28. इत शरा साहुकार शासक।

इ दयार, इत शरा साहुकार यीशूउ रा तु दोरा शूउ, “हे गुरु, एपो जोलोम गिनमा शितिङ अङरा छे लमा वई? यीशुस दोरा लोऊ, “का अङरा ‘एपो’ छु रिऊ? लेम इत ओ एपो तोइ अला दो लेम परमेश्‍वर तोइ? दत लि का ऐपो जोलोम गिनमा तोननङ परमेश्‍वरूस रिङमिन दो गोमा।”

“अङरा छे-छे कमचित पङ गोमा गिनमा? “दोक शुउ। यीशुस जवाब खेऊ, “उङरयो मासतमा, हलम मासुनचतमा, चोरस मालमा, रंऊ अमा नङ अपऊ आदर लमा, अला रंऊ खयुमदेस रा रंऊ खौता बेन्नङ लमा।”

दत दो शरा फोबलङकुस लोऊ, “ग रंऊ चिगितुस ओ जि सिङ रिङमिन पङ लऊ तु। अङरा सोदायो जिंदा पोसमा शितिङ अला लि छे लमा वई?” यीशुस दोरा खोनु अला दोरा गोरङ लऊ।

यीशुस जवाब खेऊ, “दत का सिदद वङमा गिनमा तोननङ जेऊ रंऊ सिङ- सङ रंऊ पिन अला दो रुपया मेतपो मीपङरा बाँटऊ पिनमा, अला कनरा स्‍वर्गु रूपया पोरति। दत तु अङ ज्ञपतिङ वंऊ पिन।”

छेलि यीशुस लोऊ दत दो शरा फोबलङकुस गोऊ दत दो खरोसु पोसु, छु लोननङ दो हत साहुकर तोइ अला दोक एनु सिङ जङ-मूल खेमा मागिनि तोइ। ओदोक दो यीशूउ तुसिङक पोलठतु जेऊ पिनु।

दत यीशुस एनु चेला पङरा लोऊ, “परमेश्‍वरू राज्‍यु साहुकर मीपङरा तुमा हत मुश्‍कोल तश। हां, इत साहुकर फोबलङक परमेश्‍वरू राज्‍यु तुमा बसकयङ ऊङि ऊँटु केपु मीस वंऊ जेऊ हनतमा एपो तश।”

छेलि यीशुस रिंऊ चेला पङ गोऊ दत दोपङ बिंऊ पोसु। दोपङक लोऊ, “दत जि ओशि यो तोननङ परमेश्‍वर ऊङरा बचइ?

यीशुस चेला पङरा खोनु दत लोऊ, “मीपङरा शितिङ रङरा बचामा मुशकोल तश। दत लि परमेश्‍वरू शितिङ छेलि लमा मुश्‍कोल मतेइ।”

पतरसुस यीशु रा लोऊ, “निङपङ सनिश चेला रंऊ सिङ- सङ सोठऊ कन ज्ञपतिङ वंऊ जेऊ तोश। दत निङपोऊ तोफा छे वङरो?”

यीशुस जवाब खेऊ, “सिङ मी पङ दोपङक अङ लमिन कयुम, अचो, अमा, अपा, चिगजा अला एनु सिङ-सङ सोठऊ, दोबसकयङ ज्ञा गुना खुचि पोरति अला एपो जोलोम लि पोरति। दत गोप पङ दो होमशित तोइ दोपङ ज्ञपतिङ वई, अला गोप पङ ज्ञपतिङ तोइ दोपङ होमशित वई।”