23. Yesuusi Shiijjo

Maariyami Yoseefi getteeti uroyich maakketine. Biin maakketi Yoseefi Maariyami xifeti tunoon bi waayehoba, gaggeroo biicho tunoo qayon ariihe. Maariyamin ashi aafooch yeelliyoon qaawaanoone, ebich cikkii'i biishoyich gabiye. Ebin bi tuniyooye shiichii'i maraakoo waa biich gumona gettiye.

Maraakoo, “Yoseefo! Shaagga ne maakketi Maariyami yeqqefeto, Yaafe Ayaanoonane; ebich shattaahine! Shaage! Anaami bushoon shiyemmine; bi shigoon Yesuusi getiree shigiibe (ebichi biishoo Doono Yeeri wodiyechone getone), ebiyoo asheena'on boonoshi axaaxoochee wodiiyemmo bi tunetoyichiye” iye.

Ebich Yoseefi Maariyamin shaaggii'i bi kexooch daammiye, tunebaani bi shiyemmi wottoon biina tookkii qeyaanoone.

Maariyami shiyemmi deco shagihoba, Roomi taato asho bulli bi qaabbechina'ochi showooch hammiree bi haddeyeemmoyich getoon kichiye. Yoseefinaa maariyamina boonoshi beeti Naazireete tiyi Beet Lehemi beddaaha genjje gommon sha'eeheete. Ebiyoo boonoshi qaabbechi nihinihoo Daawiti shiijjeto Beet Lehemi bi tunetoyichiye.

Beet Lehemi boonoshi shagihoba qemi xaa'oon muceheete. Boonoshi daneti qemi xaa'o miinjji magedo baachiye. Gaggeroo bi shiijjehoba boonoshi qeejjemmi qeeno alletoyich bi indee miimo maabeeti yegilee maacooch qeejjiyaan. Bushoochi shigoono Yesuusi ii shigiiheete.

Aroobee xum katinooch beeti bakkooch boonoshi bageena'on quyeebeeti qiddena'o beeheete. Diqqoona boonoshi guudoona waccii maraakoo boonoshich bekkehe, boonoshiyo shatteete. Maraakoo, “shattaahote! Ittoshich mishiraachoon deebeto taane. Masiihi Doono Beet Lehemi katamooch ittoshich shiijjetone!” iye.

“Hammiree gaggeroon qaawibote, buroomi qoreddoona caaccee'i, yegillooch tokkete'i beeton danemmo ittoshine.” Diqqoona shimaayoo maraakeena'ona ceenniye, boonoshiyoo Yeerin galleteebee “Shimaajji shimaayooch beeti Yeerich oogee yiiroo tunebe! Showoochoo Yeeri boonoshina emiriti asheena'oyich diggoo tunebe!” iyeete.

Qiddeena'o Yesuusi beetooch kaate shaggii'i maraakoo gettitoommon gaggeroo gijjeena'o maabeeti yegillooch qeyii bi beetaa daneheete. Oogeton emiriyeete. Maariyamiyoo oogeton emiriyaan. Qiddeena'o boonoshi waayetonaa ciinnitono bullich Yeerin galleteebee, boonoshi bago beeti bakkooch wotteheete.

Gisheche decoye gubb, aabi keyee wooch beeti ariyechina'o ikke bekkee ariyaani xojjenoon beeggiyeete. Andire Yihudee taato bi shiijjoon bekkiibeeto bi tunoon ariiheete. Ebich ebi taatoon ciinoyich genjje gommon sha'ee'i waaheete. Beet Lehemi shaggii'i Yesuusina bi indaanihoona beeti kexon daneheete.

Ariyechina'o Yesuusin bi indeena tookki boonoshi beegihoba dihi goyinneheete. Yesuusichoo aaxxe mooyina'on immiyeete. Aroochee boonoshi showooch wotteheete.