23. Ya Pamianak kan Jesus

Si si Maria, nakatakday nan itangên sa mangêd da liyaki ya sabay si Jose. Sên natandan Jose ya bêngat tan nabuktut si Maria, naisip nay, "Alwa kun anak ka abitu." Nuwa gawan a na labay mipakadêng-êy si Maria, idi ta sa nakêm nay isyay na tana si Maria un ayin magtanda. Nuwa bayu na pun daygên na palanu na, pinagkasabi yinan ang-el sa kapamilatan taynêp.

Sinabin ang-el kan Jose, “Agana ka malimun tangênên si Maria, ta nabuktut ya sa kapamilatan kapangyarian Ispiritun Bapan Namalyari. Liyaki ya ianak na buy si ipalagyu mu kana, Jesus, (ya labay sabin 'Yahweh ya mamiligtas'), ta sabay siyay mamiligtas un mani tawu sa mani kasalanan la.”

Kabay tinangên Jose si Maria buy pikilaku na ya sa bali la. Nuwa a na ya tinakês anggan asê pun in-anak Mariay kulaw.

Sên madani yan manganak si Maria, in-utus manungkulan Roma sa kaganawan tawu ya maku sila sa balayan mani ninunu la amên miawyun sila sa sensus. Kabay namita si Jose buy si Maria ubat sa Nazaret nu saantu sila manugêl. Namita sila papakun sa Betlehem agyan madayu, tagawan baydu nanugêl si David da ninunu la.

Pamakalatêng la sa Betlehem, ayin silan matugêlan. Si kay nakit la, tutugêlan mani saysay. Buy baydu naynan naianak ka kulaw. Impakalêk lay kulaw sa pamakanan mani saysay, ta ayin silan makit ta pipakalêkan kana. Si impalagyu la sa kulaw, Jesus.

Sa yabi êt abitu, dilag magpastul ya madani baydu ya manaysay mani tupa la. Mamakun ni bêngat tanan nagpakit kallay gisay ang-el la mamakasilêw. Kabay nalimu sila. Nuwa sinabin ang-el, “Agana kaw malimu, ta dilag gakun mangêd da ibalita para kamuyu. In-anak kana sa Betlehem ya Mamiligtas ya sabay ya Panginuun!”

“Maku kaw amên têkapên yuy kulaw buy makit yu yay nakapunggus lampin buy nakakalêk sa pamakanan mani saysay.” Mamakun ni bêngat tan nagpakit ta sadyay lakên ang-el. Mangulimên sila kan Bapan Namalyari. Sinabi la, “Ulimênên si Bapan Namalyari ya idi sa langit. Buy dilag gan kapatêtbêkan ya mani tawuy idi sa babun luta ya kapapidu kana.”

A nabuyutan, inlumatêng nga mani magpastul nu saantu in-anak si Jesus. Nakit lay kulaw wa nakakalêk sa pamakanan mani saysay kaparisun sinabin ang-el kalla. Sadyay tula la sa mani nalêngê buy nakitan la. Kaban mag-udung silayna sa mani saysay lay tupa, mangulimên sila kan Bapan Namalyari.

Pamakalibas dakun umnuy panawun, dilag gaman inlumatêng sa Jerusalem ya mangabiyasay tawu. Gawan dilag silan nakit sa langit ya ayin kaparisuy bêtêwên, tanda lay labay sabin ya dilag in-anak ka kulaw ya sabay ya bayuy arin mani Judiu. Kabay naku sila amên makit ta ari, agyan bapan dayuy bitên la. Nilatêng sila sa Betlehem buy nakit lay bibiyan Jesus buy mangatwa na.

Sên nakitan la si Jesus ya awyun indu na, nanduku sila buy nangulimên kana. Binyanan la ya êt maulagay degalu buy pamakayari, nuli silayna.