46. Sawuli Yesuus waan Wotto

Sawuli Isxifaanoosin wuxiti asheena'ochi tahoon quyeebee echeti gurimaashoone. Yesuusi toommooch bi mulloon too'iyaano bi tunetoyich Yesuusich asheena'on yookkii du'ii beehe. Anaamina'onaa maacheena'onon yeshi cuyee kexooch gechiyaa Yerusalemaa kexoochee kexooch guudii beehe. Ayihudee qeeshee guudo arooch beeti kittinneena'on bi yechemmonaa Yerusalem wochi bi deebemmonoyich Damaasiqi katamooch bi hammemmoyich daagoon immiye.

Sawuli hammiibee Damaasiqa bi katinnihoba, diq xeeyo xeejjii'i bi waccoommon shimaayoochee bekko bi guudoona waccii aaxxehe. Biyoo bekkech showooch dihiye. Aroochee ikke asho “Sawulo! Sawulo! Amoyich taan du'iyabeetine?” ii bi getaa waayehe. Sawuliyoo, “Ta Doonocho! Ne koni neene?”i'i echehe. Doono biich wochi'i, “Ne du'iya beeti Yesuusi taane. Ne taan du'iyabeeto neene!”i'i wochiye.

Sawuli showoochee bi tiyihoba, bi aafoon bi gaxxaa, ciinnemmon qajjiye. Ebich asheena'o bi kishoon yechi'i yaabiibee, Damaasiqa daammiyeete. Biyoo maataanoon, uyaanoon keejj qeyiye.

Are Damaasiqa Hanaani getteebeeti ikke Yesuusichi asho beehe; Doono Yeeri Hanaanich “Sawuli getteebeeti, ikke uroon qaawibe! Wochinnoon bi ciinnemmoyich, ne kishoon bi shimbooch kotiibe” iye. Tunebaani Hanaani, “Ta Doonocho! Hini uro ne asheena'ochi toommooch ambiche gondoon bi shuuneto gaata waayeto taane” iye. Yeeri wochii'i, “Hini uro meeti aageteena'oyich, taateena'oyich, Isra'eeleena'oyichoo taachon bi miixemmoyich taach ta kaacceti qiicoone. Ebich bi waan hambe! Taachon miixeya ambiche xuuxoon bi beeggemmo gaata ta biich bekkiyemmo taane” iye.

Ebich Hanaani Sawuli kexooch hammiye. Kishoon bi shimbooch kotii'i, “Ta manoo Sawulo! Hini katamooch ne waabeetaa, gommoochaa neech bekketi Yesuusi wochinnoon ne aafo ciinnemmonaa Yaafe Ayaanoona ne ceennemmonoyich, ne waan taan deejjitone” iye. Bekkech bi aafo ciinniye, Hanaaniyoo aacona biin afaalliye; maayoonoo maa'i kupphehe.

Sawuli bekkech “Yesuusi Yeerichi Bushoone” iibee Damaasiqa beeti Ayihudeena'oyich Yesuusi aroo Kiristoosi bi tunoon xiishii arichiyo yechiye. Ayihudeena'o Yesuusichi asheena'on alliyaa qiiceti uro and Yesuusi toommooch mulloon bi too'iyoona woriganeheete! Sawuli Yesuusi Masiiho bi tunoon xiishoona Ayihudeena'o iberiyeemmon tuniihe.

Meeti aaboyee gubb Ayihudeena'o Sawulin wuxiya echeeheete. Boonoshiyoo Sawulin wuxiya katamee kelloon quyeebeeti asheena'on daachiiheete. Tunebaani Sawuli boonoshi echeyoon waayehe, Yesuusichi asheena'oo bi muriccemmon gaacheheete. Ikke xumoon Sawulin daammi'i, mokkooch geddii xaqqee gayee gutte daggeexi aahoona beshii'i woderoona kindiiheete. Sawuli muriccii bi iitoye gubb, Yesuusichon geton yechiye.

Sawuli Yerusalem beeti Yesuusichi asheena'ona daneya arooch hammiye, tunebaani boonoshi biin shattiyeete. Arooba Barinabaasi getteeti Yesuusi asho Sawulin mishiraachechina'o waan daammi'i, Damaasiqi katamoochaa aafoon kupphe'i Yesuusichon bi geton gettiye. Arooye gubb Yesuusi asheena'o de'ai'i Sawulin boonoshi dagg xa'iyeete.

Yerusalemaa tiyiti du'oona shaceti ikkikke Yesuusichi asheena'o Antook beddaaha wokkii hammii'i Yeerichi qaaroon gettiyeete. Antook beeti meeti asheena'o Ayihudeena'o tooneete, tunebaani meeti asheena'o batti battich boonoshi mulloon Yesuusi toommooch too'ii'i Doono Yeer waan wotteheete.

Antook beeti Yesuusi asheena'o Doono Yeerich coomii, corootii boonoshi beetaa, ikke areddoon Yaafa Ayaano “Barinabaasinaa Sawulinon ta ceeggeti shuunoyich bariibote!” iye. Ebich Antooki baarekexooch beeti maddechina'o Barinabaasinaa Sawulinoyich coomii, corootii boonoshi itoyee gubb, boonoshi shimbooch kishoon kotii'i ukkuriiheete. Aroochee bare meeti xaa'ooch Yesuusichi mishiraachoon boonoshi gettemmon daachiiheete. Barinabaasinaa Sawulina meeti yaroochee ashena'on dojjiyeete, meetina'oo boonoshi mulloon Yesuusi toommooch too'iiheete.