49. Məkàyn mə Mfimə̀ ə̀ Nyìngòŋ

Ntsɨ̀ŋ ə̀ əngə̀ŋ ə̀ Nyìngòŋ ngàʔə̀ à ngòyn ə̀ wùwì ə Mèri la ghə̀ a bwi Wàyn ə̀ Nyìngòŋ. Ghə̀ mbɔ̀ bu tà ngòyn ə̀ wùwì the Kəzhwì kə nwoʔə kə shiə à wen əwen ghə̀ chò nə̀ əbə̀m. Ghə̀ ə mbwi li wàyn ə wùlɨm ə̀ chʉ əzhiʔ ə wen nə̀ Yesù. A dìʔ la Yesù dìʔ Nyìngòŋ bɛ dìʔ wìʔ.

Yesù ə nnèə̀ li ənyʉ̀ ə̀ kanə və tà a kədɨ̀ŋ ə jìʔ la ghə̀ dìʔ Nyìngòŋ. Ghə̀ ə njèʔə̀ li a kwì a muʔu, ə̀ ghaʔ əfwof la kə ghə bɛ chò, ə̀ chʉʔ viʔ vəkwaʔkə və, ə̀ shìsə̀ vəzhɨ nə̀ kəbwìn fa viʔi, ə̀ lùsə̀ viʔ vəkwaʔkə və fa əpfɨ, ə̀ zhis viʔi nkamsə tàyn (5,000) nè ntèmə kəbayn kə mənkalə̀ ə̀ tàyn nə̀ məndeʔ ndəʔ mə̀ shʉsə səbò.

Yesù ndìʔə nges ə̀ njìʔsə̀. Ghə̀ nziʔə nə̀ kəjoʔ kə byì àndə ghə̀ ndìʔ Wàyn ə̀ Nyìngòŋ. Ghə̀ nziʔə la wìʔ kòŋ lə̀mə̀ wen tà àndə ghə̀ kòŋə̀ əwen ə wen.

Ghə̀ ə mbɛ nziʔə̀ la wìʔ dìʔə̀ kòŋ Nyìngòŋ ə chò noʔə̀ əfo ətsèm a mbyi, tɛ̀ bɛ̀ əko.

Yesù ngàʔə̀ la kəshi kə fòyn ə̀ Nyìngòŋ kə bòŋə̀ chò noʔə̀ əfo ətsèm a mbyi. Kənyʉ̀ kə to kə a viʔ vətsèm kə dìʔ la wìʔ kwen a kəshi kə fòyn ə̀ Nyìngòŋ. Ə kwen a kəshi kə fòyn ə̀ Nyìngòŋ, wìʔ dìʔə bwòŋ fa wenə̀ mbyɨsə.

Yesù ngàʔə̀ li la viʔ vətsenə və a byɨmə à yì ə bwòŋ, vətsenə və chen yì. Ghə̀ ə ngàʔə̀ li la viʔ vətsenə və dìʔ a nə̀ nse ə jùŋə. Vəwenə zhʉə byì Yesù və byɨmə ə̀ bwòŋ. Viʔ vətsenə və dìʔ a nə̀ nse ə byɨfə a əgàʔ ə Nyìngòŋ ə fəŋə tsu kèn la ghə kwi li. Vəwenə ko byɨmə ə gàʔ ə Nyìngòŋ kèn la vəwenə lu kwen a kəshi kə fòyn ə̀ Nyìngòŋ bwen.

Yesù ə nziʔi li viʔi la Nyìngòŋ ə kòŋə̀ viʔ və byɨfə və. Ghə̀ kòŋə̀ ə shʉ̀ə̀ mbyɨsə vəwenə ə nè la vəwenə ndìʔ vunə wen.

Yesù ə mbɛ ziʔi vəghəŋ la Nyìngòŋ ə bànə̀ mbyɨ. Adàm wenə̀ If ə̀ nnèə̀ mbyɨ ghə̀ chò ə̀ shiə a viʔi noʔə̀ vətsèm. Noʔə̀ viʔ vətsèm a mbyi kiʔ mbyɨsə a sə gèsə̀ vəwenə fà Nyìngòŋ. A dìʔ la Noʔə̀ viʔ vətsèm dìʔ viʔi kəbàyn ə̀ Nyìngòŋ.

A lì Nyìngòŋ ə nkòŋə̀ li mbyi yen noʔə̀ nànto ə̀ ku Wàyn ə̀ wen tà la əmùʔ lə̀ la noʔə̀ ndə̀ a ghə̀ byɨmə a wen ghə ko lu lè. Ghə̀ ə lu kiʔə əbwòŋ a ghə lu sè əghayn əmùʔ.

Wù ə ndìʔ ə pfɨ byì mbyɨ ə wù. Tyin ə̀ Nyìngòŋ ə ndìʔ ə fwi à wù a jì ə byɨfə, a lì ghə̀ bòŋsə̀ jìʔ tyin əfwi ayì a Yesù ghə̀ yenə ngəʔ. Yesù mpfɨ a fəkòʔ fə kəntò byì mbyɨ shəsə.

Yesù nko nè noʔə̀ mbyɨ ətsen bwen, a lì ghə̀ byɨmə ə yenə ngəʔ à wù ə kəshi bɛ̀nə̀ a əzhiʔ ə viʔi noʔə̀ vətsèm a mbyi. Nyìngòŋ zì ghə̀ lyèsə̀ ə̀ kuə mbyɨ shəsə noʔə̀ sətsèm, tɛ̀ mbyɨsə byɨfə sə, byì əpfɨ ə Yesù.

Əshyèʔ ə juŋə ghə nə̀ ənyʉ̀ ə juŋə və ko zì və bwoŋsə wù. Kənyʉ̀ kə ko dìʔ a wù zì wù nè ti Nyìngòŋ bwòŋsə̀ wù. A zì a shʉ̀ tà Yesù ə̀ shʉ̀ mbyɨ shə̀sə. Wù dìʔ ə byɨmə la Yesù dìʔ Wàyn ə̀ Nyìngòŋ, la ghə̀ ə mpfɨ li a fəkòʔ fə kəntò à wù ə kəshi, la Nyìngòŋ ə nlùsə̀ li wen fa əpfɨ.

Nyìngòŋ a bwòŋsə̀ noʔə̀ viʔ vətsèm a və byɨmə la Yesù dìʔə mbwòŋsə̀ ə̀ vəwenə. Ghə̀ ə ko a bwòŋsə̀ viʔi a və ko byɨmə a wen bwen. Kòŋ wù ə ndìʔ wù əko, wù kəmfem, wùlɨm, wùwì, wuto, wanjə̀, kòŋ wù ə ntsi tɛ̀ fenə. Nyìngòŋ ə kòŋə̀ wù kəŋə la wù byɨmə a Yesù ti ghə̀ ə ndìʔ wùndoŋ ə̀ wù.

Yesù ə dzàŋə̀ wù la wù vì ə̀ byɨmə a wen ə̀ shi muʔu. Wù ə lə̀ byɨmə li la Yesù dìʔ Mèzayà a, dìʔ Wàyn ə̀ Nyìngòŋ a? Wù ə byɨmə li la wù ə nè li mbyɨ mu Nyìngòŋ ə ndìʔ ə fwisə tyin à wù ə loʔ wù a? Wù ə byɨmə li la Yesù mpfɨ a fəkòʔ fə kəntò ti shʉ̀ə̀ mbyɨ shəsə a?

Mu wù ə byɨmə li a Yesù bɛ̀nə̀ a kənyʉ̀ a ghə̀ ə nnèə̀ li à wù, mu wù sə̀ dìʔ wubyɨmə! Nyìngòŋ ə shìsə̀ li wù fà əshə ə mfɨnə̀ ə Satàyn ə nkwensə wù à əshə ə Nyìngòŋ ə banə ghə. Nyìngòŋ ə kwitə li wù fa jì ə byɨ yì a wù ntsi a mbyɨ li, ə nku jì ə fi la wù ə ntsiə fa tsu.

A sətsèn a ndìʔ la wù ə byɨmə li, mu Nyìngòŋ ə lyèsə̀ li nku wù à wù ə mbyɨsə byì kənyʉ̀ a Yesù nnèə̀. Luwèn, Nyìngòŋ ə lyɨ̀ə̀ la wù dìʔ wùndoŋ ə yì.

Wù sətsèn ə ndìʔ wùndoŋ ə̀ Nyìngòŋ dìʔ wùshyèʔ ə̀ Yesù, wù à kòŋ ə ntsi a jì a Yesù ə ziʔə la wù ə ntsiə fa tsu. Wù dìʔ tɛ̀ wubyɨmə a lì mənzhʉ məntsenə mə dìʔ a wù a nkiʔ təmwòmsə̀ ə nèə mbyɨ. A lì Nyìngòŋ dìʔ Nyìngòŋ ə jùŋə ə ngàʔ la sətsèn wù dì a yì la wù ə fəŋ li a mbyɨ, yì à lyèsə̀ ku à wù. Ghə̀ a ku kəjoʔ à wù, ə gyàmtə̀ wù ti wù nyɨŋ fa mbyɨ.

Nyìngòŋ ə kəŋə la wù ə njɨ̀mə̀, lanə̀ kənyʉ̀ kə Nyìngòŋ, tsèntə̀ wyè ə viʔ vəbyɨmə vətsenə və kuʔsə̀ Nyìngòŋ, bɛ shə̀ʔtə̀ kənyʉ̀ a viʔ vətsenə və a Nyìngòŋ nè à wù. Ənyʉ̀ a vənə noʔə̀ ətsèm və gyàmtə̀ wù kwiʔə à wù ə əbyɨmə.