7. Pinagpalan Bapan Namalyari si Jacob

Kaban mandumagul la anak lan Isaac buy si Rebecca, mas kakaidwan Rebecca si Jacob ta labay labay nay mapalingun sa kaganawan. Buy kaidwan naman êt Isaac si Esau ta labay labay yaman êt Esau wa mapanulipêt. (Genesis 25:27-28)

Gisay allu, sên nuli si Esau ubat sa panulipêtan, nalayang-layang ya. Kabay sinabi na kan Jacob, “Patêl kuway, biyan muku watin kanên na inlutu mu.” Nakitbay si Jacob, “Patêl kuway, biyan katan kanên, nuwa idin mu kangkuy pangapanganay mu.” Indin na man Esau ya pangapanganay na. Kabay binyanan yan kanên un Jacob. (Genesis 25:29-34)

Sên tuway na si Isaac, labay nan manyawad yan kangêdan kan Bapan Namalyari para kan Esau gawan siyay panganay. Nuwa bayu na nadyag ga abitu, nalinlang nginan Rebecca buy si Jacob. Gawan a sina makitan Isaac ka kasabi na, nagtalingkayu si Jacob ya sabay siya si Esau. Insulud nay yaming Esau buy binyanan nan balat kambing ya bêng na buy takyay na. (Genesis 27:1-10, 14-17)

Pamakadanin Jacob kan Isaac, sinabi na, “Siku si Esau. Naku waku di amên pagpalên mu.” Indap Isaac si Esau ya kasabi na, gawan natalan nay sabut kambing sa takyay Jacob. Nadêp na êt ta yaming Esau ya insulud Jacob. Kabay pinagpalan Isaac si Jacob. (Genesis 25:19-29)

Natubag tubag si Esau sa dinyag nan Jacob. Kabay sinabi na, “Kingwa nayna bayna kangkuy pangapanganay ku. Amêsên kingwa na pun êt ta kangêdan ya para kangku!” Impalanun Esau ya nu mati yay bapa la, patin na si Jacob. (Genesis 25:41)

Nuwa natandan Rebeccay palanun Esau. Kabay inpalakun Isaac buy si Rebecca si Jacob sa balin mani kamag-anak Rebecca sa marayuy lugal. (Genesis 27:41-28:5)

Kaban manugêl baydu si Jacob sa kamag-anak Rebecca, nakapag-asawa ya buy nakaanak yan labinluway anak ka lawyaki buy gisay babayi. Buy pinabandi yan Bapan Namalyari. (Genesis 29:1-43)

Pamakalibas luwampuy tawun, mag-udung ngana si Jacob sa Canaan. Pikilaku nay pamilya na, mani ipus buy mani saysay na. (Genesis 31:17)

Nuwa malimu si Jacob gawan sabaytun idi ya baydu sa Canaan, labay yan patin Esau. Kabay si dinyag na, namipagtan yan mani ayup kan Esau. Kaban pan-idin mani in-utus Jacob ba mani ayup, sinabi la, “Kakay, ya mani ayup pa ati, ubat kan Jacob ba ipus mu. Marani minan makit ta patêl mu.” (Genesis 32:1-5)

Nuwa manay nan pinatawad Esau si Jacob. Kabay sên napikakit silan manguman, sadyay tula la. Napatêtbêk kay biyay Jacob sa Canaan. Sên nati si Isaac, in-ilbêng yan Esau buy si Jacob. Buy ya pangakun Bapan Namalyari sa kasunduwan na kallan Abraham buy kan Isaac, impangakuy naman êt Bapan Namalyari kan Jacob. (Genesis 33:1-17, 37:1)