18. विभाजित राज्य

दाऊद राजै चाळीया साला तिकर शासन करू | फिरी सो मरी गो, अतै तसेरै पुत्र सुलैमानै इस्रायल पुर शासन करना शुरू करू | प्रमात्मै सुलैमान सोगी गल करी अतै तैस थऊँ पुछु कि सो सबीथऊँ ज्यादा कै चांहन्दा हा कि प्रमात्मा तैस ताई करा | सुलैमानै प्रमात्मै थऊँ मंगू कि सो तैसियो बड़ा बुद्धिमान बणाई देया | एसै गलै प्रमात्मै जो खुश करू, ठेरै ताई प्रमात्मै सुलैमान जो संसार रा सबी थऊँ बुद्धिमान मड़द बणाण दित्ता | सुलैमानै मती गल्ला जो सिखु अतै सो अक्क बुद्धिमान शासक थू | प्रमात्मै तैसियो बड़ा आमिर भी बणाई दितुरा थू |

यरूशलेम मंज सुलैमानै तैस मंदरा जो बणाऊ जैस ताई तसेरै पितै योजना बणाई थी | अतै समाना जो कठेरु | अबै मणु मिलाप वाळै तम्बू रै बजाय मंदरा मंज प्रमात्मै री आराधना करंदै थीयै अतै तैस ताई बलि चड़ान्दै थीयै |प्रमात्मै इचिकरी मंदरा मंज मोजूद रैहन्दा थू, अतै तैठी सो अपणै मणु सोगी वास करन्दा थू |

अपर सुलैमानै दुयै देशा री जनानी सितै प्यार करू | तिनी मति जिनी, लगभग 1,000 जनानी सितै बैह करीके प्रमात्मै री अवज्ञा करी! इन्या मंज मति जिनी जनानी पराय देशा थऊँ छुरी थी अतै अप्पू सोगी अपणै देवतै जो अन्दुरा थू अतै तयांरी पूजा करना जारी रखु | जैहणै सुलैमान बुडा भूची गो ता तिनी भी तयांरै देवतै री पूजा करी |

एसा बजह थऊँ प्रमात्मा सुलैमान थऊँ जळू | तिनी बल्लू कि सो इस्रायल देशा जो दूँ राज्य मंज बंडी दिणै रै दुआरा तैसियो दंड दिल्ला | सो सुलैमान रै मरनै रै बाद एसा करना ||

सुलैमान रै मरनै थऊँ बाद, रहबाम राजा बणी गो | इस्रायल देश रै सब मणु तैसियो अपणै राजा रै रूपा मंज स्वीकार करनै ताई अक्क सोगो किठीयै | तिन्यै रहबाम सोगी शकायत करी कि सुलैमानै तिन्या थऊँ बड़ा कठण मेहनत करवाई थी अतै मतै सारै कर वसूलै थीयै | तिन्यै रहबाम सोगी विनती करी कि तिन्या थऊँ थोड़ा कम करवान |

अपर रहबामै तिन्या जो बड़ी ही मुर्खता सोगी जबाब दित्ता, “तुहै बलदै हिन् कि मेरै पितै सुलैमानै तुसू थऊँ बड़ी मेहनत करवाई | पर मुं तुसू थऊँ तैस थऊँ भी ज्यादा कठण कम करवाणा, अतै मुं तुसियो तैस थऊँ भी ज्यादा पीड़ित करना |”

जैहणै मणुयै तैसियो इन्या बलदै हुणु ता तिन्या मंज कईयै तसेरै बरुद्ध बलवा करू | दस गोत्रै तैसियो छडी दित्ता; तैस सोगी अबै केवल दोई गोत्र ही बचै | इन्या दूँ गोत्रै अप्पू जो यहूदा रा राज्य बल्लू |

बाकी रै दस गोत्रै यारोबाम नां रै अक्की मड़दा जो अपणा राज बणाई लेऊ | ऐ गोत्र देशा रै उत्तर-पूर्बी भाग मंज थीयै | तिन्यै अप्पू जो इस्रायल रा राज्य बल्लू |

अपर यारोबामै प्रमात्मै रै वरुद्ध बलवा करू अतै मणु थऊँ पाप करवाऊ | तिनी अपणै मणु रै दोआरा उपासना करनै ताई दूँ मूर्ति जो बणाऊ | सो अबै युह्दा रै राज्य मंज यरूशलेम मंज प्रमात्मै रै मंदरा मंज तसेरी आराधना करनै ताई ना गै |

यहूदा अतै इस्रायल रै राज्य दुशमण बणी गै अतै अक्सर अक्की दुयै रै वरुद्ध लड़ना लगै

इस्रायल रै नोयै राज्य मंज, सब राजै बुरै थीयै | इन्या मंज थऊँ कई राजा तयांरी जगह पुर राजा बणनै री चाह रखणै वाळै होर इस्रायली रै दुआरा मारै गै थीयै |

इस्रायल राज्य रै सबी ही राजै अतै ज्यादातर मणुयै मूर्ति टर्र पूजा करी | जैहणै तिन्यै एसा करू, ता सो अक्सर वेश्या सोगी सोयै अतै ऐठी तक कि कई बरी मूर्ति रै अग्गै बच्चै जो बलि भी करू |

1 राजा अध्याय 1-6; 11-12 से एक बाइबल की कहानी