17. दाऊद सोगी प्रमात्मै री वाचा

शाऊल इस्रायल रा पैहला राजा थू | सो लम्बा अतै छैळ थू, जिंया सो मणु चाहन्दै थीयै अकदम तिना | इस्रायल पुर अपणै शासन रै पैहलै कुछ साला मंज शाऊल अक्क अच्छा राजा थू | पर बादा मंज सो अक्क बुरा मणु बणी गो जिनी प्रमात्मै री गल्ला जो ना मन्नू, ठेरैताई प्रमात्मै अक्क होरी मणु जो चुणु जेड़ा कि अक्क धैड़ै तसेरी जगह पुर राजा बणना |

प्रमात्मै दाऊद रै नां अक्क जोआन इस्रायली मड़दा जो चुणी करी अक्क धैड़ा शाऊल री जगहपुर राजा बणाणै ताई तेयार करना शुरू करू | दाऊद बैतलहम नगर रा अक्क पाअल थू |कई टैमा पुर, दाऊदै शेरा अतै भालू धुनी जो मारी दित्ता थू क्योकि दाऊद दुआरा रखवाली करंदै टैमै तसेरै पितै री भैड़ा पुर तिन्यै हमला करू थू | दाऊद अक्क नर्म अतै धर्मी मणु थू | तिनी प्रमात्मै पुर भरोसा करू अतै तसेरी गल्ला जो मन्नू थू |

जैहणै दाऊद अल्ली जोआन मड़ दही थू, तिनी लम्बै-चोड़ै गोलियत रै वरुद्ध गुळाटी करी | गोलियत अक्क बड़ा अच्छा सपाई थू | सो बड़ा मजबूत अतै लगभग त्राई मीटर लम्बा थू! पर प्रमात्मै गोलियत जो मारनै अतै इस्रायल जो बचाणै मंज दाऊद री मदद करी | ठेरै बाद, दाऊदै इस्रायल रै दुशमणा पुर कई बरी जीत हासल करी | दाऊद अक्क बड्डा सपाई बणी गो, अतै तिनी मत्ती लड़ाई मंज इस्रायली सेना री अगुवाई करी | मणुयै तसेरी बड़ी तारीफ करी |

मणुयै दाऊद सितै एतना प्यार करू कि शाऊल तैस थऊँ जळना लगा | आखिरकार शाऊल तैसियो मारी दीणा चाहन्दा थू, ठेरैताई दाऊद तैस थऊँ अतै तसेरै सपाई थऊँ लुकणै ताई बणा मंज नहीं गो | अक्क धैड़ा, जैहणै शाऊल अतै तसेरै सपाई दाऊद री खोज मंज थीयै ता शाऊल अक्की गुफा मंज गो | ऐ सो ही गुफा थी जैत मंज दाऊद लुकुरा थू, पर शाऊलै सो ना हेरू | दाऊद शाऊल रै पचुं तसेरै बड़ै नेड़ै चली गो अतै तसेरै ओडणा थऊँ अक्क टुकडा कट्टी लेऊ | बादा मंज, जैहणै शाऊल तैसा गुफा थऊँ निकळू ता दाऊदै तैसियो हाक पाई करी तैस पकुड़ूरै ओडणा रै टुकडै जो दस्सू | एसा रीति सितै शाऊल जाणी गो कि दाऊदै राजा बणनै ताई तैसियो मारनै थऊँ ना करी दित्ती हा |

कुछ टैमा रै बाद, शाऊल युद्ध मंज मरी गो, अतै दाऊद इस्रायल रा राजा बणी गो | सो अक्क खरा राजा थू, अतै मणुयै तैद थऊँ आस रखी | प्रमात्मै दाऊद जो आशीषित करू अतै तैसीयो सफल बणाऊ | दाऊदै कई लड़ाई लड़ी, अतै प्रमात्मै इस्रायल रै दुशमणा जो हराणै मंज तसेरी मदद करी | दाऊदै यरूशलेम नगर जो जीती करी तैसियो अपणी राजधानी बणाऊ, जैठी सो रेऊ अतै शासन करू | दाऊद चाळीया साला तिकर राजा रेऊ | एस टैमा रै दोरान, इस्रायल सामर्थी अतै धनवान बणी गो |

दाऊद अक्क मंदिर बणाणा चाहन्दा थू जैठी सब इस्रायली प्रमात्मै री आराधना करी सकन | लगभग 400 साला थऊँ, सो मणु मूसा रै बणाऊरै मिलाप वाळै तम्बू मंज प्रमात्मै री आराधना करू करदैं थीयै अतै तसेरै ताई बलिदान चड़ाऊ करदै थीयै |

पर तैठी नातान नां रा अक्क भविष्यवक्ता थू | प्रमात्मै तैसियो दाऊद सितै एह बलनै जो भैजू: “तेई मतैयुद्ध लड़ै हिन्, ठेरैताई तू मेरै ताई एस मंदरा जो ना बणला | तेरा पुत्र ऐतियो बणला | ताभी,अऊँ तीजो बहूतायत सितै आशीषित करला | तेरा अक्क वंशज सदा ताई मेरै मणु पुर राजा रै रूपा मंज शासन करला |” सदा ताई शासन करनै वाळा सो दाऊद रा अकमात्र वंशज मसीह थू | मसीह प्रमात्मै रा चुणुरा जन थू जेड़ा संसार रै मणु जो तयांरै पापा थऊँ बचाणा |

जैहड़ै दाऊदै नातान रै सन्देश जो हुणु ता तिनी प्रमात्मै रा धन्यवाद करू अतै तसेरी स्तुति करी | प्रमात्मा तसेरी प्रतिष्ठा जो बड़ाऊ करदा थू अतै तैसियो मती साड़ी आशीषा दिछु करदा थू | वेशक, दाऊद ना जाणदा थू कि 1000 साल तिकर मसीह री ईणै री भाळ करना पैणी हा |

दाऊदै कई साला तिकर न्याय सितै अपणै मणु पुर शासन करू | तिनी बदी इमानदारी सितै प्रमात्मै री गल्ला जो मन्नू अतै प्रमात्मै तैसियो आशीष करू | हालांकि, अपणै जीवन रै अंत मंज तिनी प्रमात्मै रै वरुद्ध भयानक पाप करू थू |

अक्क धैड़ा दाऊदै अपणै मैहल थऊँ बाहर टेक्कु अतै अक्क छैळ जनानी जो नेईन्दै हेरू | सो तैसायो ना जाणदा थू, पर तिनी पता करी लेऊ कि तसारा नां बतशेबा थू |

अपणी नजरी जो फेरी लैणै रै बजाय, दाऊदै तैसायो अप्पू बलै लेईणै जो कसी जो भैजू | सो तैसा सोगी सोऊ अतै तैसा जो वापस घरा जो भैजी दित्ता | थोड़ै टैमा बाद बतशेबै एह बल्ली करी दाऊद बल सन्देश भैज्जू कि सो गर्भवती हा |

बतशेबा रा लाड़ा ऊरिय्याह नां रा अक्क मणु थू | सो दाऊद रै उतम सपाई मंज अक्क थू | एस टैमै सो युद्ध करनै ताई सो बाहर गछुरा थू | दाऊदै ऊरिय्याह जो लड़ाई थऊँ वापस हैद्दी करी तैसियो अपणी लाड़ी सोगी रैहणै जो बल्लू | पर होर सपाई लड़ाई मंज थीयै ठेरैताई ऊरिय्याहै घरा जो गाणै थऊँ ना करी दिती | अत: दाऊदै ऊरिय्याह जो वापस लड़ाई मंज भैजी दित्ता अतै सेनापति सितै तैसियो लड़ाई मंज एसी जगह मंज रखणै जो बल्लू जैठी दुशमण सबी थऊ शक्तिशाली भोआ ताकि सो मरी गच्छा | ता एसा भुआ कि ऊरिय्याह लड़ाई मंज मरी गो |

ऊरिय्याह रै लड़ाई मंज मरी गाणै रै बाद दाऊदै बतशेबा सोगी बैह करी लेऊ | बादा मंज, तैहै दाऊद रै पुत्रा जो जन्म दित्ता | दाऊदै जेड़ा कुछ करू तैस थऊँ प्रमात्मा बड़ा जळू थू, ठेरै ताई तिनी नातान भविष्यवक्ता जो दाऊद जो एह दसणै ताई भैज्जू कि तसेरा पाप करना बुरा थू | दाऊदै अपणै पाप रा पश्चाताप करू अतै प्रमात्मै तैसियो माफ़ करी दिता | अपणै बचुरै जीवन मंज, अपणै कठण टैमा मंज भी दाऊद प्रमात्मै रै प्चुं-प्चुं चलू अतै तसेरी गल्ला जो मन्नू |

1 शमूएल अध्याय 10; 15-19; 24; 31; 2 शमूएल 5; 7; 11-12 से एक बाइबल की कहानी