5. प्रतिज्ञा रा पुत्र

अब्राम अतै सारै रै कनान पूजणै रै दस साला बाद, अल्ली तिकर भी तिन्या बलै कोई सन्तान ना थी | ठेरैताई, अब्राम री लाड़ी सारै तैस सितै बल्लू, “चूँकि प्रमात्मै अल्ली तिकर मिंजो संतान जमणै मंज सक्षम ना करू हा अतै अबै अऊँ संतान जमणै ताई बड़ी बुड्डी हा, हेर, ममेरी दासी हाजिरा ऐठी हा | तैसा सितै भी बैह करी लै कि सो मेरै ताई अक्क संतान पैदा करी सका |”

अत: अब्रामै हाजिरा सितै बैह करी लेऊ | हाजिरै अक्क पुत्र जमू, अतै अब्रामै त्सेरा नां इश्माएल रखु | पर सारै हाजिरा थऊँ जळना लगी | जैहणै इशमाएल तेरह साला रा थू, प्रमात्मै फिरी थऊँ अब्राम सितै गल करी |

प्रमात्मै बल्लू, “ अऊँ सर्वशक्तिमान प्रमात्मा हा | अऊँ तीजो सोगी अक्क वाचा बनला |” तैहणै अब्रामै जामिना पुर पैई करी दंडवत करू | प्रमात्मै अब्राम सितै एह भी बल्लू, “ तू मती जिनी जाती रा पिता भोला | अऊँ तीजो अतै तेरै वंशजा जो तंयारी निज भूमि भूणै ताई कनान देश दिल्ला अतै अऊँ सदा ताई त्यारा प्रमात्मा भुला | तीजो अपणै घरानै रै हर मड़दा रा खतना करना हा |”

“ तेरी लाड़ी सारै अक्क पुत्र जमणा- सो प्रतिज्ञा रा पुत्र भूणा | त्सेरा नां इसहाक रखैं | अऊँ तैस सोगी अपणी वाचा जो बणाई रखला अतै सो अक्क बड्डी जात्ती बणी गाणा | अऊँ इशमाएल जो भी अक्क बड्डी जात्ती बणला, पर तेरी वाचा इसहाक सोगी रैहली | “तैहणै प्रमात्मै अब्राम रा नां बदलीकरी अब्राहम करी दित्ता, जठे रा मतलब हा " मतै रा पिता" | प्रमात्मै सारै रा नां भी बदलीकरी सारा करी दिता, जठेरा मतलब हा "मुलमाता" |

तैस धैड़ै अब्राहमै अपणै घरानै रै सभी मड़दा रा खतना करू | लगभग अक्की साला बाद, जैहणै अब्राहमै 100 साल री उम्रा रा थू अतै सारा 90 साला री थी, तैहणै सारै अब्राहमै रै पुत्रा जो जन्म दित्ता | जिंया प्रमात्मै तिन्या सितै बल्लू थू तिन्यै तसेरा नां इसहाक रखु |

जैहणै इसहाक जोआन भुआ ता प्रमात्मै एह बल्ली करी अब्राहम री विशवास री परीक्षा करी, “ अपणै अकलोतै पुत्रा जो लै, अतै तैसीयो मेरे ताई बलि रै रूपा मंज मारी दे |” फिरी थऊँ अब्राहमै प्रमात्मै री गल मन्नी अतै अपणै पुत्रा जो बलि करनै ताई तेयार करू |

जैहणै अब्राहम अतै इसहाक बलि चड़ाणै री जगहा री तरफ गाणा लगै ता इसहाकै पुछु, “हे पिता, असू बलै बलि ताई छिड़ी ता हिन्, पर बलि करनै रा मेमना कड़ी हा?” अब्राहमै जवाब दित्ता, “ हे मेरे पुत्र, प्रमात्मै बलि करनै ताई मेमनै रा प्रबंध करला |”

जैहणै सो बलि चड़ाण री जगहा पूजी गै, अब्राहमै इसहाक जो बन्नी करी वेदी पुर सोआई दित्ता | सो अपणै पुत्रा जो मारनै ही वाळा थू कि प्रमात्मै बल्लू, “रुकी गा! गोबरू जो नुकशान मत पजा! अबै अऊँ जाणी गो हा कि तू मेरा भय मंदा हा क्योकि तेई अपणै अकलोतै पुत्रा जो भी मिंजो थऊँ बचाईकरी ना रखु |”

नेड़ै ही अब्राहमै अक्क भेडू जो हेरू जेड़ा झाड़ी मंज फसुरा थू | इसहाक रै बदलै बलि ताई प्रमात्मै भेडू रा प्रबंध करू थू | अब्राहमै ख़ुशी-ख़ुशी भेडू री बलि चड़ाई दिती |

उत्पत्ति अध्याय 16-22 से एक बाइबल की कहानी