13. इस्राएलिहिन को संग परमेश्वर को वादा

इस्राएलिहिन ला लाल समुद्र पार करन को बाद मा , परमेश्वर उनला जंगल लक होकर सीनै कसेत वन पहाड़ कर लिजाइस | उ ऊच पहाड़ होतो जहाँ मूसा न जरतों झुनकुड़ ला देखि होतीस | वन लोखहिन न वन पहाड़ को खालत्या आपरो तम्बूहिन ला बनाहिन |

परमेश्वर न मूसा सीन अखिन इस्राइल का पूरो लोखहिन सीन कहीस , “ तुमला हमेशा मोरी बात ला मानो से अखिन जो वादा मी तुम्हारों संग बाधुसु ओला बनाय के राखो | अगर तुमि असा करसेव , त तुमि मोरो ईनाम बहुमूल्य धन , याजहिईन को राज्य , अखिन एक पवित्र जाती ठ्हरों | ”

परमेश्वर सिन उनको जवर आवन लाइक लोखहिन न तीन दिवस वरि आपलो ला तैयार करिन । तब परमेश्वर सीनै पहाड़ को सेंडी पर लक खाल्त्या आयेव । जबऊ आयेव तब भुकम्प भयेव , बिच चमकि , धुंगा निकलव , अखिन तुरहीहिन को जोरदार शब्द भयेव । तब मुसा खुद ऊपर पहाड़ पर चंगयेव ।

तब परमेश्वर न लोखहिन को संग एक वायदा करिस । वन कहिस , " मि तुम्हरो परमेश्वर , यहोवा आव । मिच आव जोन तुमला मिस्र को गुलामी लक छुड़ाईसेव । कोई दुसरो देवी देवताहिन की उपासना नोको करो । "

"मूर्तिहिन ला नोको बनाओ अखिन ओकी उपासना नोको करो , कहेकी मी , यहोवा , तुमरो एकमात्र परमेश्वर सेव | गलत तरीका लक मोरो नाव को उपयोग नोको करजो | सप्ताह को दिवस ला पवित्र मानन लाईक याद राखो | दूसरों शब्द मा , छ: दिवस मा आपरो पुरो कामहिन ला करो , सातवों दिवस तुमरो लाईक आराम करन लाईक अखिन मोला याद करन को दिवस रहे | ”

" आपरो माय बापको आदरकरो । हत्या नही करन को । गलत काम नही करन को । चोरी नही करन को । आपरो पडोसकी बायको , ओको घर , या ओको कोनतोच सामाहिन ला धरलेऊ असी इच्छा नही राखन को । "

तब परमेश्वर न इनला दस आज्ञाहिन ला गोटा को दुइ पाटीहिन पर लिखसारि मुसा ला देए देईस । परमेश्वर न पालन करन लाईक लोखहिन ला दुसरी बहुतसी व्यवस्थाहिन ला देईस । अगर ऊन यन व्यवस्थाहिन ला पालन करिन त परमेश्वर न वन लोखहिन ला आशिर्वाद देनको अखिन उनको बचाव करन को वादा करीसेस । पर उनको सीन कहिस कि अगर उन येको पालन नही करिन त ऊ उनला दंड देए ।

परमेश्वर न इस्राएलीहिन ला एकमोठो तंबू बनावन लाईक कईस मिलापवलो तम्बू । वन उनला साजरोच साजरोच सागीस कि एन तम्बुला कसो बनावनो से , अखिन ओको अन्दर कोनतो सामाईन ला राखनो से । वन उनला वन तम्बू ला दुई कमराहिन मा बाट देन लाईक एक अच्छो मोठो पर्दा बनावन लाईक कहीसे । परमेश्वर उन पर्दा को मघ वालो कमरा मा आहे अखिन वहाँ रहे । जहाँ परमेश्वर होतो वन कमरा मा जनकी अनुमति सिरप महयाजकहिन लाचहोती ।

वन लोखहिन ला वन मिलापवालो तम्बू को सामने एक वेदी ला बनावनो पड़े । कोई जेव परमेश्वर को नियम ला तोडे त ऊ वन वेदी पर एक ढोर ला धरकर आवनो पड़े । तब याजक ओला बलि चढ़ाये अखिन वेदी पर परमेश्वर लाईक बलि को रुप मा जराए । परमेश्वर नकहिस कि वन ढोर को खुन वन आदमि को पाप ला झाक देहे । येनतरीका लका , आता परमेश्वर वन पाप ला नहीं देखन को । ऊ आदमी परमेश्वर को नजर मा " शुध्द " रहे । परमेश्वर न मुसा को भाऊ हारून ला अखिन हारून को सन्तान ला आपरो याजक होन लाइक पसन्द करिस।

+ परमेश्वर न वन लोखहिन ला जो नियम देई होतिस वय उनको पालन करन लाईक तैयार भया । वय सिरप परमेश्वर का लोख होन ला अखिन सिरप ओकि आराधना करन लाईक तैयार भया ।

कई दिवस वरी , मुसा सीनै पहाड़ को सेंडी परच रहेव । ऊ परमेश्वर सिन बात करत होतो । पर लोख मुसा को वापस आवत वरी थक गया । येकोलाईक वय हारुन को जवर सोना धर कर आया अखिन ओको सीन एक मुर्ति ला बनावन लाईक कहिन की वय परमेश्वर को बजाए ओकी उपासना कर सीकेत | एन तरीका लक , उन्न भयंकर रूप लक परमेश्वर को बिरुद मा पाप करिन |

हारून न बछड़ा को समान एक सोनों की मूर्ति ला बनाईस | वय लोखहिन न वन मूर्ति की उपासना करणों चालू करिन अखिन ओला बली चड़ाहिन ! उनको पाप को बिरुद मा परमेश्वर उनको सीन बहुत गुसा भएव होतो | वन उनला नास करण की ठानी होतीस | पर मूसा न उनला नहीं मारन लाइक परमेश्वर सीन आग्र करीस | परमेश्वर न ओको आग्र ला आयकिस अखिन नास नहीं करिस |

आखरी मा मूसा सीनै पहाड़ को खलत्या उतर आएव | ऊ वन दुई गोटाहिन को पाटीहिन ला धरेव होतो जेकों पर परमेश्वर न दस आज्ञाईन ला लिखीस होतीस | मंग वन ओला मूर्ति ला देखीस| ऊ एतरो गुसा भएव की वन पाटीहिन ला तोड़ कर सत्यानास कर देईस |

मंग मूसा न वन मूर्ति ला बाट कर ओको चुरा चुरा कर देईस , अखिन वन चुरा ला पानी मा मिलायकर वन लोखहिन ला ऊ पानी पीवाय देईस | परमेश्वर न वन लोखहिन पर एक महामारी ला धाड़िस अखिन उनको मालक बहुत सा लोख मर गया |

जेन पाटीहिन ला मूसा न तोड़ देई होतीस उनको जागाला धरन लाईक मूसा न वन दस आज्ञाहिन की गोटा की नवी पाटीहिन ला बनाईस | तब ऊ मंग अखिन पहाड़ पर चंग गएव अखिन प्रार्थना करीस की परमेश्वर वन लोखहिन ला माफ करजो | परमेश्वर न मूसा की आयकिस अखिन उनला माफ कर देईस | नवी पाटीहिन पर दस आज्ञाहिन ला धरकर मूसा पहाड़ लक खलत्या उतर आएव | तब परमेश्वर न सीनैपहाड़ लका त वादा को देश वरी इस्राएलिहिन की अगुवाही करिस |