22. यूहन्ना को जन्म

सुरूवात मा , परमेश्वर न आपरो भविष्यद्वक्ताहिन सिन बात करी होतीस एकोलाईक वय लोखहिन सिन बात करि होतीन | पर वन समय लक मंग अदिक 400 साल जात वरी वन उनको सिन बात नहीं करिस | तब परमेश्वर न जकर्याह नाव को याजक जवर एक स्वर्गदूत ला धाड़िस | जकर्याह अखिन ओकी बायको एलिशिबा परमेश्वर को आदर करत होता | वय बहुत बुडगा भय गया होता , अखिन ओला कोई लेकरू पैदा नहीं भया होता |

वन स्वर्गदूत न जकर्याह सिन कहीस , “ तोरों बायको ला एक टूरा पैदा लेए | तू ओको नाव यूहन्ना राखजो | परमेश्वर ओला पवित्र आत्मा लक परिपूर्ण करे , अखिन यूहन्ना लोखहिन ला मसीह मा आवन लाईक तैयार करे | ” जकर्याह न जवाब देईस , “ मी अखिन मोरी बायको लेकरू पैदा करण लाईक बहुत बुडगा भये गया सेजन ! मी कसो जानु की तुमी मोरो सिन सही बोलसेव ? ”

वन स्वर्गदूत न जकर्याह ला जवाब देईस , “ तोरों जवर एन शुभ संदेश ला आनन लाईक मी परमेश्वर को द्वारा धाड़ि गईसेव | काहेकी तुन मोरो पर विश्वास नहीं करीसेस , एकोलाईक लेकरू को जन्म लेत वरी तू बोल नहीं सिकजो | ” वंधावरच , जकर्याह बोलनों बन्द कर देईस | तब ऊ स्वर्गदूत जकर्याह को जवर लक चलिगएव | एको बाद मा , जकर्याह घर वापिस आएव अखिन ओकी बायको पेट लक रही |

जब एलिशिबा छ: महिना पेट लक होती , त ऊच स्वर्गदूत अचानक एलिशिबा को रिश्तेदार पर प्रकट भएव , जोकों नाव मरियम होतो | मरियम कुंवारी होती अखिन बिहाया होनलाईक यूसुफ नाव को आदमी संग ओकी पायलगनी भई होती | स्वर्गदूत न कहीस , “ तू पेट लक रवजों अखिन एक टूरा ला जन्म देजों | तोला ओको नाव यीशु राखनो से | ऊ सबलक ताकतवर परमेश्वर को टूरा होए अखिन हमेशा लाईक राज्य करे | ”

मरियम न जवाब देईस , “ यव कसो होए , काहेकी मी त कुँवारी से ? ” वन स्वर्गदूत न समझाईस , “ पवित्र आत्मा तोरों पर आए , अखिन परमेश्वर की सामर्थ तोरों पर सावोली करे | एकोलाईक ऊ लेकरू पवित्र होए , अखिन ऊ परमेश्वर को टूरा होए | ” जो वन स्वर्गदूत न कहीस ओको पर मरियम न विश्वास करिस |

यव होन को बाद मा , मरियम न जायकर एलिशिबा सीन मिली | तसोच मरियम न ओको सीन नमस्कार लेईस , एलिशिबा को लेकरू ओको अंदर कूदेव | ऊनको लाईक परमेश्वर न जो काही करीहोतीस ओको बारे मा वय बायका एक संग आनन्दित भईन | एलिशिबा को संग तीन महिना रव्हन को बाद मा , मरियम घर वापिस भई |

एको बाद मा , एलिशिबा न आपरो टूरा ला जन्म देईस | जकर्याह अखिन एलिशिबा न वन टूरा को नाव यूहन्ना राखिन , जसो की वन स्वर्गदूत न आदेश देई होतीस | तब परमेश्वर न जकर्याह ला बोलन लाईक तैयार करिस | जकर्याह न कहीस , “ परमेश्वर की स्तुति होए , काहेकी वन आपरो लोखईन की मदत करण लाईक याद राखी सेस ! अ मोरो टूरा , तु सर्व - शक्तिमान परमेश्वर को भविष्यद्वक्ता होजो | तू लोखाहिन ला सांगजों की वय कसो आपरो पापहिन लाईक क्षमा प्राप्त कर सिकसेत ! ”