45. Si Felipe buy ya nagtungkulan sa Etiopia

Si Esteban gisa ya sa mani pinunun nunan manampalatayay miaawyun. Pikatandan yan mangêd da tawu, biyasa ya buy pan-awyunan yan Ispiritun Bapan Namalyari. Malakêy nay dinyag Esteban ya mamakaupapas. Pawa nan pansabin sa mani tawuy kaylangan lan manampalataya kan Jesus.

Gisay allu, kaban pan-iturun Esteban ya tungkul kan Jesus, nakisubakan kanay dakun umnuy Judiu ya asê maniwala kan Jesus. Sa tubag la kan Esteban, indawak lay sinabi na. Sinabi la, “Nalêngê yan yay magsabin nadawak tungkul kan Moises buy tungkul kan Bapan Namalyari!” Kabay impadakêp la si Esteban buy gintan la ya sa pinakapuun pari buy sa mani pinunun mani Judiu. Idi êt bayduy malakêy mamipakadawak laban kan Esteban.

Pinatang puun pari si Esteban, “Pêtêg nayi ya pansabin la tungkul kamu?” Sinabin Esteban ya mamakaupapas sa dinyag Bapan Namalyari sabitun panawun Abraham angga sa panawun Jesus buy nu parasaantun asê pansunulun mani tawu si Bapan Namalyari. Buy sinabi na, “Mangakdêy ya ulu yu. A kaw kalabay manunul kan Bapan Namalyari buy pawa yun asê pantanggapên na pangawyun Ispiritun Bapan Namalyari. Kaparisu kaw mani ninunu yu ta pampatin yuy mani propetan Bapan Namalyari. Nuwa sikaw, mas nadawak pun na dinyag yu kaysa kalla gawan agyan na Mamiligtas sa in-utus Bapan Namalyari, impapati yu êt.”

Sên nalêngên mani tawuy ati, natubag-tubag sila. Kabay tinumpanan lay mani têk la buy nan-angaw silan masnêg. Ginuluy la si Esteban paawas sa balayan buy binatwan angga sa napati laya.

Nuwa bayu nati si Esteban, nanalangin ya, “Jesus tanggapên muy kaladwa ku.” Pamakayari nanduku ya buy nanalangin, “Panginuun, agana mu sila parusan sa nadawak ka dinyag la kangku.” Pamakasabi na, nati yina.

Dilag gisay liyaki bayduy nakiayun sa pamati kan Esteban. Binantayan nay yaming mani tawuy namati kan Esteban. Si lagyu na, Saulo. Sabitun panawun abitu, malakêy nay mani tawuy kalabay mamati sa mani manampalataya. Kabay malakêy manampalatayay nagtas sa tutugêlan la buy naku sa magmikakanayun na balayan. Nuwa agyan dakun antuy lakwên la, pan-iaral la sa mani tawuy makilala la ya tungkul kan Jesus.

Si Felipe gisa ya sa mani tagasunul Jesus. Sabitun panawun na pampasakitin na mani manampalataya, namita si Felipe sa Jerusalem. Naku ya sa Samaria buy baydu nan in-aral ya tungkul kan Jesus. Malakêy nanampalataya kan Jesus sa Samaria. Gisay allu, in-utus ang-el Panginuun si Felipe, “Maku ka sa dan papakun sa kakyangan.” Buy naku ya. Kaban mamita ya, nakitan nay gisay nagtungkulan ubat sa Etiopia ya nakasakay sa kalesa na. Sinabin Ispiritun Bapan Namalyari kan Felipe ya magdani ya buy pakisabyan nay nagtungkulan.

Sên marani ya si Felipe sa kalesa, nalêngê nay nagtungkulan na mamasan librun propeta Isaias. Paradi ya pambasen na “Gintan la yan paran tupay nakal-an patin. Kaparisu ya êt tupay pan-urugun ya ayin tarit. Dinustak la ya buy asê ustuy pangatuynungan kana. Pinati laya êt.”

Pinatang Felipe ya nagtungkulan, “Mapukatan mu nayin kayêk ka pambasên mu?” Nakitbay ya nagtungkulan, “A ku yabay mapukatan na pambasên ku nu ayin mamipapukat kangku. Kaksaw ka magsakay ka baydi sa dani ku. Sa êlêw mu, sisabêt ta pantukuyun Isaias? Kaatag tawu nayi o sarili na?”

Impapukat Felipe sa nagtungkulan ya si pantukuyun Isaias sabay si Jesus. Nanggamit pun êt si Felipe un kaatag pun na kasulatan amên sabin kanay Mangêd da Balita tungkul kan Jesus.

Kaban mamita si Felipe buy ya nagtungkulan, nipadan sila sa gisay lugal la dilag lanêm. Sinabin nagtungkulan kan Felipe, “Atuwe! Naglanêm baydu! Malyari yakina nayin magpabawtismu?” Buy inpapatgên nay pagsakayan nay kalesa.

Nakuy nagtungkulan buy si Felipe sa lanêm. Baydu yan binawtismuwan Felipe. Pamakayari nan binawtismuwan na nagtungkulan, gintan Ispiritun Bapan Namalyari si Felipe sa kaatag ga lugal. Baydu insundun Felipe ya pangaral na tungkul kan Jesus.

Buy nuli yaman na nagtungkulan sa Etiopia. Matula-tula ya gawan nakilala na si Jesus.