42. Nag-udung si Jesus sa Langit

Sa allun pangabyay Jesus, dilag luway tagasunul nay naku sa gisay madani ya baryu. Kaban mamita sila, pisasabyan lay pangamatin Jesus buy abituy sinabin mani babayi kallay nanguman nabyay si Jesus. Man-umasa silan si Jesus sa Mamiligtas, nuwa pinati laya. Sabitun sinabin mani babayi ya nanguman nabyay si Jesus, magmitalisay ya nakêm la gawan a la tanda nu sabêt ta paniwalan la.

Nakiagnan si Jesus sa pamita la, nuwa a la ya nakilala. Pinatang silan Jesus, “Sabêt ta pisasabyan yu?” Kabay ingkwentu la kan Jesus ya kaganawan nalyari sa dakun umnuy alluy inlumibas. Indap la dayuan si Jesus buy ayin tanda tungkul sa nalyari.

Impaintindin Jesus kallay Sabin Bapan Namalyari tungkul sa Mamiligtas. Impaganakan Jesus kallay sinabin mani propeta ya magkasakit buy mati ya Mamiligtas. Nuwa manguman yan mabyay sa ikatluy allu. Mamayabiyabi yana bayu sila nilatêng sa baryun Emaus buy baydu tana sila mamalibas yabi.

Kabay sinagyat luway tagasunul si Jesus amên kilaku kalla buy nakilaku yabay kalla. Bayu sila nangan, nangwan tinapay si Jesus buy impasalamat kan Bapan Namalyari. Sên binis-il naynay tinapay, tambêng lan nakilala si Jesus, nuwa bêngat yatan napanat.

Nisabi ya luway liyaki, “Si Jesus awêd da abitu! Kabay awêd natanam tay paran mana taynan pagkaawyun kaban pakisabyan na kita sa dan buy pan-ipaintindi na kantay sabin Bapan Namalyari.” Namaras silan naku sa Jerusalem. Pamakalatêng la baydu, ingkwentu la sa kaatag tagasunul ya mani nalyari, “Nabyay si Jesus! Nakitan yan ya!”

Kaban misasabi ya mani tagasunul, bêngat tan nagpakit kalla si Jesus buy sinabi nay, “Mapakamuyuy kapatêtbêkan!” Indap mani tagasunul, anito ya. Kabay nakitbay si Jesus, “Uysiyan malimu buy magluway nakêm yuta? Elêwên yuy gamêt buy bitis ku. Ayin lawini ya anito nuwa siku, dilag.” Kabay nanyawad yan kanên amên papêtgan nay alwa yan anitu. Buy binyanan layabay si Jesus un intêktêk ka kênan lanêm buy kinnan nay ati.

Sinabin Jesus, “Sinabi kina kamuyuy matupad da kaganawan nakasulat sa Sabin Bapan Namalyari tungkul kangku sa lumatêng nga panawun.” Pamakayari impaintindin Jesus sa mani tagasunul nay nakasulat sa Sabin Bapan Namalyari. Sinabi na pun êt, “Sabitun nuna pun, nakasulat tay magkasakit buy mati ya Mamiligtas, nuwa sa ikatluy allu, manguman yan mabyay.”

“Nakasulat êt ta iaral mani tagasunul kuy kaylangan magsisi ya kaganawan tawu amên mapatawad da mani kasalanan la. Buy mag-umpisa sila sa balayan Jerusalem buy pamakayari sa kaganawan layi sa buun babun luta.’”

Sa lalên apattapuy allu, magpakit si Jesus sa mani tagasunul na. Katamisan na êt nagpakit sa maygit liman dalan na tawu. Pinagpapêtgan na sa mani tagasunul na sa malakêy paralan ya pêtêg yan nabyay. Tinurwanan na êt sila tungkul sa pag-arin Bapan Namalyari.

Sinabin Jesus sa mani tagasunul na, “Indin na kangkuy kaganawan kapangyarian sa langit buy sa luta. Kabay lakwên yuy mani tawu sa kaganawan bansa buy daygên yu silan mani tagasunul ku. Bawtismuwan yu sila sa lagyun Bapa, Anak, buy sa Ispiritu. Buy turwanan yu silan manunul sa kaganawan mani in-utus ku kamuyu. Tandanên yu, pawa yukun mapagkaawyun.”

Inlumibas sa apattapuy allu sabitun nanguman nabyay si Jesus. Sinabi na sa mani tagasunul nay, “Manugêl kaw sa Jerusalem anggan a yu pun natanggap pa kapangyarian Bapa ku sa pallumatêng Ispiritun Bapan Namalyari.” Kapantutumag-ay yan Jesus sa langit buy natêmpanan ninan ulap angga sa a layna nakit. Niknu si Jesus sa êtêb panabtab Bapan Namalyari amên mamaalay na sa kaganawan bagay.