43. Baare kexi kotteehan

Yesuusi shimaajj bi wottetoye gubb bi dabbeena'o boonoshich bi gettitoommon Yerusalem tunee'i quyee beheete. Arooch beeti bi dabbeena'o kuxaanoon corootooyich kicee beeheete.

Ayihudena'o beshe baaree aafooch aache qemon boonoshi baaribeeti baaraachoo getteebeeti ooge nati baaro beetone. Baaraachoo Ayihudeena'o maayi qecci baaro tunii'i boonoshi baariibeeti aaboone. Ayihudena'o baaraachoon ikkittinoona baaroyich showee tookkee bulla Yerusalem waabeeheete. Hini natooch baraachoo bi giito Yesuusi shimaajj bi wotteti shaabatta bedoye gubbiye.

Yesuusichi asheena'o bulli ikkooch kicee'i boonoshi beetaa, diqqoona giidechi yongee qaaroommi qaaro shimaayoochee waayeehe; Aroochee Yesuusichi asheena'o qellee toommooch qaaqqee nalloommi mooyo bekkehe. Boonoshi bulli Yaafe Ayaanoona ceenniyeete; bekkech Yaafe Ayaano boonoshi ariyaani noonoona boonoshin yibbaatiihe.

Arooba Yerusalem beeti asheena'o hini qaaroon waaye'i tuneti mooyon ariyoyich dofoo tunee'i waaheete. Boonoshi showi showee noonoona Yesuusichi asheena'o yibbaatoon boonoshi waayetoyich oogichii woriganeheete.

Ikkikke asheena'o Yesuusichi asheena'o uchii mashe'iniye ii ittibateheete. Tunebaani Pheexiroosi neexe'i, ishichiye:- “taan elle waayebote! Hini asheena'o masheyaanena'one! Ebi tuneebeeto, keemechi Yoo'eelina, ‘ashi bushoo bullichi toommooch ta Ayaanoon ukkemmo taane’ getteeto ebina bi ceennitochiye iye.

“Hini Isra'eeleena'ote! Ittoshi beeggitoommonaa shichaa'a ittoshi ariyaa beetoommonon, Yesuusi Yeerichi giidoona wodde gaakkechi shuunoon, woriganikkiti mooyonaa malletoonon tuniiti ashoone. Tunebaani ittoshi biin yooddiyote!”

Yesuusi bi qititaanoona Yeeri biin duukketina'o daggoochee kichiye. Ebiyoo ‘maashee oppooch echeyaanoone; bi meenoo o'aanoone’ getteeti keemo bi ceennitochiye. Yeeri hini Yesuusin kashecho tunii'i bi kichoyich no miixoo noone.

“And Yesuusi Yeerichi qanne badd oogoona kote'i beete. Wotta bi gibenikkiti Yaafe Ayaanoon deejjiitone. And ittoshi ciinniibeetonaa waayeebeetonon tuniito Yaafe Ayaanoone.

“Hini Yesuusin yooddii'i wuxiihote. Tunebaani Yeeri hini ittoshi yoodditi Yesuusin Doononaa Masiihoonon bi tuniyoon xiishi ariibote!”

Ppheexiroosin waayeebeeti asheena'o boonoshi mulloona xeejjii miijjiyeete. Ebich Pheexiroosinaa bare mishiraachechina'onon “No maneena'ote! Ebich and aabichibona?”i'i echeheete.

Ppheexiroosiyoo, “Axaaxee gommoochee Yeer waan wottabote! Yeeri ittoshi axaaxoon bi maaremmoyich, ittoshi ikkikkoona Yesuusichi shigoona aacona afaalleebote! Yeeriyoo bi wojjoo tuneti Yaafe Ayaanoon ittoshich immemmone.”

3000 bede asheena'o Ppheexiroosi gettiton waayee'i Yesuusi dabbeena'o tuneheete. Afaallee'iino Yerusalem beeti baarekechi gogechina'o tuneheete.

Dabbeena'o kuxaanoon Yesuusichi asheena'o immiibeeti doyoon waayeheete, ikkottee'i tuneheete, tookkii maaheete, ikkoo barooyich corootiye. Ikkottee'i Yeerin galleteebee, boonoshich beeti mooyo bullin qoodeeheete. Asho bulli boonoshichon de'oona gabii beehe. Qemi qemona meeti asho dabboo tunehe.