25. Sheethan Yeesus yacikkine

Akkanih Yeesus yinthimmiqhek sarrah, Quddus kin Ufayi tamaa usuk morootom lellectiya kee marootom bartiya alle yosoome zibolle kaa beye. Sarrah Sheethan alle yemeeteyaako Yeesus zambe abo kaa yicikkine.

Sheethan Yeesus: "Atu Yallih Barha tekkemko, betto ta dhayit fololle iybiddil!" yeh kaa yicikkine.

Yeesus: "Yallih waanidde, 'Xiyaw maroona folo bisah maki ten farhshishsham, tamaa Yalli waanisha waani gantah kinni inkoh ten farhshishsham!" yeh alle deheye.

Sarrah Sheethan Yeesus Maqhdas Carih bukakke kaa korisheyaako: "Yallih ​Barha tekkemko, 'Ku ibi dhayittodde yamuttukemko ku yaaqhacoona Yalli ishi malaykut yaamaro kinni' yaanam tunkuttubeh tanemhi sabbatah, guballe ishe cid" ake.

Yeesus laakin Sheethanalle tunkuttubemko xuseyaako radde akah yedebbe. Usuk: "Yallih Waanidde, 'Ishi Maddara kin Yalla maacakkanin' yarhxeh ishi xiyaw yaamire."

Sarrah, Sheethan Yeesus umbuka udduuniyat nigsinna kee tee nabinta kaa yuybulluweyaako: "Kumteyaako yoh tucbudemko, tayim inkoh koh axaw kiyo" ake.

Yeesus: "Yok icrhii, ko Sheethano! Yalli ishi waanidde ishi xiyawak: 'Maddara kin sinni Yallah bisa ucbudantaaki kayya ukhduma" yarhxeh ten yaamire.

Yeesus Sheethan cakanah gaba maaxayinna, amaymih lel Sheethan kaa xabe. Amaymik sarrah, malaykut yemeetiinih Yeesus baclayshen.