15. Gibenikkeeti Showee

Ciiroochaa Isra'eeleena'o gibenikkeeti showee Kanaan boonoshi giyemmi aabo shaggiye. Yaasi kupphe dilallona quyeyaa'a beeti Kanaaneena'ochi katamee Yaarikin qiidotei'i gutte qiiddechina'on daachiihe. Are katamooch qiiddechina'on aachaa'a gubb murici boonoshi hammemmon gaacheti Rahaabi getteyaabeeti yahechi ure beehan. Aree Yeeri toommooch bi mulloon bi too'iitoyich ebin tuniihan. Qiiddechi Isra'eeleena'o Yaarikin boonoshi alliyeemmi aabooba Rahaabinaa bi kechi asheena'onon wodiyoyich gibenikkoon biich immiyeete.

Isra'eeleena'o Yaarik gimmoyich Yoordanoosi aacon kimo boonoshin qaawiihe. Yeeri “shiichiree qeesheena'o kimbeete”i'i Yaasich gettiye. Qeesheena'o Yooridaanoosi aacooch boonoshi gimo yechimmona, Isra'eeleena'o shuu'i showoona kimo boonoshi hakkiyemmoyich wocciibeeti aaco timochee neexehe.

Asheena'o Yooridaanoosi aacon boonoshi kimmitoye gubb, Yeeri giidechi Yaariki katameen aabicheree bi kochemmo gaata Yaasich gettiye. Asheena'o Yeerich de'a iyeete. Gine naayina'onaa qeesheena'ona qemi qemona ikke kaalloon shiritte qemoyich Yaariki katameen guuddiyeete.

Arooche shabaattinne qemooba, Isra'eeleena'o katameen shabaate kaalloon guuddiyeete. Ciirooch katameen boonoshi guuddii beehoba gine naayina'o cookiyeete, qeesheena'oo boonoshi tiroon huggiyeete.

Arooche Yaariki guudoona beeti xaqqee gayo dihiye! Yeeri gettitoommon Isra'eeleena'o katamee daggooch beeti mooyo bullin aalliiheete. Isra'eeli xibeena'o tuneti Rahaabinaa bi kechi asheena'onon baach wodiiheete. Kanaan beeti bare asheena'o Isra'eeleena'o Yaarikin aalliyoon boonoshi waayehoba, noonoo kochemmina'onei'i shattiyeete.

Yeeri Kanaani beeti ashi yoodo bullina diggee wogo boonoshi giyemmon Isra'eeleena'on gettitone. Tunebaani Kanaane asheena'o daggoochee ikko tuneti Gibe'ooni asheena'o, Kanaane wohi showoochee waatina'o boonoshi tunoon kootii'i Yaasich gettiyeete. Aroochee boonoshina tookki diggee wogoon bi giyemmoyich echeheete. Gibe'oonena'o amoochee boonoshi waato gaata Yaasinaa Isra'eeleena'ona Yeerin echeyaanena'one. Ebich Yaasi boonoshina tookkii wogoon giihe.

Isra'eeleena'o, Gibe'oonena'o boonoshin maroon boonoshi ariihoba ippeheete, tunebaani Yeeri afoochaa boonoshi giiti qaaro bi tunetoyich, boonoshina tookkii boonoshi giiti wogoon quyeheete. Giishecho yagii'i bare aaboon, Amooreena'o getteeti Kanaani beeti bare yoode taateena'o, Gibe'ooni asheena'o Isra'eeleena'ona tookkii diggee wogo boonoshi gimmon waayeheete. Ebich boonoshi gine naayina'on ikkochii'i Gibe'oonena'on kochiyeete. Gibe'oonena'o gaacho danoyich Yaasi waan wocho daachiiheete.

Ebich Yaasi Isra'eeli gine naayina'on kicii'i Gibe'oonena'o waan shagoyich xumoona hammiyeete. Maadda diqq boonoshi ariyaanoon Amooree gine naayina'on kochiyeete.

Arooba Yeeri Isra'eeleena'oyich koyehe. Amooreena'on shaawii'i ogooge baderoon deejjii'i meetina'on wuxiye.

Wotta Yeeri Amooreena'on ciroona aalliyoyich deco boonoshich qaminaacheemmoyich aabee shimaayee daggooch ikke xaa'ooch bi yagemmon tuniihe. Arooba Yeeri Isra'eeleena'oyich oogeti wudoon immiye.

Yeeri are gine naayina'on kochi bi wochitoye gubb, meeti Kanaane asheena'o Isra'eelin kocha ikke xaa'ooch kiceehete. Tunebaani, Yaasina bare Isra'eeleena'ona boonoshin kochii'i wochiyeete.

Ebi ginoye gubb Yeeri ikkikke yoodoo bulliich gibenikkeeti showeechee biich shaggemi qoodoon immiye. Arooche Yeeri Isra'eelich bi daaro bulliich diggoon immiye.

Yaasi bi geenehoba, Isra'eele asheena'o bullin ikke xaa'och ceeggiye. Arooche Yaasi Yeeri Siini guudochaa Isra'eeleena'ona tookkii bi giiti wogoyich boonoshi de'a gettemmon asheena'on shalligichiye. Asheena'oo Yeerich gibeneetina'o tuunee beemonaa bi geteena'on dabboonoyich wogo giiheete.