1. Halloo

Hiniye desh no ciinemmo Yeeri bulli moyoon kottito bi tunooniye. Yeeri showoonaa bi maac beeti mooyiina'onon shiritte qemona halliye. Yeeri showoon bi hallitoye gubb showoo bi toomooch amoona aalli dunne manderoonaa shokkoonane. Bi maac batt amoona halleyaanbeetone. Tunebaani Yeeri ayaanoo aacina'o toommooch dogii beehe.

Aroochee Yeeri bekko tunebe iye; bekkoo tunehe. Yeeriyoo bekko gaaweto bi tunoon ciinni'i areddoo ii shigiihe. Yeeri bekkoon manderooche barii'i manderoon xumo ii shigiihe. Yeeri batti batti qemooba bekkoon halliye.

Guttinee qemooba Yeeri showooye damba beeti gumoon halliye. Ebina Yeeri aacoon gumooye bariihe.

Keejjinnee qemooba aacoo shoowooche bi bariyemmon tuniihe. Yeeri shuu'i xaa'oon showoo, aaconoo baharoi'i shigiihe. Yeeriyo bi halliti mooyo gaaweto bi tunoon ciinniye.

Aroochee Yeeri showoo michi yaroo bullinaa bechee yaroo bullinon colliibe iye. Ebiyoommono tunehe. Yeerio bi halliti mooyo gaaweto bi tunoon ciinniye.

Awuddinnee qemi hallooba Yeeri aabeen, ageneenonaa xojjenena'on halliye. Yeeri areddoonaa xumoonon, natinaꞌonaa yemeeneenaꞌonon boonoshi barbariyemmon tuniihe. Yeerio bi halliti mooyo gaaweto bi tunoon ciinniye.

Uuchinnee qemooba Yeeri aachi daggooch beetinaꞌonaa Yoobbereenaꞌo bullinon halliye. Yeeri ebi gaaweto bi tunoon ciinniye. Halleetina'onoo diiriye.

Shirittinne qemooba Yeeri “Showoo kashechi halleenaꞌo” tunebeete iye. Yeeri gettitoommono tunehe. Ikkikkeena'o goyee gijjeena'o, ikkikkeena'o yuummerena'o, ikkikkeena'o kubbi cooxina'one. Yeeri ebi gaaweto bi tunoon ciinniye.

Yeeri “Ashoon no malletoona, noon shaahoonoo tuniiree hallibone; bahareexi haasheenaꞌon, shimaayoona yoobbiibeeti yoobbereenaꞌon, gijjeenaꞌonaa cooxinaꞌonon, showoo toommona yuummiibeeti yuummere halleenaꞌo bullinoo hajjibeete” iye.

Ebich Yeeri showoochee buttoon daamii'i ashoon hallii'i kashee hiinoon biich immiye. Ebi ashooyichi shigo Addaami getteehe. Yeeri Addaami beeti xaa'ooch bechoon bechii'i bi shiimeemoyich Addaamin arooch kotiihe.

Bechee xaa'oochoo Yeeri gutte baribaritii mixina'on bechiye, eboshiyo kashee mixonaa gondoonaa deꞌoonon arichiibeeti mixonane. Yeeri Addaamin bechee xaa'ooch beeti gondoonaa deꞌoonon arichiibeeti michi aafooye bekk, bechee daggooch beeti michi aafoo bulliiche mamo bi hakkoon gettiye. Ebi gondoonaa deꞌoonon arichiibeeti michi aafoochee bi maahoba, iberoon qitemmo bi tunoon gettiye.

Ebiye gubb Yeeri Addaamich asho ikkeeton bi beemo gaaweto toonoone ii gettiye. Gijjeena'o daggoochee ikkoona Addaamich gaacho tuno hakkaanoone.

Yeeri Addaami toommooch magge tokketoon miinjjiye. Addaami tokketeechaa, bi naaboochee ikke shaawusheen waaxxii'i maachee tunii shuunee gawaatii'i Addaam waan deebiye.

Addaami biin bi ciinihoba ishichiye:- “Hini taan shaahiyaane; asho waanee bi danetoyich, ashe getteebu” iye. Ebich asho bi nihoonaa bi indeenon qayiichi, bi mecheena tookki ikkoo tunemmone; gutteenaꞌoo ikke meeno tunemminaꞌone.

Yeeri anaamonaa maacheenon bi malleetoona halliye. Yeerio boonoshin diirii'i ishichiye, “Shiijje shiijjerebote! Showoo bulliichoo ceenote!” iye.

Shabaattinee qemooba Yeeri bi hallee shuunoon tacciye. Yeeri bi shuunoon shuunee bi taccitoyich, shabaattinnee qemooba shuunoo bulliichee kashehe. Ebich Yeeri shuuneebee bi echeti shuunoo bulliichee kashehe, shabaattinnee qemonoo diiriꞌi yaafiihe. Ebiyoo hini aabooba bi shuunoo bulliichee bi kashetoyichiye. Yeeri shimaayoonaa showoonon bi hallihoba , boonoshin bi hallito ebiyoommi gommonane.