42. यीशु स्वर्ग ला वापिस जासे

जोन दिवस मा परमेश्वर न यीशु ला मरेव मालक जीतो करिहोतीस , ओका दुई चेला जवर को गाँव मा जात होता | चलता वय यीशु को संग जो भएव होतो | ओको बारे मा बात करत होता , ऊनला आशा होती की ऊ मसीह होतो , पर तब बी ओला मार डाकिन | आता वय बायका कसेत की वय मंग अदिक जीतो होए | वय नहीं जानत होता की कोनसों बात पर विश्वास करनोसे |

यीशु न उनको जवर आय सारी उनको संग चलनों सुरू करिस , पर वय ओला पहचान नहीं सीकिन | वन खबर लेईस की वय कायको बारे मा बात करत होता | ऊन ओला उन दिवस मा यीशु को संग भई पुरो घटना को बारे मा सागीस | ऊन सोच विचार करीन की वय कोण परदेशी सीन बात करत होता जेला नहीं जानत होता की यरुशलेम मा का भएव होतो |

तब यीशु न ऊनला समझाईस की परमेश्वर को वचन मसीह को बारे मा का कसे | बहुत पहेले , भविष्यद्वक्ताहिन न कहिन होतीन की खराब लोख मसीह ला दुखित करेती अखिन मार डाकेती | पर भविष्यद्वक्ताहिन न यव भी कई होतीन की ऊ तीसरों दिवस जीतो होए |

जब वय वन नगर मा आया जहां वय दुई जन रुकन ला देखत होता , तब वरी लगभग दिवस बुड़ गएव होतो | ऊन यीशु ला उनको संग रुकन लाईक बूलाईन होतिन , अधिक ऊ उनको संग एक घर मा गयव | आपरो दिवस बुड़ता को खानो खान लाईक वय बस गया | यीशु न एक रोटी ला धर सारी ओको लाईक परमेश्वर ला धन्यवाद देईस , अखिन मंग ओला तोड़िस | एकदम लक , ऊन जान लेईन की ऊ यीशु आए | पर वन समय मा , ऊ उनको डोरा को सामने अल्प भय गएव |

वन दुई जनहिन न एक दूसरों सीन कहिन , “ ऊ यीशु होतो ! येकोलाईक जब ऊन आमला परमेश्वर को वचन लक समझाई होतीस त आमी बहुत मजा मा होता ! ” वंधावरच , वय निकल सारी वापिस यरुशलेम ला गया | जब वय आया त ऊन चेलाहिन ला सांगिन , “ यीशु जीतो से ! आमी वोला देखा सेजन ! ”

जब चेला गीन बात करतहोता , यीशु एकदम लक वन कमरा मा उनको संग प्रकट भएव | वन कहीस , “ तुमला शान्ति मिले ! ” चेलाहिन न सोचिन की ऊ कोई भूत होए , पर यीशु न कहीस , “ तुमि कायला डरासेव ? तुमि कायला यव नहीं सोचो की यव सही मा मी , यीशु आव ? मोरो हाथहिन ला अखिन पाहेहिन ला देखो | भूतहिन को जवर असो देह नहीं रव जसो मोरो जवर से | ” यव देखावन लाईक की ऊ कोई भूत नोव्हतों , वन खान लाईक काई मागीस | ऊन्न ओला मसरी को एक टुटका देईन , अखिन वन ओला खाय लेईस |

यीशु न कहीस , “ मोरो बारे मा परमेश्वर को वचन जो काई भी कसे ऊ सही होए | मीन तोला सांग देए होतो की येकों होनों अनिवार्य से | ” तब यीशु न उनला परमेश्वर को वचन ला साजरों लक समझाईस | वन कहीस , “ बहुत पहेले भविष्यद्वक्ताहिन न लिखिहोतीन की मोला , मसीह ला दु:ख जेलनों पड़े , मरनों पड़े अखिन मंगअदिक तीसरों दिवस मृतकहिन मालक जीतो होनोपड़े | ”

“ वन भविष्यद्वक्ताहिन न यव भी लिखिन होतीन की मोरा चेला परमेश्वर को वचन ला संगेती | वय हर एक ला माफी मांग लाईक सांगेती | अगर वय असो करसेती त परमेश्वर ऊनको पापईन ला माफ करे | मोरो चेला येन सन्देश को प्रचार करणो यरुशलेम लक सुरू करेती | तब वय पुरो जातीहिन मा जायेती | तुमि लोख मोरी हर एक बात अखिन काम का गवाह सेव जो मीन कहेव अखिन करेव होतो , अखिन वन पुरो को भी जो मोरो संग भएव होतो | ”

दूसरा चालीस दिवस को अंतराल मा , यीशु आपरो चेलाहीन पर कई बार प्रकट भएव | एक बार त ऊ एकच समय मा 500 लक जादा लोखहिन पर प्रकट भयव ! वन आपरो चेलाहिन पर कई तरीका लक साबित करिस की ऊ जीतो होतो , अखिन वन ऊनला परमेश्वर को राज्य को बारे मा शिक्षा देईस |

यीशु न आपरो चेलाहिन सीन कहीस , “ परमेश्वर न मोला स्वर्ग अखिन पृथ्वी का हर एक जन पर राज्य करण को अधिकार देइसेस | येकोंलाईक आता मी तुमरो लक कसु: जाय सारी पुरो जाती का लोखहिन ला चेला बनाओ | असो करण लाईक , तुमला उनला बाप , टूरा , अखिन पवित्र आत्मा को नाव लक बपतिस्मा देनो से | जो काई भी मीन तुमला कहिसेव वन पुरो बातहिन ला मानन ला तुमला उनला सिखावनों से | याद राखो , मी सदा तुम्हारों संग रहु | ”

यीशु को मरेव मालक जीतो होन को चालीस दिवस को बाद मा , वन आपरो चेलाहिन सीन कहीस , “ जब वरी की मोरो बाप तुमला सामर्थ नहीं दे तब वरी यरुशलेम मा रुकया रहो | ऊ तुमरो पर पवित्र आत्मा धाडन को द्वारा असो करे | ” तब यीशु स्वर्ग मा चली गएव , अखिन एक बादर न ओला उनको नजर मा अल्प भएगएव | स्वर्ग मा यीशु पुरो चीजहिन पर राज्य करण लाईक परमेश्वर को उजो आंग बस गएव |