8. परमेश्‍वर युसुफ नङ दोऊ पेरङ रा बचई।

गोप बोषङु ज्ञपतिङ, याकुब गतपो वंऊ जेऊ तोइ, दत दोक एनु एपो छङ युसुफ रा दोऊ बियम रा खोनमा पिनु दो छुमा पोऊ शालङ रा खोनि तोइ।

युसुफु बियम पङ दोरा हत माडामा लई तोइ छु लोननङ दोऊ अपा दोरा हत बेन्‍नङ लइ तोइ अला ओदोक युसुफुस मंङ तंऊ तोइ कि दो दोपोऊ राजा वंऊ जेई। दत युसुफ एनु बियम पोउरा तु दत दोपङ सिङुस दोरा चुमु पिनु दत दोरा नुकुरु रा रंई-छोंई मीपङरा रंऊ पिनु।

कयुमु पोलठतमंऊ होमशित युसुफु बियम पङक युसुफु गस्‍कुला रा फशु तेतु शुईऊ नऊ चंऊ पिनु। दत दोक दो गस्‍कुला एनु अपा रा कनु दत दो ओशि सुनचति कि उङि बोनऊ छुमास युसुफ रा सतु पिनु तोइ। याकुब हत परेशान वंऊ तोइ।

नुकुर रा रंई-छोंई मी पङ युसुफ रा मिस्‍त्रु कयुफु जेऊ। नील लुङफऊ थोचलङ बोसतु मिस्र इत चेई नङ गोप सोततिङ सा देशङ तोइ। दो नुकुर रा रई-छोंई मी पङ युसुफ रा इत जिमिदार सरकारी ओफसोर मीऊ रा नुकुर जुरऊ रंऊ पिनु। युसुफुस एनु राजा रा एपो से खोनु, अला परमेश्‍वरुस युसुफ रा बोरङ खेऊ।

दोऊ मालिकु योबलङक युसुफ नङ ञोनमा जुराशु, युसुफुस परमेश्‍वरु खिलाफ पाप लमा रा मना लऊ। दो हत छिङना तंऊ अला युसुफु थोरिङ कवश कमचित जुरऊ, ओदोक दोरा चुमु जेलु किऊ पिनु। दत जेलु लि, युसुफ परमेश्‍वरु थोरिङ हत सोचचा तोइ, दत परमेश्‍वरुस दोरा बोरङ खेऊ।

निश बोषङु ज्ञपतिङ, युसुफ अला लि जैलु तोइ, दो हत पापङ खोता तोइ। इ गोङक, फिरोन, जोदे मिस्‍त्रु मी पङ एनु राजा पङरा कुति तोइ, दोक निश मङ तंऊ दोपङक दोरा हत परेशान लऊ पिनु। दोरा दो मङु मोतलब उङ लि लोमा मली।

परमेश्‍वरुस युसुफ रा मङु मोतलब लोमा सोतिङ खेऊ, दत फिरौनुस युसुफ रा जेलुस एनु रा कुतु। युसुफुस दोरा दोऊ मङु मोतलब लोऊ दत, “परमेश्‍वर शिनिश बोषङु गोप फौलङ चोमा मति, दत दोऊ शिनिश बोषङ ज्ञपतिङ मुलुकु अकाल पिनि।

फिरौन युसुफु रत ओनचे गरीस तोइ कि दोगुस दोरा मिस्‍त्रु निश थौनतु शेच्‍चन फोबलङ चुनऊ पिनु।

युसुफुस मीपङरा एपो फोलङ सा शिनिश बोषङ दोमया गोप फोलङ कटठा लऊ तामा लोऊ। दत शिनिश बोषङु अकाल तु दत युसुफुस मी पङ रा दो ब्रू रंऊ पिनु दत दोपोऊ रा जामा शितिङ गोप फोलङ वङरो।

दो अकाल लेम मिस्रुओ मेन, अला कनानु लि हत कोचङ तोइ ओदा याकुब नङ दोऊ पेरङ पोसि तोइ।

ओदोक याकुबुस एनु थोनतु चेइ छङ रा ब्रू छोङमा शितिङ मिस्र पिनु। दत दोपङ ब्रू छॊङमा युसुफु तुसिङ डेन वंऊ दत दोपङ बियंम पङ युसुफ रा मा ठोतु। दत लि युसुफुस दोपङरा ठोतु।

जि खोदामा शितिङ कि छै दोपङ लेखु आ मालेखु दोपङरा खौनु ज्ञपतिङ, युसुफुस दोपङरा लोऊ, “ग किमपोऊ बियम युसुफ तोक। था बेरिश। दोसपरिङ किमपङ अङरा नुकुरु रुअङु रंऊ पिनु तोइ दत किमपङक हलम कर्म लमा सुनचतु तोइ, दत परमेश्‍वरुस दो हलम रा एपो शितिङ जुरऊ तोइ। जिरश अला मिस्‍त्रु पोसमा दत ग किमपोऊ नङ किमपोऊ पेरङ रा थकतु इन्‍तजाम लमा लीरोक।”

छङ युसुफु बियम कयुमु पोलठतु तु दत एनु अपा रा लोऊ युसुफ अला लि सारस तोइ दत लि हत गरीस तोई।

दत याकुब इत गतपो मी तोइ दत लि दो एनु पेरङ नङ ञमफो मिस्र जेऊ पिनु, अला दोपङ दा बोसतु पिनु। याकुबु सीमऊ होमशित, दोक एनु सिङ छङ पङरा बोरङ खेऊ।

परमेश्‍वरुस दो वादा अब्राहम नङ लऊ तोइ दो इसहाक नङ दोऊ ज्ञपतिङ याकुब, अला दोऊ ज्ञपतिङ दोऊ सनिश छङ नङ दोऊ पेरङ पोऊ थोरिङ तु तोइ। दो सनिश छङक पोऊ वंश इस्राएलु सनिश गोत्र वंऊ जेऊ।