18. Gutta qoodeeti taatitino

Meeti natoye gubb, Daawiti qitiye, bi bushoo Solomooniyoo Isra'eeli toommooch taatehe. Yeeri Solomoonin bulliye beshoon bi qaawiibeeto amoon gaata echehe. Solomooniyoo bi qaawiibeeto ariyoo tunoon bi getihoba, Yeeri biin showee tookk beeti asho bulliye beshe ariyechoon tuniihe. Daakkii'inoo Yeeri biin oogeti gaanech ashoon tuniihe.

Bi nihoo yamitoommonaa qaawiibeeti mooyina'on bi kicitoommona Solomooni Yerusalem katamooch Yaafe Kexon shuunehe. Ebiyooba asheena'o danee dukkaanee keroon Yaafe Kechi daggooch Yeerich goyinnee deejjoonoo giddiiheete. Yeeriyoo Yaafe Kechi daggooch waa'i bi asheena'ona tookki beehe.

Tunebaani Solomooni bare aagetee maacheena'on shunniye. 1000 beddimmi maacheena'on shaagona Yeerich de'a gettemmon qajjiye! Eboshi maacheena'oochee meetina'o maachi showooche waatina'one; boonoshina tookkii boonoshi deebiti shaahalleena'oyichoo goyinneheetee. Solomooni bi geenehoba, biyoo boonoshi shaahalleena'oyich goyinneheete.

Yeeri Solomoonin kaaree'i bi qititoye gubb naxo bi tunemoyich Isra'eelee asheena'on gutte taatitinooch qoodiyemmo bi tunoon gettiye.

Solomooni qititoye gubb bi busho Rehoboami taatehe. Rehoboami mullaalli ashoone. Bi taattitinoon iberii deqqa Isra'eelee asheena'o bulli kicee waaheete. Solomooni wodde magge shuunoon boonoshin bi shuuniyoonaa wodde gibiro bi qochiyoonona boonoshi ayinoon Rehoboamich gettiyeete.

Rehoboami bi dookke mulloona ishichii'i boonoshich wochiye, “ta nihoo Solomoni magge shuunoon noon suuniite iyaa gabito ittoshine, tunebaani ta biyee beshiti magge shuunoon ittoshin shuuniyemmo taane, biye beshoonoo ittoshin naxemmo taane.”

Ashire Isra'eele asheena'ochi yoodena'o Rehoboami toommooch hukkoo tiijjiyeete. Guttee yoodena'o baach biich geibenee'i biinna tookkii tuneheete. Eboshi gutte yoodeena'o Yihudee taatitinoon neechiyeete.

Rehoboami toommooch hukkoo tiijjiti echeti aashire yoodeena'o Yeroboami getteeti uroon boonoshi taato tunii'i taatiiiheete. Showee dambi kuxooch boonoshi taatitinoon neechii'i Isra'eeli getaa ceekkeheete.

Yeroboami Yeeri toommooch hukkee'i asheena'o axaaxoon boonoshi shuunemmon tuniihe. Yihudi taatitinooch beeti Yaafe Kexooch asho Yeerich goyinnoon qayichi shaahalleena'oyich bi goyinnemmon gutte shaahalleena'on shuunehe.

Yihudinaa Isra'eelina taateena'o etteena'o tunee'i meeti kaalloon koyeheete.

Andire Isra'eele taatitinooch beeti taateena'o bulli gondeena'one. Eboshi taateena'ochee meetina'o boonoshi keroon taateya qaawiti bare Isra'eelena'o wuxeeheete.

Taateena'o bullinaa meeti Isra'eelee asheena'ona Shaahalloyich goyinneheete. Shaahalloyich boonoshi goyinneebeehoba meeti kaalloon qocaalli shuunoon shuuneebeeheete. Ebiyo goyinnee xaa'oochaa anaamonaa maacheena danee, ikkikke kaalloonoo bushiishoon deejjiibeeheete.

Yihudi taateena'o Daawitichi yareena'one. Eboshi taateena'o daggoochee ikkikkeena'o maccoon tatoona qeejjiti Yeerichoo goyinneti de'e asheena'one. Tunebaani eboshi taateena'o daggoochee gondeena'onaa duubeena'ona, shaahallooyichoo goyinnetina'o meetina'one. Ikkikke taateena'o boonoshi bushiishoonona koote shaahalleena'oyich deejjitina'one. Wotta meeti Yihudee asheena'o Yeeri toommooch hukketee'i bare shaahalleena'oyich goyinnetina'one.