40. यीशु ला सूली पर चडायेव जासे

यीशु को मजाक करण को बाद मा , सैनिक ओला सूली पर चडावन लाईक लिजाहिन | ऊन वन सूली ला ओको सीनच उठवाहीन जेकों पर ऊ मरने वालो से |

वय सैनिक यीशु ला वन जागा पर धर सारी आया जेला “ खोपड़ी ” कसेत अखिन ओको हाथहिन ला अखिन पायहिन ला सूली पर ठोक देईन | पर यीशु न कहीस , “ अ बाबूजी , इनला माफ करजो , काहेकी ये नहीं जानत की ये का कर रया सेती | ” ऊन्न एक पाटी ला ओको डोसकी को ओरत्या हिलगाय देहिन | ओको पर लिखेव होतो , “ यहूदीहिन का राजा | ” पिलातुस न ऊनको सीन यवच लिखन लाईक कहिहोतीस |

तब सैनिकहिन न यीशु को कपडाहिन लाईक चिट्ठी डाकिन | ऊन असो करीन त ऊन वन भविष्यदवाणी ला पुरो करिस जा बोलत होती , “ ऊन्न मोरो कपड़ाहिन ला आपरो मा बाँट लेईन , अखिन मोरो कपडाहिन लाईक चिट्ठी डाकिन | ”

वहाँनी दुई डाकू भी होता , जीनला सैनिकहिन न वनच बेरा मा सूली पर चडाहिन होतीन | ऊन्न ऊनला यीशु को दुई बाजू ला राखिन होतीन | उनको मालक एक डाकु न यीशु को मजाक ऊड़ाईस , पर दूसरों न कहीस , “ का तू नहीं डरस की परमेश्वर तोला दंड देए ? आमी बहुत सारा गलत कामहिन को वजह लक दोषी सेजन , पर यव आदमी निर्दोष से | ” तमंग वन यीशु सीन कहीस , “ जब तू आपरो राज्य मा आवजों त कृपा कर सारी मोला याद राखजो | ” यीशु न जवाब देईस , “ अजच तू मोरो संग स्वर्गलोख मा होजो | ”

यहूदी गुरुहीन अखिन भीड़ का दूसरा लोखहिन न यीशु को मजाक उड़ाईन | ऊन्न उनको सिन कहिन , " अगर तू परमेश्वर को टुरा आस , त सूली पर लक खालत्या उतर सारी आव अखिन खुद ला बचाए ले ! तब आमी तोरो पर विश्वास करबीन | ”

तब वन पुरो देश की बादर पुरो तरीका लक कारी भए गयी , भले ऊ दिवस को बीच को समय होतो | यव दुपार को समय मा कारो भएव होतो अखिन तीन घंटा वरी असोच रहेव |

तब यीशु न भुलाए सारी कहीस , “ पुरो भएव ! अ बाबूजी , मी आपरि आत्मा तोरो हाथहिन मा देशु | ” तब वन आपरो डोसकी ला झुकाईस अखिन आपरो प्राण ला छोड देईस | जब ऊ मरेव त एक भूकम्प आएव | ऊ मोठो पर्दा जो परमेश्वर को उपस्थिती लक लोखहिन ला अलग करत होतो ओरत्या लक खालत्या वरी फाट सारी दुई भाग भए गया |

आपरो मृत्यु को द्वारा , यीशू न लोखहिन को लाईक परमेश्वर को जवर आवन को मार्ग खोल देईस | जब यीशु को जागवाली करने वाला एक सैनिक न जो काई भएव होतो यव पुरो देखीस त वन कहीस , “ निश्चित रूप लक , यव आदमी निर्दोस होतो | यव परमेश्वर को टुरा आय | ”

तब युसुफ अखिन नीकुदेमुस नाव का दुई यहूदी गुरु आया | वय विश्वास करत होता की यीशुच मसीह होतो | ऊन्न पिलातुस लक यीशु को देह ला मांगिन | ऊन्न ओको देह ला कपडाहिन मा लपटीन | तब वय ओला एक चट्टान मालक काट सारी बनाई गई कब्र मा लिजाहिन अखिन ओको अंदर राख देईन | तब ऊन्न वन कब्र को दरवाजो ला बंद करण लाईक एक मोठों गोटा ला गड़लाए देईन |