesuusi bekkech bi kishoon yaggii'i Pheexiroosin yechiye. Aroochee, “Hini ne mulloon ta toommooch too'iyaanoocho! Ne mulloon amoyich guttiine?” iye.

Pheexiroosinaa Yesuusina marikabe maac boonoshi giihoba, yongoo bekkech qajjii circikkiihe. Dabbeena'o woriganee'i “Iberoon Yeerichi Bushoo neene”i'i Yesuusich yittii goyinneheete.