9. परमेश्वर मूसा ला बुलावसे

यूसुफ को मरन को बाद मा ओका पूरा रिश्तेदार मिस्र माच बस गया |वय अखिन उनका खानदान कई साल वरी मिस्र माच रया अखिन उन बहुत लेकरू पैदा करीन | वय इस्राएलि भया |

कई साल को बाद मा, इस्राएलिहिन की संख्या बहुत बढ़ गई होती | अखिन मिस्र का आदमी आता एन बात लक खुश नोहता की उनकी मदत करण लाइक यूसुफ न बहुत काही करी होतीस | वय इस्राएलिहिन सीन डर गया काहेकी वय संख्या मा जास्ती होता | एकोलाइक वन समय मा मिस्र पर अधिकार राखने वालो फिरौन न इस्राएलिहिन ला मिस्रीइन को दास बनाय लेइस|

मिस्रीहिन न इस्राएलीइन ला बहुत सारी इमारत अखिन यहान वरी की कई गाँवहिन ला बनावन लाइक मजबूर करिन | वन कठो मेहनत न उनको जीवन ला बहुत दु:ख माय बनाय देइस, पर परमेश्वर न उनला आशीर्वाद देइस अखिन उनला अखिन जादा लेकरू पैदा भया |

फिरौन न देखीस की इस्राएलिहिन का बहुत जादा लेकरू पैदा होय रया सेती, एकोलाइक वन आपरो लोकहिन ला इस्राएलिहिन को पूर्ण नर टूराइन ला नील नदी मा फेक सारी मार देंन को हुकुम देइस |

एक इस्राएलि बायको न एक नर टूरा ला जन्म देइस | वन अखिन ओको नवरा न जेतरो उनको सीन जमेव वन टूरा ला लुकाय के राखिन |

जब वन टूरा का माय - बाप ओला अखिन जादा नहीं लुकाय सीकिन, त उन ओला मरन लक बचावन लाइक एक तैरन वाली टोपली मा नील नदी को किनारो पर सेनाइन को बीच मा राख़ देइन | ओको मोटों बहिन न यव देखन लाइक ओकी निगरानी करिस की ओको संग का होए |

फिरौन को टुरी न वन टोपली को अंदर मा झांकिस | जब वन एक टूरा ला देखीस त वन ओला आपरो टूरा को रूप मा लेय लेइस | वन एक इस्राएली बायको ला ओला दूध पीवावन लाइक काम पर राख़ लेइस, बगेर यव जानेव की वा वन टूरा की सही की माय होती | जब ऊ टूरा येतरो मोठों भए गएव की आता ओला आपरो माय को दूध की जरूरत नोहती, त वन फिरौन को बेटी जवर सोवाय देइस, ओको नाव मूसा होतो|

एक दिवस, जब मूसा मोठों भय गएव होतो, त वन देखीस की एक मिस्री एक इस्राएली ला मार रही से | मूसा न आपरो संगी इस्राएली ला बचावन की कोसीस करिस |

जब मूसा न बिचार करिस की ओला कोई नहीं देख त वन ओला मिस्री ला मार डाकिस अखिन ओको लास ला गाड देइस | पर मूसा न ज़ेव करिस होतीस ओला कोइन देख लेइ होतीस |

फिरौन ला मालूम भय गएव की मूसा न का करीसेस | वन ओला मार डाकन की कोशीश करिस, पर मूसा मिस्र लक जंगल मा पराय गएव | फिरौन का सैनिक ओला वाहा डुंड नहीं सकिन |

मिस्र लक दूर जंगल मा मूसा एक सेरकी बन गएव होतो | वन वाहा एक बायको सीन बिया कर लेइस अखिन दुय टुरा पैदा करिस |

मूसा आपरो सुसरो की भेड़इन को झुंड की देखरेख करत होतो| एक दिवस, वन एक जरती झाड़ी ला देखीस जाय बूजेव बिना जरत होती| ओला देखन लाइक ऊ वन झाड़ी को जवर गएव | जब ऊ ओको बहुत जवर होतो त परमेश्वर न ओकोसीन बात करिस | वन कहीस, “ए मूसा, आपरो जूताहिन ला उतार दे| तू एक पवित्र जागा पर ऊबो सेस|”

परमेश्वर न कइस, “मीन आपरो लोखहिन को दु:ख ला देखीसेव | मी तोला फिरौन जवर धाडु की तू इस्राएलीहिन ला मिस्र को गुलामी मालक निकाल जो | मी उनला कनान देश देऊ, ऊ देश जोकों मीन अब्राहम, इसहाक अखिन याक़ूब सीन वादा करीसेस|”

मूसा न पूछिस, “अगर लोखहिन न जानन की कोसीस करींन की मोला कोन धाड़िसेस त मी का काहू?” परमेश्वर न कहीस, “जो मी सेव ऊ मी सेव | उनको सीन बोलो, ‘मी सेव न मोला तुमरो जवर धाड़िसेस |’ उनको सीन यव भी बोलो, ‘मी तुमरो पूर्वज अब्राहाम, इसहाक अखिन याक़ूब को परमेश्वर यहोवा सेव |’ मोरो यव नाव सदा को से |”

मूसा डरात होतो अखिन फिरौन को जवर जनला पसंद नहीं करत होतो काहेकी वन बिचार करिस की ऊ साजरों लक नहीं बोल सीके, एकोलाइक परमेश्वर न मूसा को भाई, हारून, ला ओकी मदत करन लाइक धाड़िस |