1. Ya Pinangubatan Kaganawan

Paradi ya umpisan kaganawan. Ya nunan dinyag Bapan Namalyari, sabay ya babun luta. Nuwa sa panawun na abaytu, ayin kapun dakun sabêt ta makitan sa babun luta, ta pawan lanêm buy nadêglêm. Nuwa ya Ispiritun Bapan Namalyari, idi yina sa babun lanêm. (Genesis 1:1-2)

Amêsên, sinabin Bapan Namalyari, “Mabiyan sawang.” Kabay sinumawang yabay. Sên nakit Bapan Namalyari ya dinyag na, natula ya. Kabay inpapawa nay sawang sa nadêglêm. Ya sawang, binêg nan “allu.” Ya nadêglêm, binêg nan “yabi”. Abiin na dinyag na sa nunan allu. (Genesis 1:3-5)

Sa ikaluway allu, sinabin Bapan Namalyari, “Mipapaway lanêm. Ya kapaka, milaku ya sa têngêl amên pakadyag ulap. Buy ya kapaka êt, milaku ya sa aypa amên pakadyag dagat.” (Genesis 1:6-8)

Sa ikatluy alluy na êt taman, inpapawan Bapan Namalyari ya luta buy lanêm. Ya luta, binêg nan “luta”. Ya lanêm, binêg nan “dagat.” Sên nakit Bapan Namalyari ya dinyag na, natula ya. (Genesis 1:9-10)

Pamakayari, sinabin Bapan Namalyari, “Tumubu sa babun lutay kaganawan kalasin puun kayu buy tanaman.” Parabaydu yabay ya nalyari. Sên nakit Bapan Namalyari ya dinyag na, natula ya. (Genesis 1:11-13)

Sa ikaapat ta allu, sinabin Bapan Namalyari, “Mabiyan allu, buwan, buy bêtêwên sa langit ya mam-in sawang sa babun luta.” Kabay nadyag yabay. Sa kapamilatan abiin sila, matandan tamu nu allu o yabi, buy matandan tamu êt nu mapupus say buwan o tawun. Sên nakit Bapan Namalyari ya dinyag na, natula ya. (Genesis 1:14-19)

Sa ikalimay allu, sinabin Bapan Namalyari, “Mabiyan magmikakalasi ya kênan lanêm, mangaragul buy nangabêlêng. Buy mabiyan êt magmikakalasi ya manuk.” Kabay nadyag yabay. Sên nakit Bapan Namalyari ya dinyag na, natula ya. Pinagpala na buy pinalakêy mani ayup pa dinyag na amên matpêlan na babun luta. (Genesis 1:20-23)

Sa ikaanêm ma allu, sinabin Bapan Namalyari, “Mabiyan kaganawan kalasin ayup sa luta.” Kabay nabiyan yabay. Sên nakit Bapan Namalyari ya dinyag na, natula ya. (Genesis 1:24-25)

Amêsên, sinabin Bapan Namalyari, “Manyag kitamun mani tawu. Daygên tamu silan kaparisu tamu. Sabay silay mamaala sa babun luta buy sa kaganawan ayup.” (Genesis 1:26a)

Kabay nangwan luta si Bapan Namalyari. Dinyag nan liyaki ya ati. Pamakayari, kinayupan nay balungus. Kabay nabyay ya. Binêg nan Adan na liyaki. Nanyag êt si Bapan Namalyarin gisay panamnan amên baydu manugêl si Adan. Saba siyay manaysay sa panamnan. (Genesis 1:27-30)

Sa libutad un panamnan, dilag luway puun kayu. Ya gisa, mam-in biyay. Ya gisa êt taman, mam-i yan kabiyasnan tungkul sa mangêd buy nadawak. Amêsên, sinabin Bapan Namalyari kan Adan, “Si tagêy un mani kayu baydi, malyari mun kanên, maliban tana sa tagêy un kayuy mam-in kabiyasnan tungkul sa mangêd buy nadawak. Ta nu kanên muy abiin, mati ka.” (Genesis 2:16-17)

Amêsên, sinabi Bapan Namalyari, “Asê mangêd da kay gigisay tawu.” Sinabi nay abiin, ta ayin mapagkaawyun si Adan sa mani ayup. (Genesis 2:18)

Kabay, pinabêlêw Bapan Namalyari si Adan. Kaban maêlêk yan bêlêw, kingwan Bapan Namalyari ya tagyang na buy dinyag nan gisay babayi. Pamakaimatan Adan, nakitan nay dilag ginan kaawyun. (Genesis 2:21-22)

Pamakakit Adan sa babayi, natula-tula ya. Sinabi na, “Salamat ta dilag gakinan mapagkaawyun na kaparisu ku. Bêgên ku yan ‘babayi’.” Ati ya sangkan panlakwan liyaki sa mangatwa na, ta kilaku ya sa asawa na buy pakadyag silan gigisa. (Genesis 2:23-24)

Dinyag Bapan Namalyari ya liyaki buy babayi un kaparisu na. Pinagpala silan Bapan Namalyari buy sinabi na kallay, “Manganak kaw malakê angga sa mapapnuy tawuy babun luta.” Sên nakit Bapan Namalyari ya kaganawan dinyag na, sadyay tula na. Abiin na nalyari sa ikaanêm ma allu. (Genesis 1:27-28, 31)

Sên niras say ikapituy allu, nayari naynan Bapan Namalyari ya kaganawan dinyag na. Kabay nagpaynawa ya buy pinagpala nay ikapituy allu buy dinyag nan banal. Parabaysên dinyag Bapan Namalyari ya kaganawan bagay. (Genesis 2:2-3)