50. Ya pag-udung Jesus

Sa lalên luway libuy tawun, kapallulumakên mani tawu sa buun babun luta ya mallêngê sa Mangêd da Balita tungkul kan Jesus ya Mamiligtas. Kabay ya mani manampalataya kapallulumakêy na. Impangakun Jesus ya mag-udung ya sa katganan babun luta. Agyan aya pun mag-udung amesen, tanda tamuy tuparên nay impangaku na.

Kaban pan-êtêngên tamuy pag-udung Jesus, si labay Bapan Namalyari sêpat kitamun bumyay matinêk amên ulimênên la si Bapan Namalyari. Buy si labay na iaral tamuy tungkul pag-ari na. Sabitun idi pun baydi sa babun luta si Jesus, sinabi nay, “Iaral mani tagasunul kuy Mangêd da Balita tungkul sa pag-arin Bapan Namalyari sa kaganawan tawu baydi sa babun luta buy pamakayari, lumatêng ngay katganan babun luta.”

Malakê pun na mani tawuy asê magtanda tungkul kan Jesus. Kabay bayu ya mag-udung sa langit, in-utus nay mani manampalatayay iaral lay Mangêd da Balita sa mani tawuy asê magtanda. Sinabin Jesus, “Lakwên yuy mani tawu sa kaganawan bansa buy daygên yu silan mani tagasunul ku” ta “nakal-an nay pamupul!”

Sinabi êt Jesus, “Mas matag-ay ya amung kaysa sa ipus. Kaparisun mamunu baydi sa babun luta ya pangkasulapwan naku buy para et baysen na daygen la kamuyu ta pasakitan la kaw buy patin gawan kangku. Agyan makadanas kaw malakêy kasakitan baydi sa babun luta, papas-êyên yuy nakêm yu gawan nasambut kinay mamunu baydi sa babun luta ya sabay si Satanas! Nu manugêl kaw tapat kangku angga sa katganan babun luta, iligtas kaw Bapan Namalyari.

Nagkwentu êt si Jesus sa mani tagasunul na amên ipapukat kalla nu sabêt ta malyari sa mani tawu sa katganan babun luta. Sinabi na, “Nananêm mangangêd da bini ya gisay tawu sa panggitnan. Kaban mamabêlêw ya, naku sa panggitnan nay kapati na buy nananêm lamun baydu sa pinigitnan nan mangêd da bini bayu ya namita.

“Sên nipantumubuy nay mani bini, sinabin mani ipus, “Amung yan nay, alwa nayin mangangêd da bini ya impatanêm mu sa panggitnan mu? Uysiyan nabiyan yan mani lamun ta?” Nakitbay ya amung la, “Pilmin intanêm kapati tamuy abiin.”

“Nakitbay ya mani ipus sa amung la, “Labay mu nayin lamunun yan na lamun?” Sinabin amung, “Agana ta dat mapikilamun yuy trigu. Etêngên tamu tay pamupul bayu tamu ipapawan ulamên na lamun buy ya trigu, idin yu sa budega ku.”

Asê napukatan mani tagasunul Jesus nu sabêt ta labay sabin kwentu. Kabay sinabi la kan Jesus ya ipapukat na kallay labay sabin kwentu. Nakitbay si Jesus, “Si liyaki na nananêm mangangêd da bini sabay ya Mamiligtas. Si panggitnan sabay ya babun luta. Buy si mangangêd da bini sabay ya mani tawu sa kaarian Bapan Namalyari.

“Ya mani lamun sabay ya mani tawuy sakup Satanas, buy ya kapati ya nananêm lamun sabay si Satanas. Ya pamupul sabay ya katganan babun luta, buy si mani mamupul sabay ya mani angel.

“Sa katganan babun luta, tipunun mani ang-el ya mani sakup Satanas buy isamwag sa magdêkêtdêkêt ta apuy. Buy sa sadyay pamasakit kalla, mingêngêt ta bêbêy la buy mipanangis sila baydu. Ya mani tawuy matinêk kaman, sumawang silan paran sawang allu baydu sa kaarian Bapan lan Namalyari.”

Buy sinabi êt Jesus ya mag-udung ya baydi sa babun luta bayu miras sa katganan babun luta. Nu parasaantu yan namita baydin dilag lawini, para ya êt baydun mag-udung buy makitan tamu yan nakasakay sa ulap. Buy sa pag-udung na, si kaganawan manampalatayay nati, bumyay sila buy têgmên la si Jesus sa langit.

Pamakayari ya mani manampalatayay nabyay, maku sila êt sa langit buy makaawyun lay mani manampalatay binumyay ubat sa kamatyan. Makaawyun la baydun kaganawan si Jesus. Pamakayari bumyay kitamu kaawyun si Jesus un dilag kapatêtbêkan buy pamibêbêtêk kanuman.

Impangakun Bapan Namalyari ya mam-i yan kurona sa kaganawan manampalataya kana. Mag-ari sila kaawyun si Bapan Namalyari un dilag ganap pa kapatêtbêkan kanuman.

Nuwa ya mani tawuy asê manampalataya kan Jesus, atulan silan Bapan Namalyari buy isamwag sa impernu. Baydu sa impernu, mitatangis sila buy mingêngêt ta bêbêy la sa sadyay pamasakit ta madanasan la kanuman. Buy maulam sila sa apuy ya asê mangapalêng buy ase mati ya mani ewel la mangan kalla.

Sa pag-udung Jesus, taganan sambutun na si Satanas buy ya mani sakup na. Isamwag Jesus si Satanas sa impernu buy maulam ya baydu kanuman kaawyun na mani manunul kana gawan alwan si Bapan Namalyari ya sinunul na.

Sabitun nangasalanan si Adan buy si Eba gawan a sila nanunul kan Bapan Namalyari, nabiyan kasalanan na babun luta. Kabay insumpan Bapan Namalyari ya babun luta buy labay nan sirên na ati. Nuwa lumatêng lanuy alluy manyag yan bayuy langit buy bayuy luta ya ganap ya asina masira.

Manugêl si Jesus buy mani tawu na sa bayuy lutay dinyag na buy siyay nay mag-ari sa kaganawan mambumyay. Mitas say kamatyan, kasakitan, kalungkutan, tangisan, buy sakit ta mamakamati. Mag-ari si Jesus un napatêtbêk buy makatuynungan kaawyun nay mani tagasunul na kanuman.