3. Aalliyee aaco

Genjje yemeenoye gubb meeti asheena'o showee tookk beeheete. Boonoshiyoo gonedeena'onaa giidechina'ona tuneheete. Gondo woddee woddee bi hamona tiyitona, Yeeri aalliyee aacona showoon aalliya kuxiye.

Tunebani Noohi Doono Yeerichi aafooch gidoon danehe. Noohi bi yemeenee shiijjeree daggoochee cadiqoonaa Yeerich deꞌa iibeetonane. Yeeriyoo deejjiya bi gabbiti aalliyee aachichon Noohich gettiye. Oogee markaboon bi shuunemmon Yeeri biich gettiye.

Yeeriyoo Noohi markaboon bi shuunemmon gettiye. Ebi marikabee gidoo 140 meetiro, bi maaco 23 meetiro, bi neexoo 13 meetira qato tunebe iye. Noohi shuunemmi Marikabee, mixoochee shuuneeti tuneechi deshee kaama keejje tookki kuxechi, meeti gattechi, kechi aafechina, mallee kellechinane. Marikabe Noohinaa bi kechi asheena'on, showee tookk beeti gijjeena'o bullin aalliyee aacooche bi wodiiyemmoyich shuuneetine.

Noohiyoo Yeeri getoyich de'a iye. Bi keejje bushiishoona tookkii Yeeri gettitoommona marikabeen shuuneheete. Marikabe oogeeti bi tunetoyich bi shuunoo meeti naton daamiye. Noohi woyemmi aalliyee aachichon meeqeqeebee Yeeri waan asheena'o wottemmon gettii beehe, tunebaani boonoshi biin gibenoona waayeyaanena'one.

Yeeri bede maayoon boonoshi qellichinaa gijjeena'onoyich boonoshi kiciyemmon Noohinaa bi kechi asheena'onoyich gettiye. Bulli mooyo qannihoba Noohich, bi mecheech, bi keejje anaami bushiisheena'onaa boonoshi mecheena'onoyich marikabee maac boonoshi giyemmi deco shagoon Yeeri gettiye. Ebina shimite asheena'o marikabe maac giiheete.

Yoobbereenaꞌon daakii'i gijjeenaꞌo bullichi anaamaa maachoon aalliyee aacoochee boonoshi woddiyemmoyich Yeeri Noohi waan daachiihe. Gijjeena'o bullinoochee deejjooch tunnemmi shabaatti shabaatte xalle anaamaa maacheena'on Noohi marikabooch daachiihe. Bulliyona marikabooch boonoshi giyihoba Yeeri bi qelloona marikabe kelloon hicciye.

Aroochee amiyoo dihoo yechiye, shekireebee, shekireebee, shekireebee, 40 qemonaa xumoonon dihiye. Ooge aachi xuupho showoochee borihee beehe. Showee took beeti mooyo bulli aacona qereehe, genjjee guudina'oona aacona qereeheete.

Marikabee maac beeti asheena'onaa gijjeena'onye besh showee toommooch beeti moyoo bulli qitiye. Marikabeyoo aachi toommooch tegabee bi maac beetina'o bullin woddiihan.

Amiyoo dihoo bi neexetoye gubb marikabe uuche agenooyich aachi toommooch tegiyaan. Ebiyooba aaco shappoon yechiye. Ikke areddoon marikabe guudi shimbooch kotahan, tunebaani showoo andoo aacona qeree bi iyitoommoniye. Keejjee agenooye gubb guudi cilleena'o bekkeheete.

Aabbe qemoyee gubb Noohi, aaco showee toommoochee shuuqii bi iyito gaata hami beegoi'i kurecheen kichii daachiihe. Kurecheyoo okk hach guuddaa yoobbaabee shuu'i showoo qaawaa dano mawiihan.

Gubb Noohi uggeen daachiihe. Tunebaani ugge bi baatoon bi kotiyemmi xaaꞌoon muccaa'a Nooh waan wottaa waahan. Shabaatte qemoyee gubb uggeen wochinnoon kichii daachiihe. Uggeyoo yahee waajji nolloon bi gashoona shaaccaaꞌa wottahan. Aaco showee toommoochee bi shappitoyich bechee colloo kechibeehe.

Noohi ikke shabaattoon yagiꞌi, uggeen keejjinnoon kichii daachiihe. Ebiyooba ugge bi koteemmi xaa'oon bi danetoyich wottaa waataaneene. Aacoo shuuqqii hammii beehe.

Gutte agenooye gubb Yeeri Noohich ne, ne kechi ashoonaa gijjeena'ona bulla marikabooche keyote iye. Kechi asheena'oo marikabooche kechiyeete. Arooche meeti bushiisheena'onaa bushaa bushiisheena'onon shii showoona ceeniyeete.

Noohi marikabooche bi kechitoye gubb deejjee gudo shuunee'i gijjoo bulliiche deejjooch giddi bedon Yeerich deejjiye. Yeeriyoo ebi deejjoona bi imiritoyich Noohinaa bi kechi asheena'onon diiriye.

Yeeriyoo, “ashoo bi tuniibeeti gonde mooyoyich wochinnoon showoon ufaachemoyich wogoon giyemmo taane. Asheena'o boonoshi bushittinoochee tiijjii'i axaaxechina'o boonoshi tunetaanoona wochinnoon showoon aalliyee aacona aalliyaachemmo taane” iye.

Yeeri bi wogoyich malleeto bi tunemmon batti batti ximbettoon qubee daggooch geddiye. Ximbettoo bulli aabo shimaayooch bekkeebeetone. Yeeriyoo ebi ximbettee naboona ashich bi giiti wogoon shalligiye.