49. ኦራን ጾሳ ጫቃ ቃላ

ፔታኒን ማልካ ማራሚ ጋዚን ዉዲርዶር ጾሳ ናኣ ዬላዚን ኢዝብ ሶልዴ። ዪኮታቦ ኢዛ ቢርቲ ዉዲር ዳራ ኣቲና ዬላዴ ኢሱምዳሬ ዬሱሳ ጌያ ጋዳዴ ዪኮታቦ ዬሱሲ ጾስኬ ማ ኣሴ።

ዬሱሲ ጾሳ ማቂኖን ኤርሳዚንዳ ዎይሊን ታምራታ ኦኔ ዋ ጋልዳ ዬኔ ዉርጊ ዚክ ዎቲ ኤሲኒ ዎይልን ማኖን ፋኒ ኢታ ኣያና ኬሲኔ ዓይቂኖ ኣስ ዲንኔ ዪፖሬ ኢሺን ሙኩላ ኣሳን ኢሺን ኡፋኬ ናምኢ ጊልግ ጊልግ ሞላ ?ሙሲ ሚሲካምፔን ዎቲዴ።

ማ ዬሱሲ ጴች ኣስታማሪዬ ጾሳ ናኢ ማቂኖ ኮታቦ ኢጫካይ ሶልዴ። ዪንቲ ዪንታ ካዝንዲፌን ሜላን ኣሳን ካብቴ ጋር ታማርሲዴ።

ማ ኢ ዪንታ ቆልንንባር ጉጂን ኣባካር ማቂን ዪንታ ዶሳዝን ዲፌን ጾሳ ዶሳንዳብ ኮሽሬ ጋር ታማርሲዴ።

ዬሱሲ ጾሳ ካቲቲንዳ ሳዛ ጋልዳ ዎ ኣባኪፌኖ ባዛፖ ሺ ቦንቺንቲ ኔ ጌይዴ ኦናካር ኣሲ ዎይልን ኮሺዝ ባዚ ጾሳ ካቲቲ ባር ማቃዝንዳ ጾሳ ካቲቲን ጋርታ ጌላንዳቦ ዪንታ ናጋሪን ጋርታፖ ፋጻንዳቦ ኮሻሬ።

ዬሱሲ ፔቲ ፔቲ ኣሳን ኢያ ኣማናር ፋጻዝንዶ ሜላን ዎቲናካር ኢያ ኣማንባሶን ታማርሲዴ ፔቲ ፔቲ ኣሳን ኮሽ ሳዝፌኔ ጌይዴ ዬሱሳ ኮሽ ባዝፌን ኤኬጌይን ፋጺሬ ሜላን ኣስን ጾሳ ቃላ ዜር ጌልባሶዲፌኒ ኣባካር ኣፍ ካጺባሶዲፌን ጎይ ቡጊዲ ጋልዳ ዎ ሹች ባሮ ሳዜ ዪን ኣሳን ዬሱሳ ጎይ ሶላዚን ኪቲን ኤኪባሶንኬ ጾሳ ካቲቲቦ ኮሽባሶ ኣሴ።

ዬሱሲ ጾሳዲ ናጋራንቻን ዎይሊን ዶሳዝን ታማርሲዴ ኢንታብ ኣቶ ጋንዳብኬ ፌ ናኢ ማሃንዳብ ኮይሬ።

ማ ዬሱሲ ጾሳዲ ናጋራ ሺርንታዝን ኑብ ሶልኔ ኣዳማኬ ሄዋኒኬ ናጋራ ኦኖ ኬልባራ ኢናጋራንዳ ኢ ዜር ዎይን ኢሳዴ ዪንፖ ዲዲኖ ኮታቦ ሳዛ ጋልዳ ዎ ዎይ ኣስ ናጋራ ኦሬ ጾሳጋዳፓሬ ፓጊንቲሬ ዪኮታቦ ዎይ ኣስ ጾሳቦ ጻላታ ምቂኔ።

ዎቲናካሬ ኢባር ኣምንዝ ኣስ ዎይ ሜናብ ሼምፓ ዶኣምፔንዶኬ ያካይፌን ጾሲ ፌናኣ ፌታና ኢያ ኣ ኢምዝ ዲራስ ሳዝ ኤሽን ሜላ ዓር ዶስዴ።

ዪንታ ናጋርምባራ ኢስኖ ኮታቦ ዓይቃንዳቦ ኮሽሬ ጾሳ ዪንቲ ጋልዳ ጎይላንዳብ ኮሽርዶን ዎቲናካሬ ጎይልንዶ ዪንታ ጋልዳ ማሃዚን ጊሻቦ ዬሱሳ ጋልዳ ማሂዴ ዬሱሲ ማስቃላ ግልዳ ዓይቂኖባራ ይንታ ጎይልን ኤኪዴ።

ዬሱሲ ዉርስ ናጋራ ኦካዬ ዎቲናካሬ ዪንታ ናጋርንዲኬ ሳዝ ጋልዳ ዎ ዎይ ኣስ ናጋራ ይሳንዳቦ ዓግንታንዳብኬ ዉርስ ዣርሻ ማቃር ዓይቃንዳብማራጺዴ ዬሱሲ ፌና ኣ ኢምኖ ኮታቦ ጾሳዲ ኣባካፌቦ ናጋራ ኢት ማቂኖ ናጋርን ሜላ ኣቲን እቲ ጋንዳቦ ዳንዳኢሬ።

ኮሽ ኦሳን ዪንታ ፋንዳብ ዳንዳኢባሴ ጾሳባር ዬላንዳብ ዳንዳኢንታምፔን ዎታንዳብ ዳንዳኢዝ ባዝ ኣባክር ባዬ ዬሱሲ ሙታ ዪንታ ናጋርን ሜጫንዳብ ዳንዳኢሬ። ዬሱሲ ጾሳ ናኢ ማቂኖን ዪንታ ጊሻብ ማስቃላ ጋልዳ ዓይቂኖን ጺሲ ኢያ ዓይቃ ጋልዳፖ ዲንኖዲፌን ሙታ ዪንቲ ኣማንዳብ ኮሽሬ።

ጾሳዲ ዬሱሳ ኣማንዝንኬ ፌብ ጎዲ ማሃር ኤክኖ ኦናካር ኣስ ፋሬ ዱራንሬ ዎይ ዎይርባያንሬ ኣቲናሬ ዎይ ማጫሬ ጪጛሻሬ ዎይ ኤርዳሬ ዎይዲካር ማቂን ኣባካር ባዬ ጾሳዳ ዪታባር ኡክ ላጋ ማቃምፔን ዪንታ ካሬ ዪንቲ ዬሱሳ ኣምንፔን ኮይሬ።

ዬሱሲ ኣምንፔንኬ ጻማቂታምፔን ዪንታ ዎስዴ። ዬሱሲ ማሳ ኢ ፌብ ሙታ ዶር ጾሳ ናኢ ማቂኖን ኣማንራ ዪንቲ ናጋራንቻን ማቂኖን ጾሲ ዪንታ ዓጌጌናሬ ኮሽዛ ማቂኖን ኣማንራ? ዬሱሲ ዪንታ ናጋርን ፋይንዳቦ ማስቃላ ጋልዳ ዓይቂኖን ዪንቲ ኣማንራ?።

ዬሱሳኬ ኢ ይንታቦ ኦኖ ኦሳ ዪንቲ ኣማንርኮ ዪንቲ ኣማናን ጾሳዲ ሴጣናፒኬ ም ካቲቲ ዪንቲ ጋልዳፖ ኬሳር ጾሳ ፎኢን ካቲቲ ጋራታ ጋዲኔ ጾሲ ባዛን ዪንቲ ዎቲዛን ስላንኬን ናጋራንቻን ዪንታ ጎይን ፋይር ኦራኬ ጺላ ማቂኖ ኦሳ ጎይ ዪንታብ ኢምኔ።

ዪንቲ ኣማኖን ዬሱሲ ኦኖ ኦሳ ኮታቦ ጾሲ ዪንታ ናጋርን ኣቶ ጌይኔ ዓቲጾሲ ዪንታ ጻላታን ጊሻቦ ኡክ ላጋ ማሃር ይንታ ፋይዲሬ።

ጾሳቦ ላጋን ጎዳ ዬሱሳ ኣሽካራን ማቂንኮ ዬሱሲ ታማርስዚ ባዛንቦ ኪቲንትሬ ኣማንኖ ኣስ ማቂናካሬ ዓት ናጋራ ኦንዳቦ ኮይርሬ ዎቲናካሬ ጾሲ ኣማንቲኖዳ ዪንታ ናጋርን ፋጺንኮ ዪንታብ ኣቶ ጋንዳ ጌይሬ ናጋራ ኢጺዝ ሚቲ ኢምሬ።

ጾሲ ዪንታ ጌሻምፔን ፌ ቃልን ናባባምፔን ሜላን ኣማንኖ ባራ ጾሳቦ ጎሽታምፔን ይንታብ ዎቲኖ ባዛን ሜንንቦ ሶልስምፔን ዪንታ ኦይጫሬ ዪን ባዛን ዎይ ኢባር ኩሻ ላጋ ማቃር ዶኣምፔን ዪንታ ማዳሬ።