21. परमेश्वर मसीह क्ये वाद्दा खय्युरे

जब परमेश्वर य दुनिया क्ये बनाव हा, व्हाई दहेन्या कि आय बादया कोई ध्यंग मसीह क्ये घाल्वो को हिरी। आय आदम और हव्वा हाते वाद्दा खय हा कि व्हाई इन्द खयरिव। आय चिनेसी कि हव्वा दी डा पया पयदा हिरी जो माँबू के गराव कुचल्लोरिव। जो माँबु हव्वा धोका बेस्या व्हाई बेशक रागेहे ही। परमेश्वर क्ये अर्थाव ही कि मसीह पूरो रुपय रागेहे क्ये हराव हाक्कोरिव।

परमेश्वर य अब्राहम हाते वाद्दा खय हा कि आयक्ये संसार क्ये जम्मा जातीला आशीर्वाद धरेरे। परमेश्वर बादया कोई समय लय मसीह क्ये घाल्वो क्ये जरियाय अय वाद्दा पूरो खयरिव। व्हाई मसीह संसार क्ये हर डा जाती क्ये मंछला क्ये आयला पापसिला छुड़ावरिवसी।

परमेश्वर य मुसा हंगे वाद्दा खय्या कि भविष्य या व्हाई मूसा क्ये बराबर डा अलग भविष्य जिघय वालो घाल्लोरिव। अय भविष्य जिघय वालो मसीह हिरी। अय प्रकारय, परमेश्वर य फिर डा वाद्दा खय्या कि व्हाई मसीह जिघाल्लो ही।

परमेश्वर य राजा दाऊद हाते वाद्दा खय्या कि आयक्ये डा पयाव मसीह हिरी। व्हाई राजा हिरी और परमेश्वर क्ये मंछला पर हमेशा खानी राज खयरिव।

परमेश्वर य यिर्मयाह परमेश्वर क्ये बतकाव जिघय वालो हाते बतकाव खय्या कि और चिने कि डा ध्यंग व्हाई डा नय्या वाचा होयरिव । व्हाई पुरानो वाचा इस्त्राएल देह क्ये हंगे सिने पहाड़ या खय हा आयक्ये जोह्हो नय्या वाचा जा हां हिरी। जब मंछला क्ये हंगे व्हाई पानक्ये नय्या वाचा खयरिव, त्ये व्हाई आयलाया पानक्ये मंछे जा रूप या प्रकट हिरी। हर डा मंछ आय हाते प्रेम थारे और आयक्ये व्यवस्था क्ये पालन घय क्ये इच्छा थारे। परमेश्वर य चिनेसी कि अय व्यवस्था सिला आयला सीना सिलाया लिख्खो तर्या जा हिरी। व्हाई आय मंछला क्ये हिरी, और परमेश्वर य आयला पापसिला माफ़ खयरिव। व्हाई मसीह हिरी जो आयला हंगे नय्या वाचा खयरिव।

परमेश्वर क्ये भविष्य जिबताव वालोला अय लय नासी कि मसीह डा परमेश्वर क्ये भविष्य जिघय वालो ही। डा परमेश्वर क्ये भविष्य जिघय वालो मंछ ही जो परमेश्वर क्ये बतकाव्ला कुन्हेरे और फिर मंछलाया परमेश्वर क्ये बत्कावला बतावसिरे। जो घाल्वो खानी परमेश्वर य वाद्दा खयहा व्हाई मसीह डा निक्को परमेश्वर क्ये भविष्य जिघय वालो हिरी। अयक्ये मतल्बाव कि व्हाई परमेश्वर क्ये बतकावला निक्को रुपय कुन्हेरिव, और व्हाई मंछला क्ये आय बतकावला क्ये निक्कोय सिखावरिव।

इस्त्राएली यहूदी पुजारी मंछला खानी परमेश्वर क्ये गेंता बलिव चड़ावक्ये जारी थाहे। अय बलिव मंछला क्ये पापसिला खानी आयला क्वो परमेश्वर क्ये जरियाय सजा बेक्ये जग्ग़ा या चड़ावतर्या ही। यहूदी पुजारी य मंछला खानी विनती लय खय्याहे। पर, व्हाई मसीह निक्को महान यहूदी बयाना पुजारी हिरी जो परमेश्वर बे खानी डा निक्को बलि क्ये रुप या पानक्ये चड़ावरिव। अयक्ये मतल्बाव, व्हाई कभय पाप हां खयरिव, और व्हाई पानक्ये बली ही खानी जिबेरी, तब दुनिया क्ये लय अलग बलि जरूरी हां हिरी।

मंछला क्ये दल लाया राजा और प्रधान राज खयेरे, और व्हाइला कभय कभय गलतिला खयेरे। राजा दाऊद य केवल इस्त्राएलियों लाया राज खय्या, पर राजा दाऊद क्या पयाव मसीह पुरो संसारया राज खयरिव, और व्हाई हमेशा खानी राज खयरिव। अयक्ये अलावा, व्हाई हमेशा निक्को ढंगय राज खयरिव, और सही फेसला ला कातेरीव।

परमेश्वर क्ये भविष्य जिघय वालोलाय मसीह क्ये बारिया घयनु बतकाव नाहे। उदाहरण खानी, मलाकी चिनेसी कि मसीह क्ये बी होय प्यलो डा अलग परमेश्वर क्ये भविष्य जिघय वालो पीरी। व्हाई भविष्य जिघय वालो झिक्क जरूरी हिरी। अयक्ये अलावा, यशायाह भविष्य जिघय वालोय अय लिखवा कि मसीह डा कुवारी दी जन्म कातेरिव। और मीका परमेश्वर क्ये भविष्य जिघय वालोय चिनेसी कि मसीह बैतलहम बस्ती दी जन्म कातेरिव।

यशायाह परमेश्वर क्ये भविष्य जिघय वालो चिनेसी कि मसीह गलील क्ये इलाकाया कुहारी। जो मंछला झिक्क दुखी व्हाई मसीह आयला शान्ति बेरीव। व्हाई केदिलालय आजाद खयरिव। मसीह बिमारला और जो कुन्हयेरे हां हाक्कोयेरे, दब्बो हां हाक्कोयेरे, ह्आ हां हाक्कोयेरे, या व्हा ह्वा हाक्कोयेरे आयला लय बड़िया खयरिव।

यशायाह परमेश्वर क्ये भविष्य जिघय वालो अय लय चिनेसी कि मंछला मसीह हाते नफरत खयरि और अपनाव खानी मना खयरे। और अलग परमेश्वर क्ये भविष्य जिघय वालोलाय चिनेसी कि मसीह क्ये डा हंगाव आय्क्ये खिलाफ हिरी। जकर्याह परमेश्वर क्ये भविष्य जिघय वालो चिनेसी कि आयक्ये अय हंगाव इन्द घय खानी दोहरो मंछला दी चाँदी क्ये तिस सिक्काला कातेरिव। अयक्ये अलावा, घयनु परमेश्वर क्ये भविष्य जिघय वालोलाय चिनेसी कि मंछलाय मसीह क्ये स्यातेरी, और अय लय कि व्हाइला आयक्ये लत्ताव्ला खानी जुव्वा खेल्योरे।

परमेश्वर क्ये भविष्य जिघय वालोलाय अय लय जिब्तावेसी कि मसीह होख्यते सीरी। यशायाह य भविष्य खय्या कि मंछला मसीह थुकेरे, आयक्ये मजाकाव उड़ावरे, और आय पिट्योरे। व्हाई आय छेड्योरे और व्हाई बयना दर्द और कष्टय सीरी, जबकि व्हाई क्ये लय गलतलय हां खयरिव।

परमेश्वर क्ये भविष्य जिघय वालोलाय अय लय जिब्तावेसी कि मसीह पाप हां खयरिव। व्हाई निक्को हिरी। पर व्हाई अय कारणय सीरी परमेश्वर य आय और मंछला क्ये पापला कारणय सजा खयरिव। आयक्ये सीते मंछला परमेश्वर क्ये हंगे मेल घय कोया सफल हिरी। अय कारणय परमेश्वर य चाहोरे कि मसीह सीरी।

परमेश्वर क्ये भविष्य जिघय वालोलाय अय लय जिब्तावेसी कि परमेश्वर य मसीह क्ये सितर्या दी जीवतो जिघयरी। अय दिख्खोरकि अय जम्मा नय्या वाचा घयक्वो परमेश्वर क्ये योजनाव ही , तबय व्हाई आय मंछला क्ये बचाव हाक्कोरिव जो लाय आयक्ये खिलाफ पाप खयहायेरे।

परमेश्वर य भविष्य जिबताव वालोला या मसीह क्ये बारेया झिक्क बतकावला प्यदा खय्यासी , पर मसीह आय भविष्य जिघय वालोला क्ये जिन्दगिव या हां पिव्हा। अय भविष्य जिब्ताव वालोला क्ये बेतर्या पाड़ी ह्ये दी झिक्क बरेहे बाद, सही समयया, परमेश्वर य मसीह क्ये अय दुनिया या घल्लोरिव।