35. दयालु बाप की कहानी

एक दिवस , यीशु वन बहुत सारा लोखहीन ला शिक्षा देत होतो जो ओला आयकन लाईक जमा भया होता | ये लोख चुंगी लेन वाला अखिन संगच दूसरा लोख भी होता जीन मूसा को व्यवस्था ला पालन करन की कोसिस नहीं करि होतीन |

काई धार्मिक अगुवाहिन न देखिन की यीशु एन लोखहीन सीन एक संगी को जसो बात करसे | एको लाईक ऊन एक दूसरों सीन यव कव्हनो सुरू कर देईन की ऊ गलत करत होतो | यीशु न ऊनला बात करता आयकिस , एकोलाईक वन ऊनला या कहानी सांगिस |

“ एक आदमी होतो जोका दुई टूरा होता | लाहान टूरा न आपरो बाप सीन कहीस , ‘ अ बाबूजी , मोला आता मोरो हिस्सा देयदे ! ’ अना बाप न आपरो दूई टूराहिन को बीच मा आपरो सम्पत्ति को बंटवारा कर देईस | ”

“ जलदीच लाहान टूरा आपरो पुरो काई जमा करसारी दूर को देश मा चली गएव अखिन पापी जीवन जीवन मा आपरो पुरो धन ला बर्बाद कर देईस | ”

“ एको बाद मा , जहाँ लाहान टूरा होतो वन देश मा एक भयंकर धूसकाड पड़ेव , अखिन ओको जवर भोजन लेन लाईक पैसा नोव्हता | एकोलाईक ओला जो काम मिलेव ऊ सूअरहिन ला चारावन को होतो | ऊ एतरों दु:खी अखिन भूकों होतो की ऊ सूअरहिन को खानों खान ला देखत होतो | ”

“ आखरीमा , वन लाहान टूरा न खुद लक कहिस , मी का करुसू ? मोरो बाप को पुरो नवकरहिन को जवर खान ला बहुतसारो से , तरी मी यहाँ भूको मर रहीसेव | मी आपरो बाप जवर वापिस जाऊ अखिन आपरो बाप को एक नवकर बनन लाईक ओको सीन विनती करू | ”

“ अना वन लाहान टूरा न वापिस आपरो बाप को घर कर जानो सुरू करिस | जबकि ऊ आब दुरच होतो , ओको बाप न ओला देखीस अखिन ओको पर तरस खाईस | ऊ दौड़ सारी आपरो टूरा जवर गएव अखिन ओला गरो लक लगासारी चूमा लेईस | ”

“ वन टूरा न कहीस , ‘ अ बाबूजी , मीन परमेश्वर को अखिन तोरो विरद्द पाप करिसेव | मी तोरो टूरा कव्हान को लाएक भी नाहाव | ”

“ पर बाप न आपरो एक नवकर सीन कहीस , ‘ जल्दीच जायसारि सबलक अच्छों कपड़ा धर सारी आओ अखिन मोरो टूरा ला पेहरावों | मांग सबलक साजरों बछड़ा ला मारो ताकि आमी खबीन अखिन आनन्द मनावबिन , काहेकी मोरो टूरा मर गएव होतो , पर आता ऊ जिंदो से ! ऊ घूम गएव होतो , पर आता आमी न ओला डुंड लेया सेजन ! ”

“ एकोलाईक लोखहीन न आनन्द मनावनों सुरू करिन | काई समय जान को बाद मा , मोठों टूरा खेत लक काम कर सारी घर वापिस आएव | वन गीत अखिन नाचन की आवाज ला आयकिस अखिन अचम्भित भएव की यव का होए रहीसे | ”

“ जब मोठों टूरा ला मालूम भएव की वय एकोलाईक आनन्द करत होता काहेकी ओको भाई घर आय गएव होतो , त ऊ बहुत गुशा भएव अखिन घर मा नहीं गएव | ओको बाप न बाहेर आयसारि ओला ऊनको संग आनन्द करन लाईक निवेदन करिस , पर वन मना कर देईस | ”

“ वन मोठों टूरा न आपरो बाप सीन कहीस , ‘ एन पुरो साल मा मीन तोरो लाईक निष्ठापूर्वक काम करिसेव ! कदीच मीन तोरो बात ला नहीं टारेव , पर तुन कबी मोला लाहान सेरी भी नहीं देएस की मी आपरो सांगिन को संग दावत करू | पर तोरो एन टूरा न तोरो धन ला पापी कामहिन मा बर्बाद कर देइसेस | अखिन आब जब ऊ आई से त ओको लाईक आनन्द करन लाईक तुन सबलक साजरों बछड़ा ला मर देएस ! ”’

“ बाप न जवाब देईस , अ मोरो टूरा , तू हमेशा मोरो संग से , अखिन जो मोरो से ऊ सब तोरो से | पर आमरो लाईक आनन्द कारणो सही से काहेकी तोरो भाई मर गएव होतो , पर आता ऊ जिंदो से | ऊ घूम गएव होतो , पर आता आमी न ओला डुंड लेया सेजन ! ”’