6. Yeeri Yisaaqich mecheen qanniihe

Abrahami oogeto geenee bi baayehoba Yisaaqichi eeno mechee shaagoch beddiye. Ebich Abrahami bi bushoo Yisaaqich mecheen bi deebemmoyich bi gaddireteena'o daggooche ikkoon bi xibeena'ochi showooch wochee daachiihe.

Biyoo genjje gommon bi hammitoye gubb Abrahami xibeena'o beeti showooch shaggiye. Yeeriyo wochee hammiti gaddiretoon Ribiqi beeti xaa'och yaabi daamiye. Ribiqi Abrahami manoochi bushi busheene.

Ribiqi bi xibeena'on qajjaa'a gaddiretoona tookaa Yisaaqi kexooch hamoyich mashaamiyaan. Yisaaqi kexooch bi shaggemona, Yisaaqi mecheen tunii biin shaaggiye.

Abrahami qititi genjje decoyee gubb, Yeeri Abrahamich bi giyiiti gibenikkee wogo bulli Yisaaqi waan beshehe. Yeeri Abrahamich haddaa ciyaani yaroon immemmo bi tunoon gibenikkitone. Tunebaani Yisaaqi mechee Ribiqi bushoo shimo mawiihan.

Yisaaqiyoo bi mechee bushoon shimo bi mawiitoyich, Doono Yeeri bi mecheech bushoon bi immemmoyich corootiye. Ebina Ribiqi mate bushiishoon bi xifemmon Yeeri daagiye. Gutte bushiisheena'o bi maacoochaa biinnaa biinna xuꞌee beeheete. Biyoo “Ebi amoyich ta toommooch tunehe?” iya Doono Yeerin echehan.

Doono Yeeriyoo Ribiqich ishichiye:- “Ne maacoochee shiijjemmi, gutte aageteenaꞌo tunemmi bushiisheenaꞌo, gubb boonoshinaa boonoshina shixemmi aageteenaꞌon tunemminaꞌone; ikkoo baroyee beshe giidecho tunemmone; qaabboo guuchoyich hajjeyemmone” iye.

Ribiqi bushiisheena'o boonoshi shiijjehoba qaaboo kaawoonaa bi ashittinoo eexxo bulletonane; ebich Eesayi getaa shigo kechiye. Guuche bushoo Eesayichi shoqqoon bi kishoona yechiꞌi shiijjehe; ebich Yaaqobi getaa shigehe.