10. ଦଶଟା ରୋଗାଞ୍ଜି

ମୋଶାନ୍ ଡ ହାରୋଣନ୍ ଫାରୋନ୍ ଆମଙ୍ ଇୟେଞ୍ଜି। ଆନିଞ୍ଜି ଗାମେଞ୍ଜି ଇସ୍ରାଏଲନ୍ ଆଈଶ୍ୱର କେନ୍ ଆତେ ଗାମେନ୍,“ ମନ୍‌ଡ୍ରାଞେଞ୍ଜି ଅମ୍‌ରେଙାଜି”, ଫାରୋନ୍ ଆବର୍ରନେଞ୍ଜି ଅଡନମ୍‌ଡଙଲୋ। ଇସ୍ରାଏଲିୟଞ୍ଜି ଅନୁମରେଙନ୍ ଅପାଲନ୍ତେଙ, ଆନିଞ୍ଜି ଆଡଅଙ୍ ଗୋଗୋୟ୍ ଡଣ୍ତ ଆକ୍କାବାଡା ବାଞେଞ୍ଜି।

ମନ୍‌ଡ୍ରାଞ୍ଜି ଆନୁର୍ ତିୟନ୍‌ ଆସନ୍ ଫାରୋନ୍ ଅସାଏନ୍, ତି ଆସନ୍ ଈଶ୍ୱରନ୍ ଦଶଟା ଅନ୍ନବ୍‌ସଏନେନ୍ ଆରୋଗମ୍ ମିସର ଡେସାନ୍ ଆଡଅଙ୍ ଆପ୍ପାଲାୟ୍। କେନ୍ ଆରୋଗ ବାତ୍ତେ ଈଶ୍ୱରନ୍ ଫାରୋନ୍ ଆଡଅଙ୍ ଅବତୁଜେନ୍ ଡ ଆନିନ୍ ଫାରୋନ୍ ଡ ମିସରନ୍ ଆଡେସା ଆସନୁମଞ୍ଜି ସିଲଡ୍ ଗୋଗୋୟ୍ ବୋର୍ସାଡକୋ।

ଈଶ୍ୱରନ୍ ନୀଳିଅଲନ୍ ଆଡାଆ ମିଞାମ୍ ଏମ୍ମେଏନ୍, ବନ୍‌ଡ ଫାରୋନ୍‌ ନମି ଆନ୍ତାନ୍ ଇସ୍ରାଏଲ ମର୍ରଞ୍ଜି ଅନ୍ନୁମ୍‌ରେଙଲୋଜି।

ଈଶ୍ୱରନ୍ ମିସର ଡେସାନ୍ ଅମ୍ପରାନ୍ କିଣ୍ତୋଡନ୍ ଆପ୍ପାୟେନ୍। କିଣ୍ତୋଡଞ୍ଜି ସନବ୍‌ଙାଜନ୍ ଆସନ୍ ମୋଶାନ୍ ଆଡଅଙ୍ ଫାରୋନ୍ ବରେନ୍। ବନ୍‌ଡ କିଣ୍ତୋଡଞ୍ଜି ଆର୍ରବ୍ବୁଆଜେଞ୍ଜି ଆତିକ୍କି, ଫାରୋନ୍ ରବ୍‌ଡୋଗରର୍ନେ, ଆରି ଇସ୍ରାଏଲନ୍ ଆମନ୍‌ଡ୍ରାଜି ମିସରନ୍ ସିଲଡ୍ ଅନ୍ନୁମରେଙଲଜି।

ତି ଆସନ୍ ଈଶ୍ୱରନ୍ ଲବଃ ଈଇବୋଡନ୍ ଆରୋଗା ଆପ୍ପାୟଲାୟ୍। ତି ଆତିକ୍କି ଆନିନ୍ ଅର୍ରୟଞ୍ଜି ଆରୋଗା ଆପ୍ପୟଲାୟ୍। ଫାରୋନ୍ ମୋଶାନ୍ ଡ ହାରୋଣନ୍ ଆଡଅଙ୍ ଓଡ୍ଡେଏଞ୍ଜି ଡ ବର୍ରେଞ୍ଜି, ଆମ୍ୱେନ୍ କେନ୍ ରୋଗାଜି ଏବ୍‌ସଙାଜେନ୍ ଡେନ୍ ଈଶ୍ରାୟେଲନ୍‌ ଆମନ୍‌ଡ୍ରାଜି ମିସର ଡେସା ସିଲଡ୍ ଜିର୍ରେ ରପ୍ତିତଜି। ଅଙ୍ଗା ଆବେଡା ମୋଶାନ୍ ବେବ୍ବର୍ରନେ, ଈଶ୍ୱରନ୍ ଅର୍ରୟଞ୍ଜି ମିସର ଡେସାନ୍ ସିଲଡ୍ ସବ୍‌ଞାଜେନ୍ । ବନ୍‌ଡ ପାରୋନ୍ ରବ୍‌ଡୋଗର୍ଲନ୍ ଆରି ମନ୍‌ଡ୍ରାଞ୍ଜି ଅନ୍ନମ୍‌ରେଙ୍‌ଲଜି।

ତି ସିଲଡ୍ ଈଶ୍ୱରନ୍ ଅଡକୋନ ଜନ୍ତୁଞ୍ଜି ଆଙ୍ଗାଆତେ ମିସରନ୍ ଆମନ୍‌ଡ୍ରାଜି ଆତେ ଡକୋଏନ୍, ଅବ୍‌ସୁଡାଲେ ରବ୍ବୁଆଜେନ୍। ବନ୍‌ଡ ଫାରୋନ୍ ରବ୍‌ଡୋଗର୍ଲନ୍ ଆରି ଈଶ୍ରାୟେଲଞ୍ଜି ଅନ୍ନମ୍‌ରେଙ୍‌ଲଜି।

ତି ସିଲଡ୍ ଈଶ୍ୱରନ୍ ମୋଶାନ୍ ଆଡଅଙ୍ ଫାରୋନ୍ ଆମୁକ୍କାବା କୋମାବନ୍ ବନୁରନ୍ ଆସନ୍ ବରେନ୍। ଅଙ୍ଗା ଆଡିନ୍ନା ତି ଆତେ ତୁବେନ୍, ମିସର ଆଡେସା ଆମନ୍‌ଡ୍ରାଜି ଆଉସାଲ୍ ରେଙ୍ ଗୁର୍ଡାନ୍ ଆବରିୟ୍ ଆମ୍ଫସୁ ଗିୟ୍‌ତ୍ତାଏନ୍, ବନ୍‌ଡ ଈଶ୍ରାୟେଲ ଆମନ୍‌ଡ୍ରାଜି ଆମଙ୍ କେନ୍ ଆତେ ଅଡ୍ଡେଲୋ। ଈଶ୍ୱରନ ଫାରୋନ୍ ଆଗର୍ରେ ରବ୍‌ଡୋଏନ୍, ଆରି ଫାରୋନ୍ ଈଶ୍ରାୟେଲ ଆମନ୍‌ଡ୍ରାଜି ଆଡଅଙ୍ ଅନ୍ନମରେଙ୍‌ଲଜି।

ତି ଆତିକ୍କି, ଈଶ୍ୱରନ୍ ଆଳେରନ୍ ବାତ୍ତେ ମିସର ଡେସାଲୋଙନ୍ ଜନ୍‌ଡ୍ରୋମଞ୍ଜି ଅମ୍ମୋସ୍ସାଏନ୍, ଆରି ଆନାଜି ଡାଣ୍ତନ୍ ଡୁଙ୍‌ଲଞ୍ଜି ଆନିଞ୍ଜି ରବୁଏଞ୍ଜି। ଫାରୋନ ମୋଶାନ୍ ଡ ହାରୋଣନ୍ ଆଡଅଙ୍ ଓଡ୍ଡେଏଞ୍ଜି ଆରି ଗାମେନ୍, “ଞେନ୍ ଇର୍ସେନ୍ ଲୁମ୍‌ଲାୟ୍। ଆମ୍ୱେନ୍ ଜିର୍ରେ ଏରପ୍ତିତେ”। ତି ଆସନ୍ ମୋଶନ୍ ବେବ୍ବର୍ରନ୍, ଡ ରୁଆଙନ୍ ସିଲଡ ଆଳେରନ୍ ଆନସେଡ୍ ରଏଏନ୍‌।

ବନ୍‌ଡ ଆରି ଫାରୋନ୍ ଇର୍ସେନ୍ ଲୁମେନ୍ ଡ ଆରି ରବ୍‌ଡୋଗର୍ରନ୍। ଆନିନ୍ ଈସ୍ରାୟେଲବାଜି ଜନିରନ୍ ଆସନ୍ ଅନ୍ନୁରଜି।

ତି ଆସନ୍ ଈଶ୍ୱରନ୍ ପପ୍ପରନ୍ ଆରୋଗା ଆପ୍ପାୟ୍‌ଲାୟ୍। ଡ ଅମ୍ଫରା ମିସର ଡେସାନ୍ ଲାର୍ରନ୍। ଅଙ୍ଗା ଆଜନ୍‌ଡ୍ରୋମ୍ ଜି ଆଳେରନ୍ ବାତ୍ତେ ଅମ୍ମୋସାଲୋ, ତି ଅଡକୋନ୍ କେନ୍‌ ପପ୍ପରଞ୍ଜି ଅମ୍ମୋସାଏଞ୍ଜି।

ତି ସିଲଡ୍ ଈଶ୍ୱରନ୍ ଲୋଙଡନ୍ ଆପ୍ପାୟେନ୍ ତି ଆତେ ଏର୍ତାଡିନ୍ନାଯାୟ୍ ଡକୋଲନେ। କେନ୍‌ଆତେ ଏତ୍ତେଲେ ଆଲୋଙଡ୍ ଡକୋଏନ୍ ଡ ମିସରବାଜି ଆସିଙଞ୍ଜି ଅମ୍‌ରେଙ୍‌ଲେ ଅର୍ରପ୍ତିଲଜି। ବନ୍‌ଡ ଅଙ୍ଗା ଆଡରକୋନେଲୋଙ୍ ଈଶ୍ରାୟେଲବାଜି ଡକୋଲଞ୍ଜି ତେତ୍ତେ ସାଆର୍ ଡକୋଲନ୍।

କେନ୍ ନଅଟା ରୋଗାଞ୍ଜି ଆଡ୍ରେନ୍ ଆତିକ୍କିଜାୟ୍ ଫାରୋନ୍ ଈଶ୍ରାୟେଲବାଜି ଆଡଅଙ୍ ଅନ୍ନମ୍‌ରେଙ୍‌ଲଜି। ଇନିଆସନ୍ ଗାମେଣ୍ତେନ୍ ଫାରୋନ୍ ଅନ୍ନମ୍‌ଡଙ୍‌ଲନ୍ ଆସନ୍, ଈଶ୍ୱରନ୍ ଅବୟ୍ ଆତନକୋଡ୍ ରୋଗାନ୍ ଅନାପ୍ପାୟନ୍ ଆସନ୍ ଇୟ୍ୟମେନ୍, କେନ୍ ଆତେ ଫାରୋନ୍ ଆମନ୍ନ ଆନ୍ନା ଏମ୍ମେତେ।