40. Arakaddang lingan Jisun Anamdaijan Deli

Jisun ado’ng sanuna maranji pudying birrenji atiki, anin ado’ng arakaddang lingan amdaibin asan aninji pangleji. Anin uanti arakaddang lingan kahidti ante ati anin ado’ng abtambeleji.

Sanu maranji Jisun ado’ng, ‘Ajangbob’ gamle bo darakunaban urungleji do anin asi lingan do ajing lingan arakaddang lingan tangleji. Bindo Jisun gametid, “E Uang, aninji ado’ng tabmadaji, itin asan gamlenden aninji itin lumteji antati ad-galameji.” Anin abob ban arakaddang lingan aninji arabmadan idolle tangleji. Kan ati ednegoi birnan dakuli, “Jiudinji Araja.” Kan ati Pilaton idolba gamle oblingetinji.

Jisun asindri asan sanu maranji aninji rurdilinji. Angante kan ati aninji lumleji, tungmadgij biran anoblingan adelin ati anojoraiyan deli, “Aninji sindri hen bantilinji, do ranotud hen asan aninji rurdilinji.”

Etigoi janang sanu maranji bagu jumbir maranji ado’ng arakaddang lingan amdaileji, Jisun bagu manengba dakuleji. Jumbir marlingan saring bo mandra Jisun ado’ng pudying biretid, bindo okij bo mandra anin ado’ng gametid, “Kitungan do’ngnam padradamtid ati aman abatongam po? Anlen ateng er-bangsa baran alumlabin asan anlen dusa marji, bindo kan a mandra er-danusa mar.” Saletin anin Jisun ado’ng gametid, “Angante aman Rajam lingnam Raja detam do’nghen abasuyim gamle ayimih.” Jisun anin ado’ng jalangle gametid, “Nami adinna aman hen ampra Parodisan dakutam.”

Jiudi anabhana maranji do onla maranji saring ateng biggada mandranji Jisun ado’ng pudying birreji. Aninji anin ado’ng gamleji, “Bogad aman Kitungan a-on den, arakaddangan saring ladsonai do aman rab rabdamna! Eti den tum anlen manglingnam a dirtinai.”

Kun ayaman tamban dakuli janang den, Saletin kudduban adisa riyang lingan lungaddam deli. Tamban a-uyung yagi gonta sikoija barij lunguddam dakuli.

Saletin Jisun uai sarangle edanetid, “Nami Tadkudli! E uang, purarda hen nami silingnam surpidtai.” Saletin anin labdui boblin a-janggardan omdaetid. Angante anin kahidli, kun ayam lingan titti yurlon deli. Sarebasingan alung, uanti asindri mandran do Kitungan adarakuna adanang kaban janang lingkan saring jaitan sikkoja ri’edle bagu deli.

Anin a karahindan sanle, Jisun Kitungan amangan ayirbin asan tangoran ri-e-tid. Angante Jesus aturturetid asanumar kudduban adelin ati gijle gametid, “Sakkai na, kan amandra er-danusa dakuli. Anin Kitungan a onan na.

Saletin bagu Jiudinji abmanggod maranji Josepon do Nikodimos yirre Jisun ado’ng apangbin asan Pilaton ado’ng oblingleji. Aninji Jisun Messian gamle dirrinji. Ado’ngan sindrin batti yumleji, do arengan batti sanubjan adelin a kintalod alungan pangle dakuleji. Ante saring aninji garan naban bo surda a’rengan godaile a-mukaban rubleji.