46. Saulon Jisun asanandungmar dete

Saulo gamle bo mandran dakuli anin Jisun amang addirned. Anin danggarda adakulin adnang, anin Stipan ado’ng atuablennji amandraji ado’ng abhanaetin. Atiki anin dirna maranji ado’ng tamderretinji. Anin Jirusalemlingan kuddub singban iyle insalonji do onggeranji ado’ng tolbadan tolbadle krojosingban piddetinji. Ansaring murda buyan Saulon ado’ng Damasika gardaban yirbin asan anordin tietin. Tidti Jisun asanandung maranji ado’ng hamle Jirusalemban aurrungbin asan oblinggetin.

Bar Saulon Damasika gardaban hanabin asan susunetin. Kun gardaban ardubin asan asui dakuli ayam, bo tanaaran anin ayaryar manengban tarre, do anin labolingan galuli. “Saulo Saulo gamle bo mandra agugudingnetid ati Saulon amdanggetin! Aman itin asan do’ng hen tamdertihn?” Saulon ualetin, “E gamang aman butin?” Jisun anin adong abyar birretin, “Hen Jisun. Butinti adong aman tamderte!”

Ansaring Saulon dinetin, do anin adgijed. Bar Anin aturdu maranji Damasikaban urrungleji. Saulon yagi dinna sikoija itidja adjumed orde adgaed.

Damasika garda lingan Anania gamle bo hanangna mar dakuli. Kitungan anin ado’ng gametin, “Saulon adarakunaba yirra. Anin yanti gamle gijle raptite anti asan aman sinam alanankan dakkua.” Bindo Ananian gametin, “E gamang, kan amandra dirna maranji adong yan gamle tamderretin antati hen amdanglai.” Kitungan anin adong jalangle gametin, “Yirra! Ahim hen Jiudinji do bigarda ompunji amangban appingbabin asan anin adong hen sedalai. Anin ahim hen asana ten kanalkalan hangte.”

Bar Ananian Saulon amangban iyetin, anin bagu asin alanankan dakkuetin, do gametin, “Jisun, yanti gamle aman gijle raptite, do Marid Janggardan bati barij dete, antiasan Jisun, butinti tanggor lingan mangba nam abgijnetin, anin mangbanam appaientin.” Tabdung Saulon gijle raptietin, do Ananian anin adong tabbubdaetin. Ansaring Saulon Janumjuman jumetin do bar okij ranadon hanggetn

Anti ati dean dele Saulon Damasika lingan Jiudinji amangban hanangan tietin. Anin gametin, “Jisun na aon Kitungan!” Jiudinji kilkal killamgi deleji itin asan gamlenden Saulon dirna maranji ado’ng tuabbin asan eretin guijetin, do nami anin Jisun amang dirnetin! Saulon Jiudinji ampra baddi birnetin. Anin Jisun na Messian gamle absuijetin.

Ateng dinnan atiki, Jiudinji Saulon ado’ng atuabbin asan gabri birrinji. Aninji anin ado’ng tuabbin asan gardaban mandranji adong gijgijbin asan appaileji. Bindo Saulon aninji aganabri biranji amdanggetin, do aturdu maranji anin ado’ng solin ayirbin asan sayamleji. Bo togal aninji gardan akintalba anin adong abgegeleji. Saulon Damasika saring ardurlin atiki, anin Jisun apsele hanangan tiyle dakunetin.

Saulon anappai maranji ado’ng rabangbin asan Jirusalemban yiretin, bindo aninji anin ado’ng batongleji. Ansaring Barnabas gamle bo dirna maran Saulon ado’ng anappai maranji amangban urrunggetin. Saulon yan gamle anuyuban bati Damasika lingan hanagan tietin antati Anin aninji ado’ng oblinggetin. Anti atiki anappai maranji anin ado’ng jaleji.

Dajinganti dirna maranji butinti Jirusalem lingan tanamderan ayamlingan sangai Antiyok gardaban yirreji do aninji Jisun apsele hanangan iyle tieji. Antiyok lingan ateng mandranji Jiudinjitid, bindo abmang tra, bigarda maranji dirna mar deleji. Tabme dirna maranji adong bar okij Jisun abirna hanghangbin asan do ranukun arabdubin asan Barnoban do Saulon tidti yirreji. Antiyok lingan ababmang Jisun adirna marji adong Kristumar gamle ganudingan deleji.

Bo dinna, Jisun asanandung maranji Antiyok lingan anumna garbirlinji. Marid Janggardan aninji adong gametin, “itinti abara alumbin asan hen aninji adong gudinglaiji anti asan hen apsel Saulon do Barnoban adong bigarda abmebaji.” Bar Antiyok ranuku lingan Barnoban do Saulon alaninka asinji dakule garbirreji. Ansaring aninji aninji adong Jisun apsele bangsanobling biran oblingbin asan bigarda bigarda darakunaban appaileji. Barnoban do Saulon bigarda bigarda mandranji aompunji hanghangleji, do ateng mandranji Jisun amang dirrinji.