11. Ya Pallumibas ang-el Bapan Namalyari

Sinabin Bapan Namalyari kan Moises, “Nu asê pun êt ibus arin Egiptuy mani Israelita, patin kuy kaganawan panganay ya lawyaki sa Egiptu, tawu man o ayup.” Sên natandan ari ya ati, sinabi na pun êt ta, “A ku ibus sa mani Israelita.” (Exodo 11:4-8)

Sinabin Bapan Namalyari kan Moises, “Isabi mu sa mani tawuy manampalataya kangkuy mamili silan gisay tupa o kambing nga mamangêd.” (Exodo 12:21)

Sinabi pun êt Bapan Namalyari ya, “Patin lay tupa o kambing buy si dayan ati, ikuskus la sa pasbul la amên asê mati ya panganay lay lawyaki. Itêktêk lay karnin ayup buy kêna lay ati. Mangan sila êt tinapay ya ayin pamalbag. Kaylangan silan maglêan sa pamita sa Egiptu.” (Exodo 12:3-13)

Sinunul mani Israelitay kaganawan in-utus Bapan Namalyari kalla. Sên limbanakan yabi, pinatin Bapan Namalyari ya kaganawan panganay ya lawyaki sa buun Egiptu. (Exodo 12:29-30)

Nuwa ya kaganawan balin Israelita, kinuskusan lan daya. Kabay inlibasan silan ang-el Bapan Namalyari. Sa pakapakun baydu, ayin nati sa mani panganay la buy niligtas sila gawan sa dayan tupay nakakuskus. (Exodo 12:27-28)

Nuwa taganan asê naniwalay mani Egiptu kan Bapan Namalyari. A la sinunul la sinabin Bapan Namalyari. Kabay asê inlibasan ang-el Bapan Namalyari ya bali lay ayin daya. Pinatin ang-el Bapan Namalyari ya kaganawan panganay lay lawyaki buy ya mani panganay lay ayup. (Exodo 12:29)

Nati ya kaganawan panganay lay lawyakin Egiptu, agyan na mani idi sa sukulan buy ya anak ka panganay un ari. Sa yabin abitu, sadyay panangis mani Egiptu gawan sa lungkut la. (Exodo 12:30)

Amêsên, impabêg ari silan Moises buy si Aaron. Sinabi na kalla, “Pakilaku yinay mani Israelita. Mita kaw na baydi.” Para êt bayduy sinabin mani Egiptu kalla. (Exodo 12:31-32)