30. Pinakan Jesus sa Limay Libuy lawyaki

In-utus Jesus sa mani tagasunul na sa magmikakanayun na lugal amên mangaral buy manuru sa mani tawu. Sên nag-udung silayna kan Jesus, ingkuwentu la kanay kaganawan dinyag la. Pamakayari insagyat silan Jesus, "Maglipay kitamu pun sa lipay dagat ta amên magpaynawa sa gisay napatêtbêk ka lugal." Kabay nagsakay silayna sa bangka buy namita.

Nuwa malakêy nakakit buy nakatandan pamita la. Kabay nagpupwayu ya mani tawu sa agid dagat amên milatêng sila sa lipay dagat. Sên nagtabuy si Jesus sa bangka, timbêng silan sadyay lakên tawu.

Si bilang mani lawyaki, maygit liman libu buy asê pun nakabilang nga mani babayi buy mani anak baydu. Nalunus kalla si Jesus gawan para silan tupay ayin magpastul. Kabay tinurwanan silan Jesus buy pinaiyul nay nipagsakit kalla.

Sên mamayabiyabi yana, nagdani kan Jesus ya mani tagasunul na buy sinabi la, “Payabi yana buy idi kitamu sa madayuy lugal buy ayin panaliwan. Pabitên yinay mani tawun maku sa mani balayan amên mangkap silan maêkan la.”

Nuwa sinabin Jesus kalla, “A silay na kaylangan mita. Sikaw wa mamakan kalla.” Nakitbay sila, “Parasaantuy daygên yan? Pakan kay lilima yabay ya tinapay tamu buy kay luluway kênan lanêm.”

Binêg Jesus sa mani tawu buy in-utus na sa mani tagasunul nay, "Paiknun yu sila sa têmak buy ipustu yu silan tilimampu."

Pamakayari, kinwan Jesus ya limay tinapay buy luway kênan lanêm. Naningla ya sa langit buy impasalamat na kan Bapan Namalyari ya kanên.

Pamakayari binis-ilbis-il nay tinapay buy mani kênan lanêm buy indin na sa mani tagasunul na. Indin êt taman mani tagasunul na sa mani tawu. Nakaêkan na kaganawan buy nabsuy, nuwa dilag pun êt nitagan na kanên.

Pamakayari, tinipun mani tagasunul nay nitagan na kanên buy napakapnu la pun êt ta labinluway salikap. Ya kaganawan kanên, kay naubat sa limay tinapay buy sa luway kênan lanêm.