27, आच्चा सामारितन गा आना

मिया दिन , यहुदि कायदा गा मिया अक्कल कोरो यीसु खे पपराखिटिंन हेएन डान । मेनान,” गुरु टे , जनमा जिवन अंटिन इंज चोज डडाबा ?” यीसु जबाब जिले , “ भगवाना किताबोन चुज ओलकेन ?”

डि अक्कल मिठाज मेनान की भगवाना कायदा इंदार ओलकेन की " आमा भगवान सेवा दिला टेन ,परान टेन , जोर टेन डो माना टेन पिरोम डाए । डो आमा चेंडुआ टेन आमा खिजा पिरोम डाए " यीसु जबाब टेन मेनान " आम सच्चो का मांडि खे ! इनि का डाए डो आमेन जनमा जिवन घाटाउबा ।

फिनी डि अक्कल मिठाज आपले आप घिरोमि कोरो मेंटोन डिज कोकोम्बारा खे की " जे इंया गा चेंडुआ मेंटोन"?

मेटे यीसु डि अक्कल मिठाज खे मिया आना टेन जबाबो जिले की " डेन मिया यहुदि कोरो यरुसालेम टेन जेरिहो सेएरेन एकला चालकेन डान "।

डि चालकेन टेंमोन कइ चुचरि मिनकु डिज खे कुठाखेनेज डो डिकु डिजा टेन सेबेए चिजो सावेन डो डिज गुजु गा लायको टाएन बेभाउ कुठाखेनेज डे बादोन ओलेन डान " ।

डि लाका डिंगाटेन मिया यहुदि कोरो सेसेंद्रा लक्केन डान । मेटे डि घिरोमि यहुदि कोरो जे की इनी घायाल कोरो खे डो' टेन डिज निरा दुसरा कोरा टेन ओडजेन डान । डि कोरो खे बेगार मदत्तो टेन ओलेन डान "।

थोडा टेंमोन बादोन , मिया लेबी जातो गा कोरो डि का कोरा टेन चालकेन डान । ( इनी लेबी कोरकु यहुदि जातो टेन जे की मंदिर तालान याजकु खे मदत्तो जेबा ) डि लेबी कोरो माखा दुसरा कोरान टेन हेएन डो डि घयाल कोरो खे बान मदत्तो डाखे डो निडेन डान ।

डे बादोन आखरि कोरो डि कोरा टेन चालकेन डान डि कोरो मिया सामारितन डान।( सामारितनकु यहुदि पिडी टेन गा डान जे की दुसरा जातो कोरकु खे वियाब डाखे डान , डो सामारितानकु डो यहुदिकु मिया दुसरा हेबा मिलाटिंजलक्केन डान ) फिनी इनी सामारितन कोरो डि घायाल यहुदि कोरो खे डो' टेन डिज बेभाउ डिजा लिएन दया हेएन । मेटे डिज डिजा गा देख रेख डावेन डो डिजा सेबेए उजुखे टोलखेनेज डान ।

मेटे डि सामारितन इनि घायाल कोरो खे डिजा डोबा गाडी लिेन डोखे डो मिया तालामंजिल दबाखाना सावेन डान की डेन डिजा देखरेक डाउबा मेंटोन ।

डि गा दुसरा दिनेन डि सामारितन डिजा सेसेंद्रा लागातार डाखे डान डो डि गा देख रेख कोरो खे जिरीसा डामा बी जिखे डो मेनान की " आम इनी का आच्चा टेन सेबा डाए डो एठा डामा घाउबा टासोन इंज वापस इराटेंमोन आम खे डि ज्यादा डामा जेबा" ।

मेटेन यीसु डि अक्कल मिठाज खे कोकोम्ब्राखेनेज , “ आम चोज विचार बा ? डि घायाल कोरो गा इनी आफिआ कोरकु टेन जे वे डिजा गा चेंडुआ आरुबा ?” डिज मेनान, “ डि मिया जे की डिज घायाल कोरो लिएन दया डाखे डो मदत्तो डो सेबा डाखे डान ।" मेटे यीसु डिज खे मेनान , "नाका आम सेने डो डि गा डाए" ।