9. ጾስዲ ሙሳ ጼጊዴ

ዮሴፊ ዓይቂኖፖ ዓኒ ኢ ዳባን ዎይ ጊብጻ ጋዳ ጋምኢዴ። ኢንታኬ ኢንታ ዜርን ዎይሊን ላይ ኢ ጋምኢዴ። ኢና ዎይሊን ናኣር ዬልዴ ኢንታሬ ኢሲራኤላን ጌይ ጼጊንቲዴ።

ጼታ ላይፖ ዓኒ ኢስሬላን ፓይዳ ዎይልሙታ ዬይዴ። ጊብጻ ጋዶ ኣሳንሬ ዮሴፋኬ ኢንታ ማዳንዳቦ ዎታዝ ባዛን ዎይ ቦቲዴ። ኢስሬላን ዎይሊሙታ ዬይኖ ኮታቦ ጊብጻ ኣሳን ኢንታብ ኢጪዴ። ይኮታቦ ይናኢዝ ኬልምባራ ጊብጻ ጋዲን ኣቂሲዛ ፋሮኒ ኢስሬላ ኣሳን ጊብጻ ጋዳ ኣሳንቦ ኣይላ ማሂዴ።

ጊብጻ ኣሳን ኢስሬላ ኣሳን ጊምባ ኦሳ ኦምፔን ካታሚን ዎይ ጊምባባር ኦምፔን ዎልቃባር ኢንታ ዋይሬ። ች ኦሳ ባራ ሼምፒን ሜቲንታፔን ዎቲዴ። ጾሲ ዎቲኒካሬ ኢንታ ኣንጂዴ ዎይሊን ናኣሬ ኢንታብ ዎ።

ፋሮኒ ኢስሬላንቦ ዎይሊን ኣቂሊ ናኢ ኢንታብ ዎን ቤቂዴ ይኮታቦ ፋሮኒ ኢስሬላ ኣሳን ኣቲና ናኣን ዬልንታምባራ ኣባያ ዋን ጋርታ ዡጊዳር ዎምፔን ዎርዣ ኪቲዴ።

ፔቲ ኢስሬላ ማጪንዳ ኣቲና ዬላዴ ኢዚኬ ኢዝ ኣስናዲኬ ዎልኣ ማቃር ፌብ ዳንዳኢንቲኖዲፌን ዎታር ናኣ ኣቺዴ።

ናኣ ዬልኖን ናኣ ኣቻንዳብ ዳንዳኣካዮ ኬልምባራ ናኣዳ ዋ ጋልዳ ኣፋ ፓላል ጌይዝ ዳቻ ጋርታ ጋዳሪ ኣባያዋን ቡጊድ ዎ ጎን ቲን ዎካይፌን ኢያ ፋንዳብ ጋር ዋን ጋልዳ ኢያ ሚሺ ኣሺዴ። ኢ ሚሺንዳ ማቃዝ ባዝን ቤቃንዳቦ ኡክ ቤሳ ጋልዳ ጎኣር ቤቃሬ።

ፋሮኒ ናኢን ማጪኒንዳ ዳች ቤቃራ ኢዝ ጋርታ ዎ ባዝን ቤቃዴ ናኣ ኣቂላ ቤቃራ ፌ ናኢፌን ማሃራ ኤካዴ። ኢዛሬ ናኣ ናጋምፔን ኢስሬላ ማጫ ቃጣራዴ። ኢዛ ቃጣርኖ ማጪንዳ ናኣ ዬልኖ ኢንድ ማቃኖን ኤርካዬ ናኣዲ ዲጫሪ ፌ ኢንዲ ኣምን ኣማዝን ኣሺኖፖ ዓኒ ኣሲንዳ ናኣዳ ፋሮና ናኢምቦ ማሃር ኢማዴ ኢ ሱምስ-ኢን «ሙሳ» ጌይ ጼጊዴ።

ሙስ ዲጪኖፖ ዓኒ ፔቲ ጋላስ ፔቲ ጊብጻ ጋዶ ናሳዲ ኢስሬላ ጋዶ ፔቲ ኣይላ ቡካምባራ ቤቂዴ ሙሳሬ ኢስሬላ ጋዶ ማዳንዳብ ኮይዴ።

ሙሶ ኦናካር ቤቃካዬ ጋር ጊብጻ ጋዶ ናሳ ዎር ዱኪዴ ዎቲናካር ሙስ ዎቲኖን ፔቲ ኣሲ ቤቂኒ።

ሙሶ ዎቲኖን ፋሮኒ ሲስካሪ ኢያ ዎንዳብ ኮይዴ። ሙሶ ዎቲናካር ፋሮና ፖሊሳን ጋላጋፖ ፌ ሼምፒን ቡቲሳንዳቦ ጊብጻፖ ኬስካሪ ባራሃ ጋርታ ዎጺ ሉኪዴ።

ጊብጻፖ ጎቲ ዎ ባራሃ ጋርታ ሙሶ ዶሪ ዬዝ ጋይጫ ናኢ ማቂዴ ኢና ጋዳፖ ማጫ ኤካሪ ናኣም ኣቲና ናኣን ዬልዴ።

ፔቲ ጋላስ ሙሶ ዶራን ናዝምባራ ታማ ኤይቲዝ ሻይዳ ቤቂዴ ማቂናካሬ ሻይዲን ሚጫካዬ ሙሳሬ ኮሽንቺ ቤቃንዳቦ ሻይዲንኮ ኡኪዴ ሚጫዝ ሻይዲንኮ ኢ ኡካምባራ ጾስ ቆዲ «ሙሶ ጌሻ ቤስ ጋልዳ ኔ ኤቂኔ ኔ ቶሂን ጋርታፖ ቻሚን ኬሳቤ» ጌይዴ።

ጾሳሬ ሙሳኮ «ቴ ዎርዣ ሜቲን ቴ ቤቂኔ ቴ ኔና ፋሮናኮ ሚሻሬ ኢስሬላን ጊብጻ ኣይልቲን ጋርታፖ ኬሳሬ። ኣብራማቦ ይሳቃቦ ኣቆባቦ ታስፋ ኢምኖ ካናና ሳዚን ኢንታብ ኢማንዳ።»

ዎርዣዲ ኔና ኦሚሼ ጋር ኦይጪጌን ቴ ኣብህ ጋኖ ጋር ጾሳ ኦይጪን ጾሳዳሬ ሙሳኮ «ታኒ ዎድኬ ዶኢዛዳ ይ ኮታቦ <ዎዲኬ ዶኢዛ> ታና ሚሽኔ ጋር ኢንታብ ሶላቤ» ጌይዴ።

ሙሶ ኢጪኖ ኮታቦ ፋሮናክ ሉካንዳብ ኮያካዬ። ኣባ ጌይን ሶላንዳብ ዳንዳኣባሴ ይዝጋር ቆፒኖንኮታቦ ይኮታቦ ጾሲ ሙሳ ጌዳ ኣሮና ኢባር ዎልኣ ሉካር ሙሳ ማዳምፔን ሚሽዴ። ጾሳዳሬ ሙስኮ ኣሮና ፋሮኒ ዎርዣዳ ኣሻብዳ ጋር ፌ ብዳ ሚንንዳብ ዳንዳኣዝን ኢንታብ ሶልኔ።