32. Pinaiyul Jesus ya liyaki ya sinêdakan nadawak ka ispiritu

Gisay allu, nagsakay sa bangka si Jesus buy mani tagasunul na buy inlumipay sila sa dagat Galilea papakun sa lugal mani Gerasenu.

Sên nilatêng silay na sa lipay dagat, dilag baydun gisay liyaki ya sinêdakan nadawak ka ispiritu ya mamwayun mambêng kan Jesus.

Sadyay pas-êy liyaki. Kabay ayin makabênbên kana, agyan kay gisa. Agyan ikadena pun êt mani tawuy gamêt buy bitis na, pawa na pun êt mabuytu.

Manugêl la liyakin ati madani sa pamilbêngan. Buy pawa yan man-angaw. A ya magyaming buy pansugatên nan batuy lawini na.

Sên nidani ya kan Jesus, nanduku ya sa arapan na. Sinabin Jesus sa nadawak ka ispiritu, “Magtas ka sa tawun abiin!”

Kabay nan-angaw yan masnêg, “Jesus sa Anak Bapan Namalyari ya makapangyarian, sabêt ta daygên mu kangku? Makisabi yaku kamu, agana mu ku pasakitan.”

Pinatang yan Jesus, “Sabêt ta lagyu mu?”

Nakitbay ya nadawak ka ispiritu, “Pulutung, gawan malakê kay.” (Pulutung ya pamêg sa libulibuy sundalus Romano.)

Nakilunuslunus kan Jesus ya mani nadawak ka ispiritu, “Agana mu kay ipatas sa lugal la ati!” Sa madani baydu, dilag malakêy babuy ya manabêl sa agid bung-uy. Kabay nakisabi ya mani nadawak ka ispiritu kan Jesus, “Paulayên mu kay sumun sa malakêy babuy!” Sinabin Jesus kalla, “Dali, magsêdak kaw na!”

Inumawas sa mani nadawak ka ispiritu sa liyaki buy nagsêdak sila sa mani babuy buy nuwayun nagtabuy papakun sa bêtlay bêngaw. Kabay nangananabu sila sa dagat buy nangalulumud. Ya bilang mani babuy ya abitu, luway libu.

Nuwayuy mani manaysay babuy papakun sa balayan buy imbalita lay mani dinyag Jesus sa mani tawuy matbêng la. Pamakalatêng mani tawu ubat sa balayan nakit lay liyaki ya ubatan nadawak ka ispiritu ya mamangêd day isip buy nakaiknu winan nakayaming.

Nuwa nalimwan mani tawu sa dinyag Jesus. Kabay pikisabyan la yan mita sa lugal abitu. Kaban maglêan nan magsakay si Jesus sa bangka, nakisabi yaman na liyaki ya ubatan nadawak ka ispiritu, “Kilaku waku dayi kamuy Jesus.”

Nuwa sinabin Jesus kana, “Agana kayna kilaku. Muli ka tana sa pamilya mu buy mani kamag-anak mu amên maibalita mu kallay dinyag Panginuun kamu buy nu parasaantu yan nalunus kamu.”

Kabay nuli ya liyaki buy imbalita na sa kaganawan tawu nu parasaantu yan kinalunusan Jesus. Nakaupapas sa kaganawan nakalêngê sa kwentu.

Nag-udung si Jesus sa lipay dagat buy malakêy tawuy nipipiitan kana. Dilag gisay babayi bayduy mapu buy luway tawun nan pandayên. Naubus say kaganawan pibandiyan na sa pamayad sa pagpaêlêw na sa mani mangulu. Nuwa a ya napaiyul, nun a naluyung pun na sakit na.

Nabalitan nay mamaiyul si Jesus. Kabay naisip nay “Agyan kay madukpan kuy yaming Jesus, umiyul lakina.” Kabay naku ya kan Jesus. Sên madani yina sa bukutan na, dinukpan nay yaming Jesus. Pamakadukpa na, tambêng yan inumiyul.

Tambêng natanam Jesus ya dilag nag-awas sa kapangyarian ubat kana. Kabay nangawing ya buy namatang, “Sisabêt ta nandukpa kangkun ah?” Nakitbay ya mani tagasunul na, “Manuru, tanda muy malakêy tawuy nakapalitêng nga nipipiitan amên midani kamu. Uysiyan mamatang ka ya pun nu sisabêt ta nandukpa kamu ta?”

Nandukuy babayi sa arapan Jesus ya manginagin sa limu. Insabi nay dinyag na buy nu parasaantu yan inumiyul. Kabay sinabin Jesus kana, “Patêl la, inumiyul ka gawan sa panampalataya mu kangku. Kabay muli kaynan napatêtbêk ka nakêm.”