16. परमेशर मूसा जो सद्दां

यूसुफा रे मरने ते बाद तिसरे सब रिश्तेदार मिस्र च बसी गे। सै कने तिनांरे वंशा औले कईयां सालां तकौ मिस्र च इ रये कने तिनांरे मते बच्चे पैदा हुये। तिनां जो इस्राएली बोल्या गया।

कई सौ सालां ते बाद, इस्राएलियां री तादात बोहत बधी गी थी। मिस्री लोक हुण इसा गल्ला खातर तिनां रा धन्यवादी नीं थे भई तिनांरी मद्द करने खातर यूसुफे बोहत किछ कित्या था। मिस्री हुण इस्राएलियां ते डरी गे कांह्भई तिनांरी तादात बोहत हुई गरी थी। इस खातर तिस बगता मिस्र पर शासण करने औले फिरौने इस्राएलियां जो मिस्रियां रा दास बणाई दित्या।

मिस्रियें इस्राएलियां जो बोहत मजबूर कित्या भई सै मते सारे भवन कन कई नगरां जो बनाणे खातर बिना पैसेयां री मजदूरी करो। तिस कठण मेहणता ते तिनांरे जीवना जो बड़ा दुखदायी बणाई दित्या, पर परमेशरे तिनांजो आशीष दित्ती कने तिनांरे बोहत बच्चे पैदा हुंदे रये।

फिरौने देख्या भई इस्राएलियां रे बोहत बच्चे जम्मे रां थे, इस खातर तिनें अपणे अधिकारियां जो इस्राएलियां रे सबीं मुन्नुआं जो नील नदिया च सट्टि ने मारी देणे रा हुक्म दित्या।

इक खास इस्राएली जनाने इकी मुन्नुये जो पैदा कित्या। तिसे कने तिसारे खसमे पूरे तरीके ने तिस बच्चे जो लुखाई ने रखया।

तजे तिस बालका रे माता-पिता तिसो होर नीं लुखाई सके, तां तिनें तिसो मरने ते बचाणे खातर इक तरने लायक डाल्ल बणाई कने नील नदिया रे कनारे सरकण्डेयां रे बीच रखी दित्या। तिसरी बड्डी बेहण ये देखणे खातर तिसरी निगरानी करने लगी भई तिसने क्या हुंगा।

फिरौना रिये मुन्निये तिसा डल्ला जो देखीने तिसा च अन्दर झाँकी ने देख्या। तजे तिसे इक बच्चे जो देख्या तां तिसे तिसो अपणे बच्चे रे तौरा च लई लया। तिसे इक इस्राएलिया जनाना जो तिसो दूध पयाणे रे कम्मा खातर रखी लया, तिसो ये पता नीं था भई सै तिस बच्चे री असली मौ थी। तजे सै बच्चा इतना बड्डा हुई गया भई हुण तिसो अपणिया माता रे दूधा री जरुरत नीं थी, तां तिसे फिरौना रिया मुन्निया लो बापस दई दित्या, तिसरा नौं मूसा था।

इक दिन, तजे मूसा बड्डा हुई गरा था, तां तिने इकी मिस्रिये जो इस्राएलिये जो मारदे देख्या। मूसा अपणे साथिये इस्राएलिये जो बचाणे री कोसत करां।

तजे मूसे सोचेया भई तिसो कोई नीं देखदा तां तिने तिस मिस्रिये जो मारी दित्या कने तिसरी लासा जो दबाई दित्या। पर मूसे जो किछ कित्या था तिसो किन्हिये देखी लरा था।

फिरौना जो पता लगया भई मूसे क्या कित्तीरा। तिनें तिसो मारने री कोसत कित्ती, पर मूसा मिस्रा रे जंगला चौ नट्ठी गया। फिरौना रे सैनिक तिसो तेथी टोली नीं सके।

मिस्र ते दूर जंगला च मूसा इक चरवाहा बणी गया था। तिनें तेथी इकी जनाना ने ब्याह करी लया कने दो पुत्र पैदा कित्ते।

मूसा अपणे सौरे रे भेडां रे झुंडां री देखभाल करां था। इक दिन, तिने इक फुखदिया झाड़िया जो देख्या सै फूक्खे रां थी पर ये भस्म नीं हुये रदी थी। तिसो देखणे खातर सै तिसा झाड़िया रे नेड़े गया। तजे सै तिसरे बोहत नेड़े था तां परमेशरे तिसनेस गल्लां कित्तियां। तिनें गलाया, “हे मूसा, अपणे जुत्तेयां जो तुआरी दे। तू इक पवित्र जगहा पर खड़ीरा।”

परमेशरे बोल्या, “मैं अपणे लोकां रे दुखां जो देखिरा। मांह तिज्जो फिरौना ले भेजणा तां भई तू इस्राएलियां जो मिस्र रे दासत्व ने कड्डी ने लंदेया। मांह तिनांजो कनान देश देणा, सै देश तिसरी जे मैं अब्राहम, इसहाक कने याकूबा ने वादा कित्तिरा।”

मूसे पूछेया, “जे लोकें पुछेया भई मिंज्जो किने भेज्जिरा तां मांह क्या बोलणा?” परमेशरे बोल्या, “ सै जे हऊँ हया सै हया। तिनां ने बोल्यां, ‘मैं इ तिज्जो तुहां ले भेज्जिरा।’ तिनां ने ये बी बोलयां, मैं तुहांरे पूर्वजां अब्राहम, इसहाक कने याकूबा रा परमेशर यहोवा आ।’ मेरा ये नौं सदा रा आ।”

निर्गमन अध्याय 1-4 ते बाइबला री इक कहाणी