11. Beshee Baaro

Isra'eeleena'on bi gawukkoo qayi gaata ashoonaa gijjoonochi qaabbe anaamo bullin wuxemmo bi tunoon Yeeri Faroonich meeqeqiye. Farooni ebin bi waayehoba, ando waayoonaa Yeerich de'a getonon qajjiye.

Yeeri bi mulloon bi toommooch too'iiti ashi qabbe anaami bushoo bullin bi wodeemmi gommon qanniihe. Kechi asho bulli xalle bagee baaddoon kaacii'i guuriye.

Yeeri Isra'eeleena'oyich bachaalli bagee baaddoochi damoon boonoshi kechi kellooch boonoshi huuttemmon, meenon shittoo giyaani koshonaa boonoshi kaate maayemmon gettiye. Wotta boonoshi maahoba Gibitse keyoyich boonoshi qanniyemmon gettiye.

Isra'eeleena'o Yeeri boonoshich bi gettitoommon bulli mooyon tuniiheete. Xummi qeellimooch Yeeri Gibitse showoo bullina beshee'i anaamoo tunetii qaabbo bullin wuxiye.

Isra'eeleena'o bullichi kello damoon huuttetone, ebich Yeeri kexina'on beshee hammiye. Kexooch beeti asho bulli wodiye. Isra'eeleena'o bagee baaddoochi damee naboona wodiyeete.

Gibitsena'o Yeeri toommooch boonoshi mulloon too'iyaanena'one, bi getoonoo ceechaanena'one. Ebich Yeeri boonoshi kexon besheyaano bi tunetoyich Gibitse qaabbe anaamo bullin wuxiye.

Cuye kexooch cuchetoochee tiijjii'i Faroon kexooch beddaaha beeti Gibitsee qaabbe anaamo bulli qitiye. Boonoshi muushenoochee tiyitona Gibits beeti meeti asheena'o eeppii cookkii beeheete.

Aroobee xum Farooni Muusinaa Aarooninon ceeggii'i, “Isra'eelena'on yeshiree tiyi hambote!” iye.