36. Yesuusi Shaddeyo

Ikke areddoon Yesuusi keejje bi dabbeena'o tuneti Pheexiroosin, Yaaqobinaa Yowannisinon yechii'i genje guudi toommooch kechiye. (Yowannisi getteeti dabboo Yesuusin afaallito toonone.)

Yesuusi corootii bi beehoba bi aafo aabechoommon aaxxahe; bi taheti qoreddoo showee tookk beeti konaaketiyona xallayooni hakkaani wottoon oogichii naccee wac wacciye.

Arooba Muusinaa keemechi Eliyasina bekkeheete. Ebi asheena'o meeti balle natoye aaf showee tookk beebe echetina'one. Boonoshiyoo Katinoon Yerusalemaa tuneemmi bi qiteechon Yesuusina tookki yibbaateheete.

Muusinaa Eliyasina Yesuusina tookki boonoshi yibbaatee beetaa Ppheexiroosi, “Ta Doonocho! Hiniich beemo nooch gaawiye. Ne shuni gaata, hiniich keejje bashoon, ikkoon neech, ikkoonoo Muusich, ikkoonoo Eliyasich bashibone” iye. Ppheexiroosi bi yibbaatee beeton ariyaanoone.

Ppheexiroosi ishin getooch bi beetaa, bekkech nacce huttoommi qubo shimaayoochee kindii'i boonoshin qeriye; qubee daggoochaa “Biinna ta emiriti ta shunnaabeeti ta bushoo ebine. Biin waayebote!” ii beeti qaaroon waayeehe. Ishin waayeti keejje bi dabbeena'o oogichi'i boonoshi keqqitoyich, baroona showooch guuppeheete.

Aroochee Yesuusi boonoshi waan giddee shuurikki'i, “Tibote! Shattaahote!” iye. Damba kaame'i boonoshi ciinnimmona, Yesuusi ikkeetoyee besh koninona beegaaneena'one.

Yesuusinaa keejje bi dabbeena'ona guudi toommoochee boonoshi kindii beetaa, Yesuusi “Ittoshi beeggiton konichona gettaahote! Ta katinoon qitemmo taane, aroochee wotte kashoona beeyemmo taane. Arooye gubb asheena'och geton hakkemmo ittoshine”i'i gettiye.