1. ፕዥሪ

ኮዖዛንክ ሾሽ ዶዖቕዳኬታም ዎ ሼድንክ ሳዓቢ ሬይ ሙዴናም ዬዛቓብ ማዓትንትንክታሜ፡፡ ካንካን ሳዓቢ ርካምኬ ፔጫምክ ዋዓርኮቴሬ ሃዓፔርዳክ ሬይናም ላዓ ሴጽግር ፕዤ፤ ሳዓቤሬ ይ ፕዣኬት ቡዑር ፔጫ ዹምኬ ዋዓርንት ሬይ ዳክንዳ ሃዓቔ፤ ዋዓር ሬይ ዎላቔሴ ኣኪ ፕዥራቕ ሃዓቔ፤ ዳዓኖንምሺ ሳዓብት ማንፔስ ኖቔት ዜን ሽርዳቔ።

ኮዖዛንኬሬ ሳዓቢ “ሻዓክሚ ማዓታኔ” ጋይሴ ሻዓክሜሬ ማዓሤ፤ ሳዓቤሬ ሻዓክምና ላቕሚ ኮ ማዓሥምሽ ሼጆ «ሮዖሬ» ጋይሶ ናዓምኮት ዎጄ፤ ሳዓቤሬ ሮዖርናም ዹምንግራንክ ፓዓሾ ዹምናም ሶይትዬ ጋይሶ ናዓምኮት ዎጄ፤ ሳዓቤሬ ብራ ሴጽንክ ሻዓክማም ፕዤ።

ቓስትምሲ ሴጽንክ ሳዓቢ ፔጬት ዜርሜክ ዶዖቕዳክ ርኬናም ፕዤ፤ ካንካን ሳዓቢ ኖቔናም ርኬንዳንክ ፓዓሼ።

ማክምሲ ሴጽንክ ሳዓቢ ኖቔናም ፔጫ ዎቼንዛንክ ፓዓሽምቴምሽ ማዓስሴ፤ ሳዓቤሬ ዎቼናም “ፔጬ” ኖቔናሜሬ “ጼዔርዬ” ጋይሶ ናዓምኮት ዎጄ። ሳዓቤሬ ይ ፕዣቓክ ሬይናም ላቕሚ ማዓሥምሽ ሼጄ።

ኮዖግሬሬ ሳዓቢ ፔጬና ሬይ ሙዴናም ሃዓቓምኬ ኮርማምክ ኮ ባቓልሳኔ ጋይሴ፤ ክ ጋይስምሼሬ ማዓሤ፤ ሳዓቤሬ ይ ፕዣቓክ ሬይና ላቕሚ ማዓሥምሽ ሼጄ።

ኦይሥምሲ ፕዥርን ሴጽንክ ሳዓቢ ሃያም፥ ኣርፓምኬ ማንካምክ ፕዤ፤ ሳዓቢ ሮዖራምኬ ሶይታምክ ማሻ ኣርፓምኬ ቦናምክ ኬ ፓዓሽምቴምሽ ማዓስሴ፤ ሳዓቤሬ ይ ፕዣቓክ ሬይና ላቕሚ

ማዓሥምሽ ሼጄ።

ዶንቕሲ ሴጽንክ ሳዓቢ ኖቔግር ዶዖቕዴዳምኬ ኣፕቲ ሙዴናምክ ፕዤ፤ ሳዓቤሬ ኮዖና ላቕሚ ማዓሥምሽ ሼጄ፤ ፕዤርሻቔድናሜሬ ኣንጄ።

ላሲ ሴጽንኬሬ ሳዓቢ “ፔጬት ዜን ዴቢ ሙዳ ይንት ካዓሥይምሽ ኬ ማዓታኔ” ጋይሴ፤ ሳዓቢ ጋይስምሼሬ ማዓሤ፤ ዋይኒ ዎዖኒ ዋኪ ዋይንኔሬ ፔጬክ ባዝዴድ ዋይንኔሬ ቖሤግር ዶዖቕዴድ ዴቢ ሃዓቔኬ፤ ሳዓቤሬ ኮዖና ላቕሚ ማዓሥሽ ሼጄ።

ሳዓቤሬ “ኤድናም ዎንት ካምስምሽ ዎ ፕዣኔ ኬቴሬ ፔጫ ሙዴዜንኬ ቖልማ ሙዴዜንክ ጋዓንምኬት ዶዖቓኔ” ጋይሴ።

ካንካን ሳዓቢ ፔጬራንክ ፔጫም ቴዮ ኤዔድ ማዓስቶ ኣክሼትዳቦ ክ ኡክንቴምሽ ኪም ማዓስሴ፤ ኤዔሥን ኮዖቴሬ ናዓሚ ኣዳም ጋዓርሴ፤ ሳዓቢ ኣዳም ዶዖቕዳክ ካርንግር ኮርሚ ኮርስዮ ክT ኤዔቕስቴምሽ ዋዓር ኪም ዎጄ።

ኮርምንቴሬ ሞልትግር ሳዓቢ ሃዓቓ ቓስቴን ጋላ ጋሌዳም ኮርሴ፤ ኡክና ዶዖቕስድንዳ ሃዓቔኬ ላቕማምኬ ዳቕላምክ ፓዓሽትዮ ኤሴርቴምሽ ማዓስስዴድ ሃዓቓ ዶዖቕዳቔኬ፤ ሳዓቤሬ ኣዳማ ኮርሚ ካርንግር ዶዖቕዳክ ላቕምናምኬ ዳቕልናምክ ፓዓሽትዮ ኤሴርቴምሽ ማዓስዳክ ሃዓቔን ካይሳ ኮርሚ ሃዓምንግር ዶዖቕዳክ ሃዓቓ ሃምንቴሬ ኣዓፕናም እሥንቲ ኪን ማዓድምሽ ኪን ኬዔዜ። ዳይንኬኬሬ ላቕምናምኬ ዳቕልናምክ ፓዓሽትዮ ኤሴርቴምሽ ማዓስዳክ ሃዓቔንት ኣዓፒ ክ እሥድንክ ዴኢ ክ ዴእድምሽ ኪን ኬዔስታ ሃዓቔ።

ሳዓቢ ኤዔድ ሃኪ ክ ማዓሥንክ ላቕሚ ዳክዬ ጋይሴ፤ ዴብንግራንክ ኣዳምካን ኬልሺ ማዓዳብ ሃዓፔርክዬ።

ሳዓቤሬ ኣዳምዜን ዛምንዳ ግንእ ታዓዴ፤ ራዓታ ክ ዳይክ ሌግግርክታንክ ሌፒ ዎላቔንዳታም ቴይዮ ማዓ ማዓስሶ ኣክሼትዳቦ ኣዳምዳ ኮዖም ታዓዴ።

ኣዳሜሬ ኮዖም ይ ሼጃኬንክ ኮይን ጋይሴ፤ “ኮና ኢም ካምድንዴ፤ ኣንግዳንክ ኮ ሃዓፔርሳቕንካን ማዓ ኮዖም ጋዓራኔ ጋይሴ፤ ካንካን ኤዔድ ባዓቤናምኬ እንዴናምክ ጋጋርዴ ማይንት ኪክን ዎላቕ ማዓዴ።

ሳዓቢ ኣንጋምኬ ማዓምክ ይንት ካምስክ ፕዤ፤ ሳዓቤሬ ኬዔም ኣንጄ፤ ኮይኔሬ ኬዔን ጋይሴ “ቤድሚ ይንሤንትኬ ይንሥት ይንሤንቴሬ ዬዔን ኬ ዶዖቓኔ ፔጬንኬሬ ጾዖጽኬቴ” ሳዓቤሬ ይ ፕዣቓክ ሙዳም ላቕሚ ማዓሥምሽ ሼጄ፤ ሬይ ሙዴኬሬ ጉሜርሴ፤ ኮዖና ሙዳ ላዓ ሴጽግር ማዓሤ።

ታፕሲ ሴጽንኬሬ ሳዓቢ ፕዤይንታም ማቕሼ፤ ካንካን ሳዓቢ ይ ዎዖንዳቓክ ዎዖኒ ሙዴግራንክ ሃዉሼ፤ ታፕሲ ሴጽናም ኣንጆ ኮዖም ጪልሼ፤ ሃራካኔ ጋዓርስንክ ኮዖ ሴጽንግር ይ ዎዖንዳቓክ ዎዖኒ ሙዴግራንክ ክ ሃዉሻቕንካኔ፤ ሳዓቢ ርካምኬ ፔጫምክ ዋዓርኬቴሬ ዶዖቕዴዳም ክ ፕዥዳኬንክ ሬይን ዎዖንምሳቓክ ኮይናሜጎክ ሃዓቔ።