8. प्रमात्मै यूसुफ अतै तसेरै टबरा जो बचन्दा हा

कई साला रै बाद, जैहणै याकूब बुड्डा भूची गो थू, ता तिनी अपणै पुत्र यूसुफ जो तसेरै भाई री जांच करनै ताई भैज्जू जेड़ा जानवरा रै झुंडा री देखभाळ करू करदै थीयै |

यूसुफ रै भाई तैस थऊँ जळदैं थीयै क्योकि तयांरा पिता तैस सितै ज्यादा प्यार करदा थू अतै ठेरैताई भी कि यूसुफै सुपना हेरूरा थू कि सो तयांरा शासक भूची गाणा | जैहणै यूसुफ अपणै भाई बलै आ ता तिन्यै तैसियो बंधी बणाई लेऊ अतै तैसियो दासा रा वपार करनै वाळै जो बेचीं दित्ता |

घरै फिरनै थऊँ पैहलै यूसुफ रै भाईयै यूसुफ रै ओडणा जो फाड़ी करी बकरी रै खुना मंज डबाई दित्ता | फिरी तिन्यै स्प ओडण अपणै पिता जो दस्सू ताकि सो एह सोचा कि कसी जंगली जानवरै यूसुफ जो मारी दित्ता हा | याकूब बड़ा उदास थू |

दासा रा वपार करनै वाळै सो मणु यूसुफ जो मिस्त्र लेई गै | नील नदी रै कनारै पुर बसुरा मिस्त्र अक्क विशाल अतै शक्तिशाली देश थू | तिन्या दासा रा वपार करनै वाळै यूसुफ जो अक्क धनी सरकारी अधिकारी को दास रै रूपा मंज बेचीं दित्ता | यूसुफै अपणै स्वामी री अच्छी तरह थऊँ सेवा करी,अतै प्रमात्मै यूसुफ जो आशीष दित्ती |

तसेरै स्वामी री लाड़ीयै यूसुफ सोगी सुणै री कोशिश करी, पर यूसुफै एसा रीति प्रमात्मै रै विरुद्ध पाप करनै थऊँ ना करी दिती | सो जळी पेई अतै यूसुफ पुर झूठा आरोप लगाई दित्ता, ठेरैताई तैसियो गिरफ्तार करीके जेलखानै मंज भैजी दित्ता | ऐठी तक कि जेलखानै मंज भी, यूसुफ प्रमात्मै रै प्रति सच्चा रेऊ, अतै प्रमात्मै तैसियो आशीष दिती |

दूँ साला रै बाद, यूसुफ अल्ली भी जेलखानै मंज थू, भलै ही सो निर्दोष थू | अक्क रात, फिरौन, जिंया कि मिस्री मणु अपणै राजै जो पुकारदै थीयै, तिनी दोई सुपनै हेरै जिन्यै तैसियो बड़ा विचलित करी दित्ता | त्सेरा कोई भी सलाहकार तैसियो तिन्या सुपनै रा अर्थ ना दसी सकू |

प्रमात्मै यूसुफ जो सुपनै रा अर्थ दसणै री क्षमता प्रदान करुरी थी, ठेरैताई फिरौनै यूसुफ जो जेलखानै थऊँ अप्पू बलै हद्दू | यूसुफै तैसियो सुपनै रा अर्थ दस्सू अतै बल्लू, “प्रमात्मै भरपूरी री फसला वाळै सता साला रै बाद अकाल रै सात साल भैजणै वाळा हा |”

फिरौन यूसुफ थऊँ एतना प्रभावित भुआ कि तिनी तैसियो मिस्र रा दुआ सबी थऊँ शक्तिशाली जोआन नियुक्त करी दित्ता |

यूसुफै मणु थऊँ खरी फसला वाळै सात साला रै दोरान बड़ी मात्रा मंज अन्न जो जमा करनै ताई बल्लू | जैहणै सत्ता साला रा अकाल आ तैहणै यूसुफै मणु जो सो अन्न बेचु ताकि तिन्या बलै खाणै ताई मोजूद भोआ |

सो अकाल केवल मिस्र मंज ही ना, पर कनान मंज भी भयंकर थू जैठी याकूब अतै तसेरा टबर रैहन्दा थू |

ठेरैताई याकूबै अपणै सबी थऊँ मोट्टै पुत्रा जो अन्न खरीदणै ताई मिस्र जो भैज्जू | जैहणै सो अन्न खरीदणै ताई यूसुफ रै सामणै खड़ीयै ता तिन्या भाईयै यूसुफ जो ना पछैणू | पर यूसुफै तिन्या जो पछैणी लेऊ |

एह पता करनै ताई कि सो बदली गछुरै हिन् तयांरी जाँच करनै थऊँ बाद, यूसुफै तिन्या सितै बल्लू, “अऊँ तुन्दा भाई यूसुफ हा! डरा मत | जैहणै तूहै मिंजो दासा रै रूपा मंज बेचु थू ता तूहै बुरा करनै री ठानी थी, पर प्रमात्मै तैसा बुराई जो भलाई ताई उपयोग करू! अईया अतै मिस्र मंज रेया ताकि अऊँ तुन्दै अतै तुन्दै टबरा ताई अन्न रा प्रबंध करी सकूँ |”

जैहणै यूसुफ रै भाई घरा जो फिरै अतै पिता याकूब जो दस्सू कि यूसुफ अल्ली भी जिन्दा हा ता सो बड़ा खुश भुआ थू |

हालांकि याकूब अक्क बुड्डा मणु थू ताभी सो अपणै पुरै टबरा रै सोगी मिस्र जो चली गो, अतै सो तैठी बसी गै | याकूब रै मरनै थऊँ पैहलै, तिनी हर अक्क पुत्रा जो आशीषित करू |

उत्पत्ति अध्याय 37-50 से एक बाइबल की कहानी