20. Keccoonaa Keccoochee wottoona

Isra'eele taatoonaa Yihude taatoona guttiyona Yeeri toommooch axaaxoon shuuneheete. Yeeri boonoshina tookki Siini guudochaa bi giyiti wogoon happiyeete. Boonoshi gonde gommoochee wotteree biich boonoshi goyinnemmon boonoshi meeqqeqiyemmoyich bi keemechina'on wochee deejjiye, tunebaani boonoshi de'a gettemmon qajjiyeete.

Ebich Yeeri boonoshi etteena'o boonoshin aalliyemmon daagii'i ebi gutte taateena'on naxehe. Giidechi, maac manjje showee Asoorichi taato Isra'eelin aalliihe, aaxxi mooyo bullin hokkii daamiye, gamini xaa'oono michiye.

Asooree wulleena'on, gaanechina'on, wotta kishee ariyoo boonoshich beeti asheena'o bullin kicii'i Asooree showooch daammiyeete. Isra'eele showooch wuxeyaanoon echetina'o gitte girechina'o baachiye.

Arooche Asooreena'o Isra'eele taato beeti showooch boonoshi beeyemmoyich dallaawe asheena'on deebiyeete. Dallaawe asheena'o happeeti katameena'on wochi shuunee'i arooch echeti Isra'eeleena'on shaaggiyeete. Ebi dallaawe asgeena'on shaaggiti Isra'eele asheena'o Shamaareena'o getaa ceekkee beeheete.

Isra'eele taatittinooch beeti asheena'o boonoshi mulloon Yeeri toommooch too'iyoonaa Yeerich de'a getona boonoshi qajjitoyich Yeeri aabichii'i sheerito gaata asheena'o beeggiyeete. Ebi bulli bi tunetaanoona Yihude taatittine dech beeti asheena'o Kanaane asheena'ochi nuggusheena'onaa shahalleena'onoyich goyinneheete. Yeeriyo boonoshin meqqeqemmi keemechina'on bi dejjitaanoona waayemmon qajjeete.

Asooreena'o Isra'eele taatittinoon boonoshi tiichiti 100 nat bedoye gubb Yeeri Yihude taatittinoon boonoshi kocheemmoyich Baabiloonena'on deejjiye. Baabilooni giidechi taate ageteene. Yihude taato Nabukadinasorich maddecho tunoyichinaa wodde gijjoo qoconoyich wogo geddiye.

Tunebaani giisheche natoye gubb Yihude taato Nabukadinasori toommooch hukkoo tiijjiye. Ebich Baabiloonena'o wottee waa'i Yihude taatoon kochiyeete. Yerusalemi katameeno yechiyeete, Yaafe kexonoo happiyeete, ebiyee wotta Yaafe kechi kobaroo bullin daammiyeete.

Yihude taato bi toommooch hukkoo bi tiijjitoyich sheeroo tuniyeemmoyich Nabukadinasori gine naayina'o taatoochi anaami bushiisheena'on bi aafoochaa wuxiyeete, bi aafoono opphii kichiyeete. Arooche taatoon Baabiloon cuye kexooch daammiyeete, biyoo aroochaa qitiye.

Nabukadinasorinaa bi gine naayina'o goyo boonoshi gochemmon meeti girechi asheena'on baach echiichii, Yihude taate ashena'o bullin keccii Baabiloon daamiyeete. Yeeri asheena'o gibenikkeeti shoween duppi boonoshi hammiti ebi gooro kecco getaa ceekkehe.

Yeeri keccooch daachii'i bi asheena'on boonoshi axaaxooyich bi naxetaanoona, boonoshinaa bi immiti gibenikkeena'on batteyaanoone. Ebich Yeeri bi asheena'on quyoonaa bi keemechina'ona yibaatiyoonon kuxaanoone. Shabe natoye gubb, gibenikkeeti showeech wochinnoon wottemmina'o boonoshi tunoyich gibenikkoo immiye.

Shabe natti bedo bi tunetoye gubb, Faarsi taato Baabiloonin kochi yechiye, ebich Faarsi taatittino Baabiloone taatittinoon keeri neexehe. Ebi goor Isra'eeleena'o Yihudeena'o getaa ceekkee beeheete, boonoshi daggooche meetina'o Baabiloon bee echetina'one. Geeneti hadda guuteena'o baach Yihudi showoon shalligiyeete.

Faarsi taatittino kuppho tuneechii tunebaani bi hajjiti asheena'on ariqqoona yechii beetone. Qiiroosi Faarseena'ochi taato bi tuneti giisheche gooroye gubb, Yihude showooch wottoo qaawiti Yihudo koniyona Faarsin gawuki Yihude showooch wotto bi hakkiyemmon getoon immiye. Yaafe kexon wochi boonoshi shuunemmonoo gijjee buushon immiye! Ebich keccooch boonoshi yagiti shabe natoye gubb, hadda guute asheena'o Yihude showooch beeti Yerusalem wotteheete.

Asheena'o Yerusalem boonoshi shagihoba , Yaafe kexonaa katamee guudoona beeti gayoonon wochinnoon shuuneheete. Ebi daar beddaaha bare asheena'ona hajjeetina'o boonoshi tunetaanoona, wochinnoon gibenikkeeti showooch kotee'i Yaafe kexoochaanoo goyinneheete.